ৰমজানৰ কাঁচি জোনে আকাশত ভুমুকি মৰাৰ পিছত আৰম্ভ হয় ইছলামধৰ্মী লোকৰ কঠোৰ ব্ৰত আৰু আত্মসংযমৰ উপলক্ষ ৰোজা। মাহজোৰা কঠোৰ অনুশাসন আৰু নিয়মানুৱৰ্তিতাৰ এক শাৰীৰিক অনুশীলন হৈছে ৰমজানৰ উপবাস, যাক সহজ অৰ্থত ৰোজা বুলি কোৱা হয়।
ৰমজান মাহ হৈছে ইছলামিক কেলেণ্ডাৰৰ আটাইতকৈ গুৰুত্বপূৰ্ণ মাহ। কিয়নো এই মাহতে ইছলামধৰ্মী লোকৰ আন দুটা গুৰুত্বপূৰ্ণ তিথি পালন কৰা হয়। যি দুটা তিথি ৰমজানৰ ঠিক আগত (শ্ববেবৰাট) আৰু ৰমজানৰ অন্তিম সপ্তাহত (শ্ববেকদৰ) পালন কৰা হয়। এই তিথি দুটা ইছলামধৰ্মী লোকৰ বাবে নিজক সংশোধন কৰা আৰু পুণ্য অর্জনৰ আটাইতকৈ ডাঙৰ উপলক্ষ।
ইয়াৰ উপৰি ৰমজানৰ উপবাসৰ লগতে ঈদৰ পূৰ্বে ফিটৰা আৰু জাকাত হৈছে প্ৰতিগৰাকী ইছলামধৰ্মী লোকৰ বাবে এক অৱশ্যে কৰণীয় কৰ্তব্য। প্ৰতিগৰাকী সামৰ্থ্যৱান লোকৰ বাবে ফিটৰা আৰু জাকাত হৈছে বাধ্যতামূলক।
ইয়াৰ এক অন্তৰ্নিহিত অৰ্থ আছে। প্ৰথম, যিসকল লোক আর্থিকভাৱে টনকিয়াল নহয় তেওঁলোকক ঈদৰ আনন্দ উদযাপনৰ বাবে সুযোগ প্ৰদান কৰা। দ্বিতীয়, যিসকল লোক অৰ্থনৈতিকভাৱে টনকিয়াল, তেওঁলোকক সামাজিক দায়বদ্ধতাৰ পাঠ শিকোৱা। এয়া হৈছে হজৰত মহম্মদৰ (স্বা) সমাজবাদী নীতিৰ প্ৰতি অনুৰাগ।
ৰমজানৰ মাহজোৰা ব্ৰতৰ পিছত পুনৰ আকাশত কাঁচি জোনে ভুমুকি মৰাৰ লগে লগে আৰম্ভ হয় ঈদৰ আনন্দ উৎসৱ।
ঈদ মানে হৈছে খুচি- আনন্দ। ভাতৃত্ববোধৰ এক অপূৰ্ব নিদৰ্শন। সমাজৰ প্ৰতিটো শ্ৰেণীৰ লোকক একেশাৰীত থিয় কৰোৱাৰ এক অন্যতম উৎসৱ। ঈদৰ উন্মাদনাত বিয়পি পৰে ভাতৃত্ববোধৰ বাৰ্তা। ঈদে আনি দিয়ে সুখ ভাগ-বতৰাৰ অনাবিল মুহূৰ্ত। ঈদ মানে হৈছে সামাজিক সমতা আৰু ন্যায়ৰ অন্যতম উৎসৱ।
এমাহৰ কঠোৰ ব্ৰত আৰু আত্মসংযমৰ অন্তত ঈদ উদযাপনৰ জৰিয়তে আগন্তুক সময়ৰ বাবে নিজক সংশোধন কৰি সৎ আৰু সঠিক পথত চলাৰ এক পথ নিৰ্দেশনা।
এই ঈদ হওক আমাৰ সকলোৰে বাবে এক আশাৰ বতৰা, সামাজিক ন্যায় প্ৰতিষ্ঠাৰ মুহূৰ্ত।
আছাম টাইমছ পোষ্টৰ সমূহ দৰ্শকৰ লগতে ৰাজ্যবাসীলৈ ঈদ উল ফিটৰৰ আন্তৰিক শুভেচ্ছা জনালোঁ।
