কৰ্ণাটকৰ মন্ত্ৰী সতীশ জাৰ্কিহোলিৰ ২১টা ঠিকনাত তালাচী চলাইছে বলবৎকাৰী সঞ্চালকালয় চমুকৈ ইডিয়ে। কেৱল মন্ত্ৰীগৰাকীৰ বাসগৃহতে নহয়, তেওঁৰ কেইবাজনো আত্মীয়ৰ বাসগৃহতো তালাচী চলোৱা হয়। সূত্ৰ অনুসৰি, এই তালাচী অভিযানত উদ্ধাৰ হৈছে ৩.৩০ কোটি টকা। কেন্দ্ৰীয় তদন্তকাৰী সংস্থাটোৱে কেইবাটাও গুৰুত্বপূৰ্ণ নথিও উদ্ধাৰ কৰে। অৱশ্যে দুৰ্নীতিৰ অভিযোগ অস্বীকাৰ কৰিছে মন্ত্ৰীগৰাকীয়ে। আনহাতে, মুখ্যমন্ত্রী ডি কে শিৱকুমাৰে এই অনুসন্ধান অভিযান ‘ৰাজনৈতিক উদ্দেশ্যপ্ৰণোদিত’ বুলি দাবী কৰিছে৷
সূত্ৰ অনুসৰি, যোৱা ৯ আৰু ১০ ছেপ্টেম্বৰত বেংগালুৰু, বেলাগাভী, গোকাক আৰু কলকাতাত বিদেশী মুদ্ৰা ব্যৱস্থাপনা আইনৰ (ফেমা) অধীনত এই তালাচী অভিযান চলাইছিল। ইডিৰ সূত্ৰ অনুসৰি, এই অভিযানত আমেৰিকান ডলাৰ আৰু ইউৰো উদ্ধাৰ কৰা হৈছে। যাৰ মূল্য ভাৰতীয় মুদ্ৰাত ১৫ লাখ টকা। সূত্ৰটোৱে দাবী কৰা মতে, কেইবাটাও ডিজিটেল ডিভাইচ আৰু নথি-পত্ৰও উদ্ধাৰ কৰা হৈছে। জব্দ কৰা যন্ত্ৰ আৰু নথি-পত্ৰৰ পৰা ৰাজহুৱা কাম-কাজ বিভাগত দুৰ্নীতি সংঘটিত হোৱাৰ ইংগিত পোৱা গৈছে। ঠিকাদাৰৰ পৰা উৎকোচ লোৱা হৈছে।
মন্ত্ৰীগৰাকীৰ বাসগৃহৰ উপৰি তেওঁৰ কন্যা তথা চিক্কোৰীৰ সাংসদ প্ৰিয়ংকা জাৰ্কিহোলী, পুত্ৰ ৰাহুল, ভাতৃ ৱাই ডি মঞ্জুনাথ, মন্ত্ৰীগৰাকীৰ অ’ এছ ডি আৰু ব্যক্তিগত সহায়ক মালাগৌদা পাটিল, তেওঁৰ সহযোগী ৰাজু দৰগছেট্টী, বিটল প্ৰসন্নৱৰ আৰু গিৰীশ সোণোৱালকাৰৰ ঠিকনাতো তালাচী চলোৱা হয়।
