আম আদমি পাৰ্টীৰ বিধায়ক (AAP MLA died) গুৰপ্ৰীত গোগী বছিৰ পঞ্জাবত ৰহস্যজনক মৃত্যু। ঘৰৰ ছুইমিং পুলৰ দাঁতিৰ পৰা উদ্ধাৰ হয় তেওঁৰ মৃতদেহ। আৰক্ষীৰ সূত্ৰ অনুসৰি, তেওঁৰ মূৰত গুলীৰ আঘাত আছিল। কিন্তু কেনেকৈ গুলী লাগিল সেয়া এতিয়াও স্পষ্ট হোৱা নাই। আৰক্ষীয়ে বিধায়কজনৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰিছে।
৫৮ বছৰীয়া গুৰপ্ৰীত পঞ্জাবৰ লুধিয়ানা পশ্চিম সমষ্টিৰ বিধায়ক আছিল। শুকুৰবাৰে নিশা ছুইমিং পুলৰ কাষত তেওঁৰ ৰক্তাক্ত দেহ উদ্ধাৰ কৰে পৰিয়ালৰ লোকে। নিশা ১২ মান বজাত তেওঁক উদ্ধাৰ কৰি দয়ানন্দ চিকিৎসা মহাবিদ্যালয় হাস্পতাললৈ লৈ যোৱা হয়। তাত থকা চিকিৎসকে তেওঁক মৃত ঘোষণা কৰে।
পঞ্জাব আপৰ সভাপতি চৰণপাল সিং মক্কাৰ আৰু আৰক্ষী আয়ুক্ত কুলদীপ সিং চাহালে গুৰপ্ৰীতৰ মৃত্যুৰ খবৰ নিশ্চিত কৰে। শুকুৰবাৰে নিশা গুৰপ্ৰীতে এক বৈঠকৰ পৰা উভতি অহাৰ কথা আৰক্ষীক জনায়। নিশাৰ আহাৰ গ্ৰহণৰ পিছত তেওঁ ছুইমিং পুললৈ গৈছিল।
কিন্তু হঠাতে বন্দুকৰ গুলীৰ শব্দ আহে। গুৰপ্ৰীতে আত্মহত্যা কৰিছিল নে ভুলবশতঃ তেওঁৰ হাতৰ পৰা গুলী নিক্ষেপ হৈছিল, বা ঘটনাৰ আঁৰত আন কিবা কাৰণ আছে নেকি সেয়া এতিয়াও স্পষ্ট হোৱা নাই। অৱশ্যে কোনো সম্ভাৱনাও নুই কৰা নাই আৰক্ষীয়ে।
উল্লেখ্য যে ২০২২ চনত আপত যোগদান কৰিছিল গুৰপ্ৰীতে।
বিধানসভা নিৰ্বাচনত তেওঁ লুধিয়ানা পশ্চিমৰ দুবাৰৰ বিধায়ক ভাৰত ভূষণ আশুক পৰাস্ত কৰে। তেওঁৰ পত্নীও ৰাজনীতিৰ লগত জড়িত। পৌৰসভাৰ নিৰ্বাচনতো তেওঁক আপে মনোনীত কৰিছিল। কিন্তু কংগ্ৰেছ প্ৰাৰ্থীৰ হাতত পৰাস্ত হয়। পৰিয়ালৰ সূত্ৰ অনুসৰি, শুকুৰবাৰে পুৱা গুৰপ্ৰীতে পঞ্জাব বিধানসভাৰ অধ্যক্ষক সাক্ষাৎ কৰে।
এজন সাংসদৰ সৈতেও তেওঁৰ বৈঠক আছিল। সেইদিনা তেওঁ লুধিয়ানাৰ প্ৰাচীন শীতলা মাতা মন্দিৰলৈ যায়। দুদিন পূৰ্বে উক্ত মন্দিৰটোৰ পৰা ৰূপৰ গহনা চুৰি হৈছিল। তেওঁ ভক্তসকলক আশ্বাস দিয়ে যে চোৰক ধৰি শাস্তি প্ৰদান কৰা হ’ব। তাৰ পিছতে এই মৃত্যুৰ ঘটনা। আৰক্ষীয়ে এই ঘটনাৰ তদন্ত আৰম্ভ কৰিছে।
