ASSAM TIMES POST
স্পৰ্টছ ডেস্ক
নিউজীলেণ্ড ভ্ৰমণৰত ভাৰতীয় ক্ৰিকেট দলে চলিত পাঁচখনীয়া টি-২০ শংখলাৰ অকলেণ্ডত অনুষ্ঠিত প্ৰথমখন মেচত ঘৰুৱা দলটোক ৬ উইকেটত পৰাস্ত কৰে।
জয়ৰ বাবে ২০৪ ৰাণৰ লক্ষ্য সন্মুখত লৈ ক্ৰিজত নমা ভাৰতীয় দলে ৬টা বল বাকী থকা অৱস্থাত প্ৰয়োজনীয় ৰাণ সংগ্ৰহ কৰি শৃংখলাত ১-০ৰ অগ্ৰগতি লাভ কৰে।
উল্লেখ্য যে অকলেণ্ডৰ ইডেন পার্কত বিশাল ছয় কোবাই কিৱি বাহিনীৰ হাতৰ পৰা বিজয় কাঢ়ি আনে শ্রেয়াছ আয়াৰে।
প্ৰথমে বেটিং কৰি কলিন মনৰো, কেন উইলিয়ামছন আৰু ৰছ টেইলৰৰ মাৰমুখী বেটিঙেৰে ৰাণৰ পাহাৰ গঢ়িছিল নিউজীলেণ্ডে। ২০ অ’ভাৰত কিৱি বাহিনীয়ে সংগ্ৰহ কৰিছিল পাঁচ উইকেটত ২০৩ ৰাণ। টি-২০ ক্রিকেটত এই ৰাণ যথেষ্ট। তাৰ উপৰি বিদেশৰ মাটিত গৈ ২০০ৰ অধিক ৰাণ কৰাটো কঠিন বুলিয়েই ভবা হয়।
জয়ৰ লক্ষ্য আগত ৰাখি ক্ৰিজত নমা ভাৰতীয় দলে ছন্দত থকা ৰোহিত শর্মাক ৭ ৰাণতেই হেৰুৱাবলগা হয়। ছেণ্টনাৰৰ বল সঠিকভাৱে টাইমিং কৰিব নোৱাৰিলে ৰোহিত শৰ্মাই। টেইলৰক সহজ কেছ দি পেভিলিয়নমুখী হয় ৰোহিত।
ৰোহিতৰ প্ৰস্থানৰ পিছত লোকেশ ৰাহুল আৰু বিৰাট কোহলিয়ে দলৰ স্কৰ আগবঢ়াই নিয়াৰ নেতৃত্ব লয়। দ্বিতীয় উইকেটত দুয়ো যোগ কৰে ৯৯ ৰাণ। ৬ মাৰি পঞ্চাছৰ ঘৰত প্ৰৱেশ কৰে ৰাহুল। এই অৰ্ধশতক আহে মাত্র ২৩টা বলত। কিন্তু তাৰ পিছতেই তেওঁও উভতিবলগা হয় পেভিলিয়নলৈ। ঈশ সোধিক ৬ মাৰিবলৈ গৈ কেছ আউট হয়। তেওঁৰ ২৭ বলত ৫৬ ৰাণৰ ইনিংছটোত আছিল চাৰিটা ৪ আৰু তিনিটা ৬।
ৰাহুল আউট হোৱাৰ কিছু সময় পিছতেই কোহালিও আউট হয় ৩২ বলত ৪৫ ৰাণ কৰি। অৱশ্যে বলাৰ ব্লেয়াৰ টিকনাৰ নহয়, তেওঁক আউট কৰাৰ সম্পূৰ্ণ কৃতিত্ব মার্টিন গুপ্টিলৰ। বাউণ্ডেৰী লাইনৰ পৰা দৌৰি আহি এক অবিশ্বাস্য কেছ ধৰি কোহলিক বিদায় দিয়ে তেওঁ।
