ষ্টাফ ৰিপ’ৰ্টাৰ,ডিফু: আজিৰ পৰা ডিফুৰ আৰবৰেটামত অনুষ্ঠিত হৈছে ভাৰতীয় সংবিধানত ষষ্ঠ অনুসুচীৰ অন্তৰ্ভুক্তিৰ ৭৫ বছৰ হোবা উপলক্ষে এখন ৰাষ্ট্ৰীয় পৰ্য্যায়ৰ আলোচনা চক্ৰ ৷ ১৯৫২ চনত ভাৰতীয় সংবিধানৰ ষষ্ঠ অনুসুচীৰ অধীনত গঠন হৈছিল কাৰবি আংলং আৰু ডিমা হাছাও স্বায়ত্ত্বশাসিত পৰিষদ ৷ বৰ্তমান অসমত ষষ্ঠ অনুসুচীৰ অন্তৰ্গত তিনিখন পৰিষদ আছে ৷ এই তিনিখন পৰিষদ কাৰবি আংলং , ডিমা হাছাও আৰু বড়োলেণ্ড টেৰিটৰিয়েল কাউঞ্চিলে দীৰ্ঘদিনৰ পৰা ষষ্ঠ অনুসুচীৰ ক্ষমতা পৰ্য্যাপ্ত নহয় বুলি পৃথক ৰাজ্যৰ দাবী জনায় আহিছে ৷
কিন্তু ২০১৯ চনত কেন্দ্ৰীয় চৰকাৰে কেন্দ্ৰীয় শাসিত এলেকাৰ মৰ্য্যদা প্ৰদান কৰা লাডাখৰ লাডাখী নেতা সোনম ৱাংচুকে লাডাখক ষষ্ঠ অনুসুচীৰ পৰিষদ দিবলৈ দাবী কৰি আহিছে ৷ অসম বিশ্ববিদ্যালয়ৰ ডিফু চৌহদৰ প্ৰতি উপাৰ্চায্য শিৱাশীষ বিশ্বাস আৰু শিলঙৰ নেহু বিশ্ববিদ্যালয়ৰ অধ্যাপক ভোলি ধনৰাজুৱে কাৰবি আংলং স্বায়ত্ত্বশাসিত পৰিষদৰ অৰ্থ সাহাৰ্য্যত আজিৰ পৰা ডিফুৰ আৰবৰেটামত আয়োজন কৰিছে দুদিনীয়া এক আলোচনাচক্ৰ ৷
ষষ্ঠ অনুসুচীৰ প্ৰয়োগৰ ৭৫ বছৰ হোৱা উপলক্ষে আয়োজিত এই আলোচনা চক্ৰত আজি উদ্ধোধনী অনুষ্ঠানত ভাগ লয় দেশৰ বিশিষ্ট পৰিবেশবিদ তথা ৰমন মেগাছেছ বঁটা প্ৰাপক লাডাখী নেতা সোনম ৱাংচুক , চিকিম বিশ্ববিদ্যালয়ৰ অধ্যাপক তথা চিকিম চৰকাৰৰ অৰ্থনৈতিক উপদেষ্টা মহেন্দ্ৰ পি লামা আৰু কলকতা বিশ্ববিদ্যালয়ৰ ৰাজনীতি বিজ্ঞান বিভাগৰ অধ্যাপক সমীৰ কুমাৰ দাসে ৷
পৰিষদৰ কলা-সংস্কৃতি বিভাগৰ কাৰ্যবাহী সদস্য সূৰ্য্য ৰংফাৰৰ অধ্যাক্ষতাত হোৱা প্ৰথম পৰ্য্যায়ৰ আলোচনা চক্ৰৰ পিছত বিশিষ্ট পৰিবেশবিদ সোনম ৱাংচুকে সংবাদ মাধ্যমৰ আগত কয় যে মই ষষ্ঠ অনুসচীৰ সবিশেষ শিকিবলৈ আহিছো ৷ ষষ্ঠ অনুসুচীৰ অধিকাৰ থকাৰ বাবে কাৰবি আংলং আৰু ডিমা হাছাওৰ প্ৰকৃতি , জনজাতীয় জীৱন , পৌৰাণিক ৰীতি-নীতি বাচি আছে ৷ সেয়ে কেন্দ্ৰীয় চৰকাৰক আমি ষষ্ঠ অনুসুচীৰ ক্ষমতা দাবী কৰি আছো ৷
ষষ্ঠ অনুসুচীৰ সকলো বিষয় আজি আৰু কাইলৈ আলোচনা হ’ব ৷ য’ত কিছু কম আছে সেয়া ভাৰতীয় সংবিধানৰ ১২৫ তম সংশোধনীত সম্পূৰ্ণ হ’ব বুলি আশা কৰি তেওঁ কয় যে উত্তৰ পূৰ্বাঞ্চলত থকা এই পৰিষদৰ ক্ষমতা লাডাখক দিব বুলি বিজেপি চৰকাৰে ২০১৯-২০ প্ৰতিশ্ৰুতি দিছিল ৷ৱংচুকে কয় যে ২১ শতিকাতো ষষ্ঠ অনুসুচীৰ গ্ৰহণযোগ্যতা অধিক ৷ এই ক্ষমতাই জনজাতীয় লোকক অধিক সুৰক্ষিত কৰিব ৷ লাডাখত ৯৯% লোক জনজাতি ৷ কোম্পানীয়ে নিজৰ লাভৰ বাবে কাম কৰিব কিন্তু ষষ্ঠ অনুসুচীয়ে হাজাৰ হাজাৰ বছৰৰ জনজাতীয় লোকৰ সংস্কৃতি আৰু পৰিবেশ সুৰক্ষিত কৰিব বুলি তেওঁ আশা কৰে ৷
