জ্যেষ্ঠ সাংবাদিক (Sr. Journalist) তথা গুৱাহাটী প্ৰেছ ক্লাবৰ সহকাৰী সাধাৰণ সম্পাদক দিলৱাৰ হুছেইন মজুমদাৰ (Dilwar Hussain Majumdar)ক গ্ৰেপ্তাৰৰ প্ৰতিবাদ (Protests against arrest) আৰু শীঘ্ৰে মুকলিৰ দাবীত বুধবাৰে গুৱাহাটীত তীব্ৰ প্ৰতিবাদ (Strong protests in Guwahati) সাব্যস্ত কৰে সাংবাদিকসকলে। গুৱাহাটী প্ৰেছ ক্লাবৰ আহ্বানত বিভিন্ন সংবাদ প্ৰতিষ্ঠানৰ কেইবা শ সাংবাদিক তথা সংবাদ কৰ্মীয়ে এই প্ৰতিবাদী কাৰ্যসূচীত অংশগ্ৰহণ কৰে। প্ৰতিবাদকাৰীসকলে সাংবাদিক দিলৱাৰ হুছেইন মজুমদাৰক বাতৰি সংগ্ৰহৰ বাবে যোৱাৰ সময়ত অন্যায়ভাৱে গ্ৰেপ্তাৰ কৰা কাৰ্যক একেমুখে গৰিহণা দিয়ে। লগতে চৰকাৰে সংবাদ মাধ্যমৰ কণ্ঠ ৰোধৰ বাবে চেষ্টা কৰা বুলি অভিযোগ তুলি বাক স্বাধীনতা ৰোধ কৰিব বিচৰা কাৰ্য্যক ধিক্কাৰ দিয়ে।
গুৱাহাটী প্ৰেছ ক্লাবৰ সন্মুখত তথা গুৱাহাটী ক্লাবৰ পৰা আৰম্ভ হোৱা এই প্ৰতিবাদী কাৰ্যসূচী পৰৱৰ্তী সময়ত পাণবজাৰ থানালৈ আগবাঢ়ে। ইয়াৰ পিছত চি জে এম আদালতৰ সন্মুখত অৱস্থান কৰে প্ৰতিবাদকাৰীসকলে। সাংবাদিকসকলে প্ৰতিবাদী সমদল উলিয়াই পাণবজাৰ থানালৈ যাত্ৰা কৰাৰ সময়ত আৰক্ষীৰে এক হেঁচা-ঠেলা পৰিস্থিতিৰো সৃষ্টি হয়। ইফালে আৰক্ষীয়ে প্ৰতিবাদকাৰীসকলক বাধা দিবলৈ চেষ্টা কৰাৰ নামত জোৰ-জুলুম কৰাৰো অভিযোগ উঠিছে। আজিৰ এই প্ৰতিবাদী কাৰ্যসূচীত অসমৰ বিভিন্ন সংবাদ প্ৰতিষ্ঠানৰ গুৱাহাটীস্থিত সাংবাদিক-সংবাদ কৰ্মীসকলে একত্ৰিতভাৱে প্ৰতিবাদ সাব্যস্ত কৰা পৰিলক্ষিত হয়। আনহাতে, বহুকেইগৰাকী জ্যেষ্ঠ তথা বিশিষ্ট ব্যক্তিয়েও এই প্ৰতিবাদী কাৰ্যসূচীত অংশগ্ৰহণ কৰি চৰকাৰৰ দমনমূলক নীতিৰ একেমুখে গৰিহণা দিয়ে।
উল্লেখযোগ্য যে ক্ৰছ কাৰেণ্ট নামৰ ডিজিটেল সংবাদ মাধ্যমটোৰ জ্যেষ্ঠ সাংবাদিক দিলৱাৰ হুছেইনক মঙলবাৰে নিশা পাণবজাৰ আৰক্ষীয়ে গ্ৰেপ্তাৰ কৰে। প্ৰথম অৱস্থাত এপেক্স বেংকত সংঘটিত কেলংকাৰী আৰু অনিয়ম সন্দৰ্ভত পৰিচালন সঞ্চালকক প্ৰশ্ন কৰাৰ বাবে দিলৱাৰ হুছেইন মজুমদাৰক পাণবজাৰ থানাত আটক কৰি ৰখাৰ অভিযোগ। প্ৰশ্ন কৰাৰ বাবেই থানাত কেইবা ঘণ্টা আবদ্ধ হৈ থাকিবলগীয়া হয় সাংবাদিক দিলৱাৰ হুছেইন মজুমদাৰ।
মঙলবাৰে দুপৰীয়া এপেক্স বেংকত সংঘটিত অনিয়ম-কেলেংকাৰীৰ তদন্তৰ দাবীত পাণবজাৰস্থিত বেংকটোৰ মুখ্য কাৰ্যালয়ৰ সন্মুখত ধৰ্ণা কাৰ্যসূচী ৰূপায়ণ কৰিছিল জাতীয় যুৱ শক্তিয়ে। সেই সময়ত বেংক কৰ্তৃপক্ষৰ মতামত ল’বলৈ বেংকটোৰ পৰিচালন সঞ্চালক ডম্বৰু শইকীয়াৰ সাক্ষাৎকাৰ বিচাৰি বেংকত উপস্থিত হৈছিল সাংবাদিক দিলৱাৰ হুছেইন মজুমদাৰ। কয় অভিযোগ অনুসৰি, সাংবাদিকৰ প্ৰশ্নৰ উত্তৰ দিয়াৰ সলনি বেংক কৰ্তৃপক্ষই পাণবজাৰ আৰক্ষীক খবৰ দিয়ে। ইয়াৰ পিছত আৰক্ষীয়ে আহি সাংবাদিক দিলৱাৰ হুছেইনক আটক কৰি লৈ যায়।
কিন্তু পৰৱৰ্তী সময়ত তেওঁৰ পৰিয়ালৰ লোক আৰু অধিবক্তা আহি সাংবাদিকজনক সাক্ষাৎ কৰিব বিচাৰে যদিও তাৰ অনুমতি দিয়া নহয়। অৱশেষত প্ৰায় সাত ঘণ্টা পিছত নিশা ১২ বজাৰ পিছত SC/ST protection আইনৰ নিৰ্দিষ্ট ধাৰাৰ অধীনত তেওঁক গ্ৰেপ্তাৰ কৰা হয়। তেওঁৰ বিৰুদ্ধে অভিযোগ, বেংকটোৰ এগৰাকী বড়ো উপাধিৰ কৰ্মচাৰীক তেওঁৰ জাতিগত প্ৰসংগ উল্লেখ কৰি উচ্চ-বাচ্য কৰিছিল সাংবাদিকগৰাকীয়ে। উক্ত কৰ্মচাৰীজনৰ এজাহাৰৰ ভিত্তিতে তেওঁক গ্ৰেপ্তাৰ কৰা বুলি আৰক্ষীয়ে জনায়।
