ইউনিফৰ্ম চিভিল কোড বা অভিন্ন দেৱানী বিধি অনাৰ পথত এইবাৰ আগবাঢ়িছে গুজৰাট (UCC in Gujrat)। এক ৰাষ্ট্ৰীয় সংবাদ মাধ্যমৰ সূত্ৰ অনুযায়ী, মঙলবাৰে ৰাজ্য চৰকাৰে এই সন্দৰ্ভত এখন কমিটী গঠন কৰি ইউ চি চিৰ খচৰা প্ৰস্তুত কৰে।
পাঁচজনীয়া সমিতিখনৰ নেতৃত্বত আছে উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ ৰঞ্জনা প্ৰকাশ দেশাই।
তেওঁৰ তত্ত্বাৱধানত অহা ৪৫ দিনৰ ভিতৰত কমিটীয়ে এই সন্দৰ্ভত প্ৰতিবেদন দাখিল কৰিব। গুজৰাটৰ মুখ্যমন্ত্ৰী ভূপেন্দ্ৰ পেটেলে মঙলবাৰে কয় যে ভাৰতীয়ত্ব আমাৰ ধৰ্ম। ভাৰতৰ সংবিধান একমাত্ৰ পবিত্ৰ গ্ৰন্থ।
সেই সংবিধানৰ ৭৫ বছৰীয়া জয়ন্তী উপলক্ষে প্ৰধানমন্ত্ৰী নৰেন্দ্ৰ মোডীয়ে সিদ্ধান্ত লৈছে যে সমগ্ৰ দেশতে একেধৰণৰ নিয়ম প্ৰৱৰ্তন কৰা হ’ব, যাতে সকলোৰে সম অধিকাৰ নিশ্চিত কৰিব পৰা যায়। পাঁচজনীয়া কমিটীৰ বিষয়েও মুখ্যমন্ত্রীয়ে অৱগত কৰে৷ অহা ৪৫ দিনৰ ভিতৰত বিধেয়কখন কাৰ্যকৰী কৰাৰ প্ৰক্ৰিয়া সন্দৰ্ভত বিতং প্ৰতিবেদন কমিটীয়ে দাখিল কৰিব।
উল্লেখ্য যে উত্তৰাখণ্ডত ২৭ জানুৱাৰীৰ পৰা ইউনিফৰ্ম চিভিল কোড কাৰ্যকৰী কৰা হৈছে। ইয়াৰ পূৰ্বে ৰাজ্য চৰকাৰে ৰঞ্জন প্ৰকাশৰ নেতৃত্বতে এখন কমিটী গঠন কৰি ইউ চি চি কাৰ্যকৰী কৰাৰ আইনী প্ৰক্ৰিয়াৰ ওপৰত পৰ্যালোচনা কৰিছিল। উক্ত সমিতিৰ প্ৰতিবেদনৰ ভিত্তিত বিধেয়কখনৰ খচৰা প্ৰস্তুত কৰা হয়। এইবাৰ গুজৰাটেও একে পথতে খোজ দিবলৈ ওলাইছে।