লাডাখী নেতা সোনম ৱাংচুকে সোমবাৰে হাফলঙত উপস্থিত হৈ ডিমা হাছাও স্বায়ত্ত্বশাসিত পৰিষদৰ কাৰ্যপদ্ধতি অধ্যয়ন কৰিছিল ৷ কিন্তু তেওঁতো নাজানে ষষ্ঠ অনুসুচীৰ অধীনত গঠিত ডিমা হাছাও স্বায়ত্ত্বশাসিত পৰিষদে দেশৰ ধণাঢ্য পুঁজিপতি আদানী গ্ৰুপক উমৰাংচ’ৰ ৯ হাজাৰ বিঘা মাটি কিদৰে জনজাতীয় লোকক উচ্ছেদ কৰি দিবলৈ লোৱাক লৈ সংগ্ৰাম চলি আছে ৷ তেওঁতো নাজানে কিদৰে কাৰবি আংলং জিলাত এতিয়া কেৱল কাগজত ঘন অৰণ্য বৰ্তি আছে ৷ তথাপি লাডাখী নেতা গৰাকীৰ আশা ষষ্ঠ অনুসুচীৰ অধীনত ডালাখ , লেহ আৰু কাৰগিল স্বায়ত্ত্বশাসিত পৰিষদ দিলেই প্ৰকৃতি , মানুহ , সংস্কৃতি সকলো হাজাৰ হাজাৰ বছৰলৈকে সৰক্ষিত হ’ব ৷
যিটোৱে গোলকীয় উষ্ণতাৰ সমতা ৰক্ষা কৰিব ৷ কাৰবি আংলং স্বায়ত্ত্বশাসিত পৰিষদৰ কলা-সংস্কৃতি বিভাগৰ কাৰ্যবাহী সদস্য সূৰ্য্য ৰংফাৰৰ অধ্যক্ষতাত হোৱা উদ্ধোধনী অনুষ্ঠানত ভাষণ দি দেশৰ এগৰাকী বিশিষ্ট লেখক তথা কলকতা বিশ্ববিদ্যালয়ৰ ৰাজনীতি বিভাগৰ অধ্যাপক সমীৰ কুমাৰ দাসে কয় যে কাষ্টমাৰী ল আৰু আমাৰ দেশৰ আইন কোনটোক লৈ আমি আগবাঢ়িম ৷ ৱাংছিংটন পোষ্টৰ এটা বাতৰিৰ প্ৰসঙ্গ উল্লেখ কৰি তেওঁ কয় যে পেনছিলভিনেয়াৰ এটা জনজাতী হ’ল “এমিউচ” ৷ তেওঁলোকে আধুনিক শিক্ষা , চিকিৎসা বা খাদ্যাভাস গ্ৰহণ কৰিবলৈ ৰাজি নহয় ৷ তেওঁলোকে পৰিশোধন নকৰাকৈ গাখীৰ খোৱাৰ বাবে বহু শিশুৰ মৃত্যু হ’ল । ফলত ইউ এছ চৰকাৰে তেনেদৰে গাখীৰ খোৱাটো নিষিদ্ধ কৰিব লগা হ’ল ৷ সেয়ে পৰম্পৰাৰ বৰ্তাই ৰখাৰ কথা কওঁতে এই দিশ বিলাকৰ কথাও আমি ভাবিব লাগিব ৷
আন এগৰাকী বক্তা অধ্যাপক মহেন্দ্ৰ পি লামাই কয় যে পৰিষদ সমূহে কেন্দ্ৰীয় বা ৰাজ্য চৰকাৰে ধন নিদিয়াৰ কথা কয় ৷ কিন্তু চৰকাৰী সাহাৰ্য্য পাবলৈ তেওঁলোকে প্ৰয়োজন অনুসৰি প্ৰকল্প দিব নোৱাৰে ৷ আজিৰ উদ্ধোধনী অনুষ্ঠানত কাৰবি আংলং স্বায়ত্ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং উপস্থিত নাই ৷ তেওঁ ডংকামকামত পট্ৰা বিতৰণ অনুষ্ঠানত আছিল ৷ সেয়ে প্ৰতি উপাৰ্চায্য শিৱাশীষ বিশ্বাসে আদৰণি ভাষণ দি কয় যে তেওঁ যদিও নাই কিন্তু কাৰবি আংলঙৰ সকলোতে তেখেত আছে ৷
আনহাতে অধ্যাপক ভোলি ধনৰাজুৱে কয় যে ৰাজ্য চৰকাৰে কেন্দ্ৰীয় চৰকাৰে দিয়া পুঁজি সময়ত পৰিষদ সমূহক এৰি নিদিয়ে ৷ কিন্তু ভাৰতীয় সংবিধানৰ ১২৫ তম সংশোধনী শীঘ্ৰে হ’ব । এই সংশোধনী হ’লেই এই অসুবিধা আতঁৰিব ৷ তেওঁ সংবিধানৰ ২৪৪( ক ) অনুচ্ছেদৰ অধিনত কাৰবি আংলঙে স্বায়ত্ত্বশাসিত ৰাজ্য পোৱা উচিত বুলিও কয় ৷