বিৰাটৰ আউটৰ পিছত শিৱম ডুবেই বেছি সময় উইকেটত টিকিব নোৱাৰে। ৯ বলত ১৩ ৰাণ কৰি চেওঁ আউট হয়। চতুৰ্থ উইকেট পতন ঘটাৰ সময়ত ভাৰতৰ স্কৰ আছিল ১৪২ ৰাণ।
তাৰ পিছতেই যুটি বান্ধে শ্রেয়াছ আয়াৰ আৰু মণীষ পাণ্ডেই। দুয়ো ৩৪ বলত যোগ কৰে ৬২ ৰান। ২৬ বলত পঞ্চাশত উপনীত হয় শ্রেয়াছ। শেষ পর্যন্ত ২৯ বলত তেওঁ ৫৮ ৰাণ কৰি অপৰাজিত হৈ থাকে। য’ত আছিল পাঁচটা ৪ আৰু তিনিটা ৬। মণীষ অপৰাজিত থাকে ১২ বলত ১৪ ৰাণত।
উল্লেখ্য যে টছত হাৰি বেটিং কৰিবলৈ নমা নিউজীলেণ্ডে দুই অপেনাৰ মার্টিন গুপ্টিল আৰু কলিন মনৰোৰ মাৰমুখী বেটিঙেৰে ইনিংছ আৰম্ভণি কৰিছিল। দুয়ো ২৭ বলতে দলীয় স্কৰ ৫০ত উপনীত কৰিছিল। পাৱাৰপ্লেৰ ৬ অভাৰত বিনা উইকেটে স্কৰ বোৰ্ড হৈছিল ৬৮।
নিউজীলেণ্ডৰ ইনিংছত প্রথম আঘাত হানিছিল অলৰাউণ্ডাৰ শিৱম ডুবেই। তেওঁৰ প্রথম অভাৰত পেভিলয়নমুখী হৈছিল গুপ্টিল (১৯ বলত ৩০)। ছয় কোবাবলৈ গৈ ডিপ মিড উইকেটত ৰিলে কেছ লৈ তেওঁক ঘূৰাই পঠায় ৰোহিত শর্মাই। প্রথম উইকেটত ৮০ ৰাণ যোগ কৰিছিল নিউজীলেণ্ডে।
দ্বিতীয় উইকেটত মনৰোৰ সৈতে অধিনায়ক কেন উইলিয়ামছনে যোগ দিয়ে ৩৬ ৰাণ। ছার্দুল ঠাকুৰৰ দ্বিতীয় স্পেলত যজুবেন্দ্র চহলক কেছ দি উভতে তেওঁ। ৪২ বলত তেওঁৰ ৫৯ ৰাণ ইনিংছটোত আছিল ছয়টা ৪ আৰু দুটা ৬। ১১৬ ৰাণত দ্বিতীয় উইকেটৰ পতন ঘটে কিৱি বাহিনীৰ। তৃতীয় উইকেট পতন ঘটে ১১৭ ৰাণত। ৰবীন্দ্র জাদেজাৰ প্রথম অভাৰত উভতি যায় কলিন ডি গ্ৰেণ্ডহোমি (০)।
চাৰি কোৱাই অৰ্শতকত উপনীত হ’বলৈ উইলিয়ামছনক লাগে ২৫ বল। তাৰ পিছতেই তেওঁ ২৬ বলত ৫১ ৰাণত আউট হয়। তেওঁৰ ইনিংছত আছিল চাৰিটা ৪ আৰু চাৰিটা ৬। ১৭৮ বলত পতন ঘটে চতুর্থ উইকেটৰ। পঞ্চম উইকেট পৰে ১৮১ ৰাণত। শেষৰ ফালে টেইলৰে ২৭ বলত বিধ্বংসী মেজাজত ৫৪ ৰাণ কৰে।
উল্লেখ্য যে এই বছৰতেই অষ্ট্ৰেলিয়াত টি-২০ বিশ্বকাপ। তাৰ প্ৰতি লক্ষ্য ৰাখিয়েই বছৰৰ আৰম্ভণিতে নিউজীলেণ্ডৰ বিৰুদ্ধে পাঁচ মেচৰ টি-২০ শৃংখলা খেলিছে ভাৰতে।
