লোকসভাৰ সমষ্টি (Lok Sabha constituency) পুনৰ নিৰ্ধাৰণ (Delimitation) আগন্তুক ২৫ বছৰৰ বাবে (For 25 years) স্থগিত ৰখাৰ দাবী ষ্টেলিনৰ (Stalin demands postponement)। শনিবাৰে চেন্নাইৰ বৈঠকত দক্ষিণ ভাৰতৰ চাৰি ৰাজ্যৰ মুখ্যমন্ত্রী আৰু এখন ৰাজ্যৰ উপ-মুখ্যমন্ত্রীৰ উপস্থিতিত এই সন্দৰ্ভত প্রস্তাৱ গ্ৰহণ কৰা হয়।
তামিলনাডুৰ মুখ্যমন্ত্রী এম কে ষ্টেলিনৰ আহ্বানত স্বচ্ছতাৰ ভিত্তিত সমষ্টি পুনৰ নিৰ্ধাৰণৰ দাবীত ‘জয়েন্ট একচন কমিটি’ৰ বৈঠকত শুক্রবাৰে চেন্নাইত উপস্থিত হৈছিল কেৰালাৰ মুখ্যমন্ত্রী তথা চিপিএম নেতা পিনাৰাই বিজয়ন, তেলেঙ্গানাৰ কংগ্রেছৰ মুখ্যমন্ত্রী ৰেবন্ত ৰেড্ডি, পঞ্জাবৰ আপ চৰকাৰৰ মুখ্যমন্ত্রী ভগৱন্ত মান। লগতে উপস্থিত থাকে কর্নাটকেৰ উপ-মুখ্যমন্ত্রী তথা প্রদেশ কংগ্রেছৰ সভাপতি ডি কে শিৱকুমাৰ।
যৌথ কমিটিৰ প্রস্তাৱত কোৱা হৈছে যে দেশত জনসংখ্যা নিয়ন্ত্রণৰ যি লক্ষ্য নিৰ্ধাৰণ কৰা হৈছে তাত এই পর্যন্ত উপনীত হ’ব পৰা নাই। এই পৰিস্থিতিত সমষ্টি পুনৰ নিৰ্ধাৰণৰ সিদ্ধান্ত আৰু ২৫ বছৰৰ বাবে স্থগিত ৰখা হওক। প্রস্তাৱটোত কোৱা হৈছে, “যিবোৰ ৰাজ্যই জন্মহাৰ নিয়ন্ত্রণ কাৰ্যব্যৱস্থা সফলভাৱে ৰূপায়িত কৰিব পাৰিছে, তেওঁলোকক শাস্তি দিয়া উচিত নহয়।”
উল্লেখযোগ্য যে জনসংখ্যা অনুযায়ী লোকসভাত সাংসদৰ সংখ্যা বৃদ্ধি হোৱাৰ কথা। ২০২৯ চনৰ লোকসভা নির্বাচনৰ পূৰ্বে প্রধানমন্ত্রী নৰেন্দ্র মোদীৰ চৰকাৰে সমষ্টি পুনৰ নিৰ্ধাৰণ কৰি লোকসভা সমষ্টিৰ সংখ্যা বৃদ্ধি কৰি ল’ব পাৰে বুলি বিৰোধী দলবোৰে আশংকা কৰিছে। সেয়া হ’লে হিন্দী বলয়ৰ ৰাজ্যবোৰৰ পৰা লোকসভাৰ আসনৰ সংখ্যা যথেষ্ট বৃদ্ধি পাব। পৰৱৰ্তী লোকপিয়ল অনুসৰি লোকসভাৰ সমষ্টি পুনৰ নিৰ্ধাৰণ হ’লে উত্তৰ ভাৰতৰ তুলনাত দক্ষিণৰ ৰাজ্যবোৰৰ সাংসদৰ সিমান এটা বৃদ্ধি নাপাব। কাৰণ উক্ত ৰাজ্যবোৰত জন্মহাৰ বৃদ্ধিৰ হাৰ উত্তৰ ভাৰতৰ তুলনাত কম। তেনে ক্ষেত্রত বিজেপি লাভৱান হোৱাৰ সম্ভাৱনা ব্যক্ত কৰিছে ডিএমকে, চিপিএমৰ দৰে দক্ষিণ ভাৰতৰ বিভিন্ন ৰাজ্যৰ শাসকীয় দলবোৰে।
আনহাতে, ষ্টেলিনে আহ্বান জনোৱা বৈঠকত যোগ দি তেলেঙ্গানাৰ মুখ্যমন্ত্রী ৰেবন্ত ৰেড্ডীয়ে কয়, “উত্তৰ ভাৰতে আমাক দ্বিতীয় শ্ৰেণীৰ নাগৰিকত পৰিণত কৰিব। বিজেপিয়ে যদি জনসংখ্যাৰ ভিত্তিত সমষ্টি পুনৰ নিৰ্ধাৰণ কৰে, তেন্তে দক্ষিণ ভাৰতে নিজস্ব ৰাজনৈতিক কণ্ঠ হেৰুৱাব।” ইফালে কেৰালাৰ মুখ্যমন্ত্রী বিজয়নে কয়, ‘‘আমাৰ ওপৰত সমষ্টি পুনৰ নিৰ্ধাৰণৰ বিপদ আহিছে। মোদী চৰকাৰে কাৰো সৈতে একো আলোচনা নকৰাকৈ নিজৰ মতে সমষ্টি পুনৰ নিৰ্ধাৰণ কৰিবলৈ সক্রিয় হৈছে। এনে পদক্ষেপ সাংবিধানিক বিধি আৰু গণতান্ত্রিক চেতনাৰ পৰিপন্থী।’’
