বুধবাৰে গুৱাহাটীৰ বৰঝাৰস্থিত (Barjhar in Guwahati) লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰ (Lokpriya Gopinath Bordoloi International Airport) টাৰ্মিনাছৰ পুনৰ উন্নীতকৰণ প্ৰকল্প উদ্বোধন কৰে মুখ্যমন্ত্ৰী ডঃ হিমন্ত বিশ্ব শৰ্মাই। উল্লেখযোগ্য যে বিমানবন্দৰৰ টাৰ্মিনাছটো নতুনকৈ সজাই তোলা হৈছে।
টাৰ্মিনাছটো মুকলি কৰি মুখ্যমন্ত্ৰীয়ে কয়, “এই বছৰৰ শেষৰফালে গুৱাহাটীয়ে এটা নতুন বিমানবন্দৰ লাভ কৰিব, যি বার্ষিক ১৩ নিযুত যাত্ৰীৰ ক্ষমতাযোগ্য হ’ব। এই ক্ষমতা বৰ্তমানৰ ক্ষমতাতকৈ ৪ গুণ অধিক। আজি আমি বিদ্যমান লোকপ্রিয় গোপীনাথ বৰদলৈ আন্ত:ৰাষ্ট্রীয় বিমানবন্দৰৰ টাৰ্মিনাছ উন্নীতকৰণ প্রকল্প শুভ উদ্বোধন কৰোঁ, যাতে যাত্ৰীসকলে নতুন বিমানবন্দৰটো কাৰ্যকৰী নোহোৱালৈকে এক বৰ্ধিত অভিজ্ঞতা উপভোগ কৰিব পাৰে।”
উল্লেখযোগ্য যে উত্তৰ-পূৰ্বাঞ্চলৰ মুখ্য আকাশী পৰিবহণ ব্যৱস্থা হৈছে গুৱাহাটী বিমানবন্দৰ। এই বিমানবন্দৰটোৰ বৰ্তমানৰ টাৰ্মিনাছটো উন্নীতকৰণ কৰি যাত্ৰীসকলক উন্নত আৰু আধুনিক সা-সুবিধা প্ৰদানৰ ব্যৱস্থা কৰা হৈছে। টাৰ্মিনাছটোত বিভিন্ন নতুন সুবিধা উপলব্ধ কৰাৰ লগতে আটকধুনীয়াকৈ সজাই ডিজিটেল মাধ্যমযোগে উত্তৰ-পূবৰ ৰাজ্যসমূহৰ বিভিন্ন কলা-সংস্কৃতি প্ৰদৰ্শনৰ ব্যৱস্থা কৰা হৈছে।
টাৰ্মিনাছটো সন্দৰ্ভত সংবাদ মাধ্যমৰ আগত মুখ্যমন্ত্ৰীয়ে কয় যে ইয়াৰ সন্মুখ ভাগটো ২০০ বৰ্গমিটাৰৰ পৰা ১০০০ বৰ্গমিটাৰ কৰা হৈছে। আনহাতে, ৮ টা প্ৰৱেশ পথৰ পৰা বৰ্তমান ১৪ টা বৃদ্ধি কৰা হৈছে।
আনহাতে, আগন্তুক এডভাণ্টেজ আছাম ২.০ সন্মিলনত অংশগ্ৰহণ কৰিবলৈ অহা অতিথি তথা দেশ-বিদেশৰ পৰ্যটকসকলক আকৰ্ষিত কৰিবলৈ সন্মুখত এখন বাগিচা আৰু সুন্দৰ দেৱাল স্থাপন কৰা হৈছে।
ইয়াৰ উপৰি তেওঁ কয় যে নতুনকৈ নিৰ্মাণ হৈ থকা টাৰ্মিনেলটোৰ তৃতীয় অংশ অহা ছেপ্টেম্বৰ-অক্টোবৰ মাহৰ ভিতৰত সম্পূৰ্ণ হ’ব।
