বহু সময় ধৰি অপেক্ষা কৰাৰ লগতে বিমান কৰ্তৃপক্ষক বাৰে বাৰে অনুৰোধ কৰি আছিল এখন হুইলচেয়াৰৰ বাবে। কিন্তু তাৰ পিছতো লাভ কৰা নাছিল হুইলচেয়াৰ। অৱশেষত তেনেদৰেই বিমানত উঠিবলৈ আগবাঢ়ে এগৰাকী বয়োজ্যেষ্ঠ মহিলা। কিন্তু দিল্লী বিমানবন্দৰ (Delhi Airport)ত বিমানত উঠাৰ পৰি আহত (Injured) হয় ৮২ বছৰীয়া মহিলা (An 82-year-old woman) গৰাকী। জানিব পৰা মতে ব্ৰেইন ষ্ট্ৰোকত আক্ৰান্ত হোৱাৰ বাবে তেওঁক চিকিৎসালয়ত ভৰ্তি কৰোৱা হয়। ঘটনাটোৰ পিছত মহিলাগৰাকীৰ নাতিনীয়েকে এয়াৰ ইণ্ডিয়াৰ বিৰুদ্ধে সুব্যৱস্থাৰ অভাৱ আৰু অৱহেলাৰ অভিযোগ উত্থাপন কৰিছে। এয়াৰ ইণ্ডিয়ায়ো প্ৰতিক্ৰিয়া প্ৰকাশ কৰিছে।
এয়াৰ ইণ্ডিয়াৰ বেংগালুৰু অভিমুখী বিমানত টিকট বুক কৰাৰ সময়ত ৰাজ পাচৰিচা নামৰ এগৰাকী অশীতিপৰ ব্যক্তিয়ে হুইলচেয়াৰৰ (Wheelchair) বাবে আবেদন কৰিছিল। তেওঁ বিমানখনত উঠিবলৈ সময়মতে দিল্লী বিমানবন্দৰত উপস্থিত হোৱা বুলি দাবী কৰিছিল। কিন্তু অভিযোগ কৰা হৈছে যে হুইলচেয়াৰখন বহু সময় অপেক্ষা কৰাৰ পাছতো পোৱা নাছিল। অৱশেষত, এগৰাকী আত্মীয়ৰ সহায়ত তেওঁ খোজকাঢ়ি বিমানত উঠিবলৈ বাধ্য হৈছিল। কিন্তু বহু কষ্টেৰে বহুদূৰ খোজকাঢ়ি যোৱাৰ পিছত তেওঁ কাউণ্টাৰত আহি হঠাতে বাগৰি পৰে। ফলত মূৰ, ওঁঠ আৰু নাকত আঘাত পায়। কিন্তু সহযাত্ৰীৰ পৰা বিমান সেৱকলৈকে কোনেও তেওঁক সহায় কৰিবলৈ আগবাঢ়ি অহা নাছিল। পৰ্যাপ্ত প্ৰাথমিক চিকিৎসাও উপলব্ধ নাছিল। তেনে পৰিস্থিতিতে তেওঁ বিমানত উঠিবলগা হৈছিল।
পৰিয়ালৰ মতে, তেওঁক পিছত বেংগালুৰুৰ এখন চিকিৎসালয়ৰ আইচিইউত ভৰ্তি কৰোৱা হয়। আঘাতৰ কাৰণে তেওঁৰ মস্তিষ্কৰ ৰক্তক্ষৰণ হৈছিল। তেওঁক পৰ্যবেক্ষণত ৰখা হৈছে। মহিলাগৰাকীৰ নাতিনীয়েকে কয় যে তেওঁৰ শৰীৰৰ বাওঁফালটো ক্ৰমান্বয়ে জঠৰ হৈ পৰিছে।চিকিৎসকসকলেও পক্ষাঘাতৰ আশংকা কৰিছে।
অৱশ্যে, এয়াৰ ইণ্ডিয়াই সকলো অভিযোগ অস্বীকাৰ কৰিছে। এয়াৰলাইনছ সংস্থাটোৱে কৈছে যে মহিলাগৰাকীৰ অভিযোগ ভিত্তিহীন। তেওঁ হুইলচেয়াৰৰ বাবে এঘণ্টা অপেক্ষা কৰিবলগা হোৱা নাছিল। বৰঞ্চ তেওঁলোকে সেইদিনা নিৰ্ধাৰিত সময়তকৈ অলপ পলমকৈ বিমানবন্দৰলৈ আহিছিল। যাত্ৰীগৰাকীৰ আত্মীয়সকলে হুইলচেয়াৰৰ বাবে অনুৰোধ কৰিছিল। কিন্তু সেই সময়ত অতিমাত্ৰা যাত্ৰীৰ ভিৰৰ বাবে হুইলচেয়াৰ উপলব্ধ নাছিল। ইয়াৰ পিছত মহিলাগৰাকীয়ে নিজৰ ইচ্ছামতে আত্মীয়ৰ সৈতে খোজকাঢ়ি যোৱাৰ সিদ্ধান্ত লৈছিল।
কিন্তু দুৰ্ভাগ্যবশতঃ তাৰ পিছতে তেওঁ বিমানবন্দৰৰ চৌহদত বাগৰি পৰে। এয়াৰ ইণ্ডিয়াই এইটোও কয় যে প্ৰাথমিক চিকিৎসা নোপোৱাৰ অভিযোগো সত্য নহয়। মহিলাগৰাকী পৰি যোৱাৰ পিছত বিমানবন্দৰৰ কৰ্মচাৰী আৰু চিকিৎসকসকল ঘটনাস্থলীলৈ দৌৰি গৈছিল। তেওঁলোকে তেওঁক প্ৰাথমিক চিকিৎসা দিছিল। এয়াৰ ইণ্ডিয়াই এক বিবৃতিত কয়, “আমি মহিলাগৰাকীৰ প্ৰতি সম্পূৰ্ণ সহানুভূতিশীল আৰু তেওঁৰ আশু আৰোগ্য কামনা কৰিছো। অৱশ্যে অভিযোগৰ আধাৰত বিষয়টোৰ তদন্ত কৰা হৈছে।’’
