ASSAM TIMES POST
বিশেষ প্ৰতিবেদন
সতীৰ্থৰ সৈতে পত্নীৰ সম্পৰ্কৰ ফলত ভাঙি গৈছিল ক্ৰিকেটাৰ দীনেশ কাৰ্তিকৰ সংসাৰ৷ বিচ্ছেদৰ কেইবা মাহ পিছত আন এজন ক্ৰিকেটাৰ মূৰলী বিজয়ক বিয়া কৰাইছিল দীনেশৰ পত্নী নিকিতাই৷ ত্ৰিকোণ সম্পৰ্কৰ এই জটিলতাক লৈ তেতিয়া বিশেষ মুখৰোচক বাতৰিও প্ৰকাশ হৈছিল৷
দীনেশ কাৰ্তিক আৰু নিকিতা বানজাৰা আছিল সৰুকালিৰ বন্ধু৷ কেৱল সেয়াই নহয়, তেওঁলোকৰ পিতৃ-মাতৃৰ মাজতো আছিল ঘনিষ্ঠ বন্ধুত্ব৷ ক’বলৈ গ’লে তেওঁলোক আছিল পাৰিবাৰিক বন্ধু৷ দীনেশ-নিকিতাৰ বিয়া হৈছিল ২০০৭ চনত৷ উইকেটকীপাৰ-বেটছমেন ২১ বছৰীয়া কাৰ্তিক আছিল তেতিয়া ভাৰতীয় দলৰ নিয়মিত সদস্য৷ মুম্বাইৰ এক নামী হোটেলত তেওঁলোকৰ সম্পৰ্কত ফাঁট মেলা আৰম্ভ হয়৷
নিকিতাৰ শৈশৱ অতিবাহিত হৈছিল কুৱেটত৷ কমাৰ্চৰ স্নাতক নিকিতাই লাহে লাহে পৰিচিত হয় ভাৰতীয় ক্ৰিকেট-বৃত্তৰ লগত৷ তেতিয়া ক্ৰমাৎ তাৰকাৰ সৈতে অভ্যস্ত হ’বলৈ ধৰিছিল৷ কেইবছৰমান পিছত তেওঁৰ পৰিচয় ঘটে মূৰলী বিজয়ৰ সৈতে৷ কিন্তু সেইটো যে সাধাৰণ পৰিচয় নাছিল সেইটো জানিবলৈ অনেক সময় লাগে কাৰ্তিকৰ৷
তামিলনাডুৰ বাঁওহতীয়া বেটছমেন মূৰলী বিজয়ো তেতিয়া ভাৰতীয় দলৰ নিয়মিত সদস্য৷ ৰাষ্ট্ৰীয় দলৰ উপৰি ঘৰুৱা ক্ৰিকেটতো তেওঁ কাৰ্তিকৰ সতীৰ্থ৷ দুয়োজনেই তামিলনাডুৰ৷ ইয়াৰ উপৰি আইপিএলতো তেওঁলোকৰ একেখনেই ঘৰুৱা খেলপথাৰ৷ বিশেষ বন্ধুত্ব নাথাকিলেও শত্ৰুতাও নাছিল দুয়োৰে মাজত৷ কিন্তু কোনে জানিছিল যে এদিন এই দুই ক্ৰিকেটাৰে এক অদ্ভূত জটিলতাৰ সন্মুখীন হ’ব৷
পাৰিবাৰিক জীৱনৰ এই বিতৰ্কিত অধ্যায়ক লৈ অৱশ্যে মুখ খোলা নাই দীনেশ কাৰ্তিক বা মূৰলী বিজয় কোনোৱেও৷ সংবাদ মাধ্যমত প্ৰকাশিত এক বাতৰি অনুযায়ী, এখন গুৰুত্বপূৰ্ণ ৰঞ্জী মেচৰ পূৰ্বে কাৰ্তিকে জানিবলৈ পাৰে মূৰলী-নিকিতাৰ সম্পৰ্কৰ কথা৷
পাৰিবাৰিক জীৱনত ভূমিকম্প আহিলেও বাহিৰৰ জীৱনত তাৰ কঁপনি অনুভৱ হ’বলৈ নিদিলে কাৰ্তিকে৷ ২০১২ চনত তেওঁৰ নিকিতাৰ সৈতে বিবাহ বিচ্ছেদ ঘটে৷ কোনো অভিযোগ-প্ৰতি অভিযোগলৈ ন’গৈ পাৰস্পৰিক বুজাবুজিৰে বিবা হবিচ্ছেদৰ পথ বাচি লয় তেওঁলোকে৷ জানিব পৰা মতে সেই সময়ত অন্তঃসত্তা আছিল নিকিতা৷
