বলিউডৰ অভিনেতা চৈফ আলী খানক (Saif Ali Khan) নিজৰ ঘৰতে ছুৰীকাঘাত। জানিব পৰা মতে, তেওঁক তীক্ষ্ণ অস্ত্ৰৰে আঘাত কৰা হৈছিল। আঘাতপ্ৰাপ্ত চৈফক চিকিৎসালয়ত ভৰ্তি কৰোৱা হৈছে।
আৰক্ষীয়ে জনোৱা অনুসৰি, বুধবাৰে নিশা প্ৰায় ২ বজাত এজন অচিনাক্ত দুৰ্বৃত্তই চৈফৰ ঘৰত প্ৰৱেশ কৰে। আৰক্ষীৰ অনুমান, দুৰ্বৃত্তৰ প্ৰৱেশ ডকাইতিৰ উদ্দেশ্য আছিল। আক্ৰমণকাৰীয়ে চৈফক ছুৰীৰে আঘাত কৰে। পিছত তেওঁক মুম্বাইৰ লীলাৱতী চিকিৎসালয়ত ভৰ্তি কৰোৱা হয়।
চৈফ মুম্বাইৰ বান্দ্ৰাৰ ‘সতগুৰু শৰণ বিল্ডিং’ নামৰ এটা এপাৰ্টমেণ্টত বাস কৰে। অভিনেতাগৰাকীৰ পত্নী তথা বলীউডৰ অভিনেত্ৰী কৰীণা কাপুৰো এই এপাৰ্টমেণ্টত বাস কৰে। চৈফে তেওঁৰ দুই সন্তান, আঠ বছৰীয়া টাইমুৰ আৰু চাৰি বছৰীয়া যিহোৱাৰ সৈতে বাস কৰে।
দুৰ্বৃত্তই ঘৰত প্ৰৱেশ কৰাৰ সময়ত অভিনেতাজন আৰু তেওঁৰ পৰিয়ালৰ সদস্যসকল শুই আছিল। শব্দ শুনি ঘৰৰ সকলোৱে সাৰ পায় আৰু দুৰ্বৃত্তই লগে লগে এপাৰ্টমেণ্টৰ পৰা পলাই যায়।
বান্দ্ৰা আৰক্ষীয়ে ঘটনাটোৰ তদন্ত আৰম্ভ কৰিছে। অভিযুক্তজনক গ্ৰেপ্তাৰ কৰাৰ চেষ্টা চলি আছে।
“চৈফ আলী খান লীলাৱতী চিকিৎসালয়ত চিকিৎসাধীন হৈ আছে। এইটো স্পষ্ট নহয় যে তেওঁক ছুৰীৰে আঘাত কৰা হৈছিল নে ডকাইতৰ সৈতে হোৱা হতাহতিত আঘাতপ্ৰাপ্ত হৈছিল।আমি বিষয়টো অনুসন্ধান কৰি আছো। গোচৰটো মুম্বাই অপৰাধ শাখাৰ দ্বাৰা তদন্ত কৰা হৈছে।” আৰক্ষীয়ে এক বিবৃতি জাৰি কৰি সংবাদ মাধ্যম আৰু অনুৰাগীসকলক শান্ত হৈ থাকিবলৈ আহ্বান জনায়। লগতে এইটোও কোৱা হৈছে যে বলিউডৰ নবাব কেনে আছে সময়ে সময়ে অৱগত কৰা হ’ব।
আনহাতে, লীলাৱতী চিকিৎসালয়ৰ অন্যতম শীৰ্ষ বিষয়া ডাঃ নীৰজ উট্টামণিয়ে কয় যে চৈফক পুৱা প্ৰায় ৩.৩০ বজাত চিকিৎসাৰ বাবে অনা হৈছিল। অভিনেতাজনৰ শৰীৰত ছয়টা আঘাত আছে। দুটা আঘাত গভীৰ। চৈফ মেৰুদণ্ডৰ ওচৰত আঘাতপ্ৰাপ্ত হোৱা বুলিও চিকিৎসালয় কৰ্তৃপক্ষই জনায়।
ইফালে চিকিৎসালয়ৰ শেহতীয়া সূত্ৰ অনুসৰি, অভিনেতাজনৰ বৃহস্পতিবাৰে অস্ত্ৰোপচাৰ চলি আছে।
তেওঁৰ বাবে বিশেষজ্ঞ চিকিৎসকৰ এটা দল গঠন কৰা হৈছে। নিউৰোচাৰ্জন নিতিন ডাংগে, প্ৰসাধন শল্য চিকিৎসক লীনা জৈন আৰু এনাষ্টেচিঅ’লজিষ্ট নিশা গান্ধী চৈফৰ অস্ত্ৰোপচাৰৰ দায়িত্বত আছে। চিকিৎসালয়ৰ মতে, অস্ত্ৰোপচাৰৰ পিছতহে জানিব পাৰিব যে আঘাত কিমান গভীৰ।
