ASSAM TIMES POST
ডিফু : বকলীয়াঘাটৰ লাংমিলিত পুতি ৰখা অৱস্থাত কোটি কোটিৰ সাৰ আৰু কীটনাশক উদ্ধাৰ হোৱা ঘটনাই সাধাৰণ জনতাৰ লগতে দৰিদ্ৰ কৃষক সকলক উদ্বিগ্ন কৰি তুলিছে৷ অসমৰ সাধাৰণ কৃষকে খেতিৰ বাবে অকণমান সাৰ আৰু কীট নাশকৰ বাবে হাহাকাৰ কৰি থাকিবলগীয়া সময়তে বকলীয়াঘাটৰ লাংমিলিৰ চৰকাৰী কৃষিপাম চৌহদত কোটি কোটি টকাৰ সাৰ আৰু কীট নাশক উজ্ধাৰ হোৱা ঘটনাত চাঞ্চল্যৰ সৃষ্টি হৈছে ৷
ৰাজ্যিক কৃষিমন্ত্ৰী গৰাকীয়ে ৰাজ্যত ‘কা’ বিৰোধী আন্দোলনৰ ৰাইজৰ প্ৰত্যাশাক নেওচি গাদী বচোৱাৰ মাজতে বিভাগটোত সাৰ আৰু কীটনাশক যোগানৰ নামত এক বৃহৎ দূৰ্নীতি সংঘটিত হোৱাৰ আশংকা ঘনীভূত হৈছে ৷ উল্লেখযোগ্যযে এক গোপন সূত্ৰৰ পম খেদি কাৰবি আংলং জিলাৰ একাংশ সামাজিক সংগঠন আৰু সাংবাদিকৰ এটা দলে আজি অকস্মাতে কৃষি বিভাগৰ লুম্বাজং কৃষিৰ চক্ৰৰ লাংমিলি কৃষি পামত অভিযান চলাই ক্ষেত্ৰভিত্তিক অভিযানকালত পামখনৰ চৌহদৰ ভিতৰত মাটিৰ ভিতৰত পুতি থোৱা অৱস্থাত কেইবাকোটি টকাৰ মূল্যৰ বুজন পৰিমানৰ সাৰ আৰু কীট নাশক দ্ৰব্য উদ্ধাৰ কৰা হয় ৷ উদ্ধাৰ হোৱা সামগ্ৰীখিনিৰ পৰিমাণ প্ৰায় দুই-তিনি ট্ৰাক হোৱাৰ লগতে ইয়াৰ মূল্য কেইবা কোটি টকা হব বুলি বিভিন্নজনে দাবী কৰিছে ৷
প্ৰাপ্ত তথ্য অনুসৰি বিগত কেইদিনমান পূৰ্বে চৰকাৰী কৃষি পামখনত এক বৃহৎ গাঁত খান্দি প্ৰায় দুই ট্ৰাক পৰিমাণৰ পাৰচিলো ৫০ আৰু মেনকোফৰ্ট কীটনাশক আৰু সাৰ পুতি থৈছিল ৷ আজি দুপৰীয়া উক্ত গাঁত সমূহ খান্দি পেলোৱাৰ ফলত গাঁতত টিন আৰু বস্তাত ভৰাই ৰখা সাৰ আৰু কীট নাশকখিনি উদ্ধাৰ হয় ৷ সাধাৰণ কৃষকে খেতিৰ সাৰৰ বাবে হাহাকাৰ কৰি থকাৰ সময়ত কি পৰিস্থিত্ত পৰি বিভাগটোৰ এই বৃহৎ পৰিমাণৰ সাৰ পুতি থব লগা হ’ল সেয়া অদ্যপি জানিব পৰা হোৱা নাই ৷ এই ক্ষেত্ৰত এক উচ্চ পৰ্যায়ৰ তদন্ত হলে বৃহৎ পৰিমাণৰ সাৰ আৰু কীটনাশকৰ দূৰ্নীতিৰ কথা পোহৰলৈ আহিব আৰু দোষীয়ে উচিৎ শাস্তি পাব বুলি সচেতন মহলে মন্তব্য কৰে ৷
