‘অপাৰেচন সিন্দুৰ’ (Operation Sindoor) ত ১০০ৰো অধিক সন্ত্ৰাসবাদী নিহত হৈছে। বৃহস্পতিবাৰে সৰ্বদলীয় বৈঠকত এই কথা প্ৰকাশ কৰে প্ৰতিৰক্ষা মন্ত্ৰী ৰাজনাথ সিঙে। প্ৰতিৰক্ষা মন্ত্ৰালয়ে লগতে জনাইছে যে এই অভিযান এতিয়াও শেষ হোৱা নাই।
চৰকাৰী সূত্ৰৰ উদ্ধৃতি দি একাধিক সংবাদ মাধ্যমে এই কথা প্ৰকাশ কৰিছে। সূত্ৰ মতে, কেন্দ্ৰীয় কেবিনেটৰ সদস্যসকলেও বৈঠকত বিৰোধী দলসমূহৰ প্ৰতিনিধিৰ আগত প্ৰধানমন্ত্ৰী নৰেন্দ্ৰ মোদীৰ ‘ঐক্যবদ্ধ হৈ থকা’ বাৰ্তাও দাঙি ধৰে।
বাৰ্তাটোত কোৱা হৈছে যে এই কঠিন সময়ত দেশৰ প্ৰতিজন নাগৰিকে একত্ৰিত হৈ থিয় দিয়াটো প্ৰয়োজনীয়। মঙলবাৰে গভীৰ নিশা পাকিস্তান আৰু পাক অধীকৃত কাশ্মীৰৰ ৯টা স্থানত সন্ত্ৰাসবাদী আন্তঃগাঁথনি লক্ষ্য কৰি ‘নিখুঁত আক্ৰমণ’ সংঘটিত হয়।
এই ৯ টা স্থানৰ ভিতৰত ৪ টা পাকিস্তানত আৰু ৫ টা পাক অধিকৃত কাশ্মীৰত। বাহাৱালপুৰ, মুৰিদকে আৰু শিয়ালকোট এই তিনিটা অঞ্চলৰ সন্ত্ৰাসবাদী ঘাটি ধ্বংস কৰাটোৱেই আছিল সেনাৰ মূল লক্ষ্য। দাবী কৰা হৈছে যে ভাৰতত সন্ত্ৰাসবাদী আক্ৰমণ উক্ত ঠাইসমূহতে পৰিকল্পনা কৰা হৈছিল।
কিন্তু ভাৰতে এই সামৰিক অভিযানত কিমান লোকৰ মৃত্যু হৈছে সেয়া এতিয়াও আনুষ্ঠানিকভাৱে ঘোষণা কৰা নাই। চৰকাৰী সূত্ৰ অনুসৰি, ৰাজনাথ সিঙে সৰ্বদলীয় বৈঠকত বিৰোধী প্ৰতিনিধিৰ আগত কয় যে এশৰো অধিক সন্ত্ৰাসবাদী নিহত হৈছে। এই অভিযানৰ সবিশেষ বিৰোধী দলৰ প্ৰতিনিধিক বুজাই দিয়া বুলি চৰকাৰী সূত্ৰটোৱে জানিবলৈ দিয়ে।
উল্লেখ্য যে বৃহস্পতিবাৰে সংসদ ভৱনত অনুষ্ঠিত সৰ্বদলীয় বৈঠকত উপস্থিত নাছিল প্ৰধানমন্ত্ৰী। ইয়াৰ সভাপতিত্ব কৰে প্ৰতিৰক্ষা মন্ত্ৰীয়ে। কেন্দ্ৰীয় গৃহমন্ত্ৰী অমিত শ্বাহ, বৈদেশিক পৰিক্ৰমা মন্ত্ৰী এছ জয়শংকৰ, বিত্তমন্ত্ৰী নিৰ্মলা সীতাৰমণকে ধৰি কেবিনেট সদস্যসকল উপস্থিত থাকে। উল্লেখ্য যে পহেলগাম কাণ্ডৰ পিছত অনুষ্ঠিত সৰ্বদলীয় বৈঠকতো প্ৰধানমন্ত্ৰী উপস্থিত নাছিল।
আনহাতে, কংগ্ৰেছৰ হৈ ৰাজ্যসভাৰ বিৰোধী দলপতি মল্লিকাৰ্জুন খাৰ্গে আৰু লোকসভাৰ বিৰোধী দলপতি ৰাহুল গান্ধী উপস্থিত থাকে। ইয়াৰ উপৰি তৃণমূলৰ হৈ সুদীপ বেনাৰ্জী, ডি এম কেৰ হৈ টি আৰ বালু, আপৰ হৈ সঞ্জয় সিং, উদ্ধৱ থাকৰেৰ হৈ সঞ্জয় ৰাউত, এন চি পি (এছ পি)ৰ হৈ সুপ্ৰিয়া চুলে উপস্থিত থাকে।
কেন্দ্ৰৰ এক সূত্ৰই জনোৱা মতে, সৰ্বদলীয় বৈঠকত ‘অপাৰেচন সিন্দুৰ’ৰ জৰিয়তে পাকিস্তানৰ সন্ত্ৰাসবাদী শিবিৰসমূহ কেনেদৰে আঘাতপ্ৰাপ্ত হৈছে সেই বিষয়ে আলোকপাত কৰা হৈছে।
এই সামৰিক অভিযানৰ সম্ভাৱ্য প্ৰভাৱ আৰু পাকিস্তানৰ যিকোনো আক্ৰমণৰ প্ৰতি সঁহাৰি জনাই সম্ভাৱ্য সঁহাৰিৰ বিষয়েও বৈঠকত আলোচনা কৰা হয় বুলি সূত্ৰটোৱে জনায়। জানিব পৰা মতে, সভাত উপস্থিত থকা সকলোকে কেন্দ্ৰই অনুৰোধ জনাইছে যে সেনাবাহিনীৰ বীৰত্বৰ খবৰ সকলোতে বিয়পাই দিব লাগে।