কাৰ্তিক-নিকিতাৰ বিবাহ বিচ্ছেদক লৈ পিছে সেই সময়ত সংবাদ মাধ্যমে সিমান মূৰ ঘমোৱা নাছিল৷ কিন্তু ঘটনাই নাটকীয় মোৰ লয় সেই সময়ত, যেতিয়া বিচ্ছেদৰ কেইমাহমান পিছত নিকিতাই বিয়া কৰায় মূৰলী বিজয়ক৷ জানিব পৰামতে, কোনো এক আইপিএল ছিজনৰ সময়ত মূৰলী-নিকিতা ৰকথা-বাৰ্তা চলিছিল৷ কিন্তু কিমান বছৰ দীনেশ কাৰ্তিকসহ সকলোৰে পৰা তেওঁলোকৰ সম্পৰ্ক গোপনে ৰাখিছিল, সেই বিষয়ে দুয়োজনৰে মুখ অদ্যপি বন্ধ৷
২০১২ চনত জন্ম হয় নিকিতাৰ প্ৰথম সন্তানৰ৷ সন্তানৰ নাম ৰখা হয় নীৰৱ৷ ইয়াৰ পিছত আৰু এটি পুত্ৰ আৰু কন্যা সন্তানৰ মাতৃ হয় নিকিতা৷ তিনি সন্তানক লৈ মূৰলী-নিকিতাৰ সংসাৰ এতিয়া ভৰপূৰ৷
স্বামীৰ মেচ উপভোগ কৰিবলৈ প্ৰায়েই ষ্টেডিয়ামলৈ যায় নিকিতা৷ ক্ৰিকেটাৰৰ পত্নীৰ উপৰি তেওঁৰ আন এক পৰিচয় আছে৷ তেওঁ এগৰাকী শিল্পী৷ মুম্বাইৰ এক থ্ৰি-ডি কাষ্টিং সংস্থাত কৰ্মৰত নিকিতা৷ চলমান খান আৰু চকলেটৰ ভক্ত নিকিতা৷
বিচ্ছেদৰ পিছত দীনেশ কাৰ্তিকো বেছিদিন অকলে নাথাকে৷ ২০১৩ চনত তেওঁ বিয়া কৰায় তাৰকা স্কোৱাছ খেলুৱৈ দীপিকা পাল্লিকলক৷ হিন্দু আৰু খ্ৰীষ্টান দুয়োটা ধৰ্মীয় ৰীতি মতেই বিয়া হয় তেওঁলোকৰ৷ এতিয়া দীপিকাৰ খেলৰ অন্যতম অনুৰাগী কাৰ্তিক৷
নিকিতা আৰু দীপিকা দুয়োগৰাকী নিজৰ কেৰিয়াৰত উজ্জ্বল হ’লেও দুয়োগৰাকীৰ স্বামীয়েই বৰ্তমান ৰাষ্ট্ৰীয় দলৰ নিয়মীয়া সদস্য নহয়৷ দীনেশ কাৰ্তিকে শেষ টেষ্টত অংশগ্ৰহণ কৰিছিল ১৯১৮ৰ আগষ্টত ইংলেণ্ডৰ বিপক্ষে৷ মূৰলী বিজয়ৰ শেষ টেষ্ট আছিল সেই বছৰৰে ডিচেম্বৰত অষ্ট্ৰেলিয়াৰ বিপক্ষে৷
আইপিএলত দুয়োজনেই খেলিছে বিভিন্ন দলৰ হৈ৷ মূৰলী বিজয়ে আইপিএলৰ কেৰিয়াৰ আৰম্ভ কৰিছিল চেন্নাই ছুপাৰ কিংছৰ হৈ৷ ২০০৯ৰ পৰা ২০১৩লৈ পাঁচ বছৰ ত্ৰমাগতভাৱে তেওঁ চেন্নাইৰ হৈ আইপিএল খেলে৷ ইয়াৰ পিছত দিল্লী আৰু পঞ্জাবৰ হৈ খেলাৰ পিছত পুনৰ তেওঁ ২০১৯ত চেন্নাই দললৈ উভতি আহে৷
দীনেশ কাৰ্তিকে আইপিএলৰ কেৰিয়াৰ আৰম্ভ কৰে দিল্লী ডেয়াৰ ডেভিলছৰ হৈ৷ তাৰ পিছত বিভিন্ন ছিজনত মুম্বাই, ডেক্কান চাৰ্জাৰ্ছ, পঞ্জাব, গুজৰাট লায়ন্স, ৰয়েল চেলেঞ্জাৰত খেলে তেওঁ৷ ২০১৮ৰ পৰা তেওঁ গৌতম গম্ভীৰৰ পৰিৱৰ্তে কলকাতা নাইট ৰাইডাৰ্ছৰ অধিনায়ক৷
(ফটোঃ ফেচবুক)
