অসম বিশ্ববিদ্যালয় ডিফু চৌহদ (Assam University Diphu Campus)ত ছাত্র একতা সভাই ৫টা মূল বিষয় লৈ বিগত চাৰিদিন ধৰি তলা বন্ধ কৰি থকা আন্দোলন আজিৰে পৰা সাময়িকভাবে উঠাই লয়। জিলা আয়ুক্ত নিৰলা ফাংচ’পী আৰু আৰক্ষী অধীক্ষক সঞ্জীৱ কুমাৰ শইকীয়া আজি ডিফু চৌহদত উপস্থিত হৈ ছাত্র একতা সভাৰ নেতৃত্বৰ সৈতে এক আলোচনাত মিলিত হোৱাৰ পাছতেই ছাত্র একতা সভাই সাময়িকভাবে আন্দোলন স্থগিত ৰখাৰ কথা ঘোষণা কৰে।
উল্লেখ্য যে ছাত্র একতা সভাৰ নেতৃত্বত হোৱা আন্দোলনত ছাত্র একতা সভাই ২০২৪-২৫ বৰ্ষৰ বাবে খালী থকা আসনসমূহত ছাত্র-ছাত্রীৰ নাম ভর্তিকৰণ, বিশ্ববিদ্যালয়খনত অধ্যয়নবত ছাত্র-ছাত্রীসকলৰ বাবে পর্যাপ্ত বাছ সেৱা যোগান ধৰা, বিশ্ববিদ্যালয় চৌহদত এখন খেলপথাৰ নির্মাণ কৰা, ছাত্র আৰু ছাত্রী নিবাস শীঘ্রে নির্মাণ সম্পূর্ণ কৰা, ছাত্র- ছাত্রী অনুপাতে নথকা অধ্যাপকৰ পদ পূৰণ কৰা আদি দাবীত আন্দোলনৰ কাৰ্যসূচী গ্রহণ কৰিছিল। আজি জিলা আয়ুক্ত নিৰলা ফাংচ’পীয়ে চৌহদত উপস্থিত হৈ সংবাদমাধ্যমৰ আগত কয় যে ছাত্র-ছাত্রীৰ ধর্ণা সন্দৰ্ভত চৌহদৰ সম-উপাচার্যগৰাকী আমাৰ কার্যালয়লৈ আহিছিল আৰু এই সন্দর্ভত বিতং তথ্য দাখিল কৰিছিল।
আজি ইয়াত উপস্থিত হৈ মই ছাত্র-ছাত্রীব সৈতে মতবিনিময় কৰি তেওঁলোকৰ দাবীসমূহ সত্য বুলি প্রতিপন্ন হৈছো। এই গোটেই দাবী পূৰণ কৰিবলৈ কিছু সময়ৰ আৱশ্যক হ’ব। তথাপি খেলপথাৰ, ছাত্র-ছাত্রী আৱাস আদি বিষয়সমূহ শীঘ্রে সমাধান কৰা হ’ব। এসপ্তাহৰ ভিতৰত খেলপথাৰ নির্মাণৰ কাম আৰম্ভ হ’ব বুলিও আয়ুক্তগৰাকীয়ে সদবি কৰে।
অধ্যাপকৰ আসন পূৰণ সম্পৰ্কত চৰকাৰক বিষয়টো দৃষ্টি গোচৰ কৰোৱা হ’ব বুলিও আয়ুক্তগৰাকীয়ে কয়। ছাত্র সংগঠনটোৰ নেতৃবর্গই সংবাদমাধ্যমৰ আগত জিলা আযুক্তৰ প্রতিশ্রুতি অনুযায়ী এই আন্দোলন সাময়িকভাবে প্রত্যাহাৰ কৰা হৈছে বুলি উল্লেখ কৰি আজিৰে পৰা ডিফু চৌহদৰ তলা মুক্ত কৰা হ’ল বুলি ঘোষণা কৰাৰ লগতে দাবীসমূহ পূৰণ নহ’লে পুনৰ আন্দোলনৰ কাৰ্যসূচী গ্রহণ কৰিব বুলি হুংকাৰ দিয়ে৷
