মহাৰাষ্ট্ৰৰ গণ্ডিয়া জিলাত শুকুৰবাৰে সংঘটিত হয় এক শোকাৱহ পথ দুৰ্ঘটনা (Maharastra Accident)। দিনৰ প্ৰায় ১২-১২.৩০ বজাত অৰ্জুনী তালুকৰ খাজৰী গাঁৱৰ ওচৰত নাগপুৰৰ পৰা গণ্ডিয়া অভিমুখী বাছখন পথৰ ওপৰতে লুটি খায় পৰে। বাছখন মহাৰাষ্ট্ৰ ৰাজ্যিক পথ পৰিবহণ নিগমৰ অধিনস্থ শিৱশাহী বাছ।
এই দুৰ্ঘটনাত কমেও ১১ গৰাকী লোক নিহত হয়। ইয়াৰ উপৰি আন ২৬ গৰাকী আহত হয় হোৱা বুলি আৰক্ষী সূত্ৰত প্ৰকাশ। আহতসকলক গণ্ডিয়া জিলা চিকিৎসালয়ত ভৰ্তি কৰোৱা হৈছে। মৃত্যুৰ সংখ্যা বৃদ্ধি হোৱাৰ সম্ভাৱনা আছে। আৰক্ষীয়ে জনোৱা মতে, বাছখনত ৩০ গৰাকীৰো অধিক যাত্ৰী আছিল।
ইফালে মুখ্যমন্ত্ৰীৰ কাৰ্যালয়ে জনোৱা মতে, মহাৰাষ্ট্ৰৰ অন্তৱৰ্তীকালীন মুখ্যমন্ত্ৰী একনাথ সিন্দেয়ে নিহতসকলৰ পৰিয়ালক ১০ লাখ টকাৰ সাহায্য প্ৰদানৰ নিৰ্দেশ দিছে। চৰকাৰী সূত্ৰ মতে, নিহত নজনৰ পৰিচয় জানিব পৰা গৈছে।
তেওঁলোক হৈছে স্মিতা সূৰ্যবংশী (৩২), মগলা লাঞ্জেৱাৰ (৬০), ৰাজেশ লাঞ্জেৱাৰ, কল্পনা ৱাংখেড়ে (৬৫), ৰামচন্দ্ৰ কানোজে (৬৫), আৰিফ চয়ীদ (৪২), অজহাৰ আলী চয়ীদ (৫৫) আৰু নয়না বিশাল মিটকাটি (৩৫)। উল্লেখ্য যে দুৰ্ঘটনাটো সংঘটিত হোৱাৰ পিছতে বাছ চালকজনে ঘটনাস্থলীৰ পৰা পলায়ন কৰে।
আনহাতে, দুৰ্ঘটনাটোত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে।
প্ৰধানমন্ত্ৰীৰ কাৰ্যালয়ে প্ৰধানমন্ত্ৰীৰ উদ্ধৃতি দি এক্সৰ পোষ্টত ৱিখিছে, “মহাৰাষ্ট্ৰৰ গণ্ডিয়াত সংঘটিত বাছ দুৰ্ঘটনাত প্ৰাণ হেৰুওৱাসকলৰ বাবে দুখিত। প্ৰিয়জনক হেৰুওৱাসকলৰ প্ৰতি সমবেদনা জনাইছোঁ। আঘাতপ্ৰাপ্তসকলৰ আশু আৰোগ্য কামনা কৰিছোঁ। প্ৰতিগৰাকী মৃতকৰ নিকটাত্মীয়ক ২ লাখ টকা আৰু আহতসকলক ৫০ হাজাৰ টকাকৈ প্ৰধানমন্ত্ৰী সাহায্য পুঁজিৰ পৰা অনুদান প্ৰদান কৰা হ’ব।”
