প্ৰদূষণৰ সমান্তৰালকৈ দিল্লীত এইবাৰ শীতেও (Winter in Delhi) আমনি কৰিবলৈ আৰম্ভ কৰিছে। বৃহস্পতিবাৰে ৰাজধানী চহৰখনৰ তাপমাত্ৰা ১০ ডিগ্ৰী চেলছিয়াছত (10 degrees Celsius) উপনীত হয়। অৱশ্যে শুকুৰবাৰে তাপমাত্ৰা আৰু অধিক হ্ৰাস পাব পাৰে বুলি বতৰ বিজ্ঞান কেন্দ্ৰই ভৱিষ্যদ্বাণী কৰিছে। ইয়াৰ পিছত পুনৰ ১-২ ডিগ্ৰী বৃদ্ধি পাব পাৰে। প্ৰদূষণৰ পৰিস্থিতিৰ দৰেই বিগত কিছুদিন ধৰি উষ্ণতাৰ উঠা-নমা চলি আছে। বতৰ বিভাগৰ তথ্য অনুসৰি, বৃহস্পতিবাৰটো আছিল ৰাজধানীত এই ঋতুৰ আটাইতকৈ ঠাণ্ডা নিশা।
কিন্তু ৰাজধানীত প্ৰদূষণৰ ছবিখনৰ বিশেষ পৰিৱৰ্তন হোৱা নাই। একেৰাহে ৫ দিন ধৰি প্ৰদূষণৰ পৰিস্থিতি ‘অতি শোচনীয়’ স্তৰত আছে। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ তথ্য অনুসৰি, শুকুৰবাৰে পুৱা ৰাজধানীৰ বায়ুৰ গুণাগুণ সূচকাংক (এ কিউ আই) ৩৩২। বিগত কেইদিনমানৰ পৰা ৰাজধানীৰ কেইবাটাও অঞ্চলৰ প্ৰদূষণৰ পৰিস্থিতি (Pollution conditions)ৰ বিশেষ উন্নতি হোৱা নাই। বিশেষকৈ আনন্দ বিহাৰ, অশোক বিহাৰ, বিমানবন্দৰ এলেকা, জাহাংগীৰপুৰীত প্ৰদূষণৰ মাত্ৰা ‘অতি শোচনীয়’ স্তৰত আছে।
পৰিৱেশবিদসকলৰ মতে, বায়ুৰ গুণমান সূচকাংক পুৱা ‘শোচনীয়’ আৰু ‘অতি শোচনীয়’ স্তৰৰ মাজত থাকিলেও কিন্তু সন্ধিয়ালৈকে সূচকাংক কেতিয়াবা কিছুমান অঞ্চলত ‘শোচনীয়’ৰ পৰা ‘অতি শোচনীয়’ স্তৰত উপনীত হয়। ইয়াৰ লগে লগে দৃশ্যমানতাও তললৈ নামি আহিছে। ক’ৰবাত ৫০০ মিটাৰৰ তললৈও নামি আহিছে।
