চলন্ত গাড়ীত জোৰকৈ নিচাযুক্ত দ্ৰৱ্য সেৱন কৰাই এগৰাকী ১৩ বছৰীয়া কিশোৰীক দলবদ্ধ ধৰ্ষণ (Gang Rape)। উত্তৰ প্ৰদেশৰ মথুৰাত বৃহস্পতিবাৰে বিয়লি সংঘটিত হয় এই ঘটনা। ইফালে অভিযুক্ত যুৱক তিনিজনক বিচাৰিবলৈ আৰম্ভ কৰা হৈছে অভিযান।
অভিযোগ অনুসৰি, বৃহস্পতিবাৰে বিয়লি স্থানীয় গেলামালৰ দোকানলৈ গৈছিল কিশোৰীগৰাকী। সেই সময়ত পিয়াঁহত পানী খাব বিচৰাত এজন অভিযুক্তই তেওঁক পানী আগবঢ়াইছিল।
অভিযোগ অনুসৰি, সেই পানীত নিচাযুক্ত দ্ৰৱ্য মিহলি কৰা হৈছিল। উক্ত পানী খাই তেওঁৰ মূৰ ঘূৰাবলৈ ধৰে আৰু প্ৰায় অচেতন হৈ পৰাত যুৱকজনে জোৰকৈ গাড়ীত উঠাই দিয়ে। কিছু দূৰ গৈ গাড়ীত উঠে আৰু দুজন যুৱক। ইয়াৰ পিছতে কিশোৰীগৰাকীক চলন্ত গাড়ীতে দলবদ্ধ ধৰ্ষণৰ অভিযোগ।
ইফালে ধৰ্ষণৰ পিছতে তিনিওজন অভিযুক্তই কিশোৰীগৰাকীক এখন উৰণীয়া সেঁতুৰ তলত পেলাই থৈ পলায়ন কৰে। জ্ঞান ঘূৰাই পোৱাৰ পিছত কিশোৰীগৰাকীয়ে কেনেবাকৈ ঘৰলৈ উভতি আহি ঘটনাৰ সবিশেষ জনায়৷ লগে লগে পৰিয়ালৰ লোকে যুৱক তিনিজনৰ বিৰুদ্ধে আৰক্ষী থানাত এজাহাৰ দাখিল কৰে। ইতিমধ্যে ঘটনা সন্দৰ্ভত তদন্ত আৰম্ভ হৈছে। আৰক্ষী অধীক্ষক ত্ৰিগুনা বিচেনে জানিবলৈ দিয়া মতে, ভুক্তভোগী কিশোৰীগৰাকীৰ চিকিৎসা পৰীক্ষা কৰা হৈছে।
পৰীক্ষাত ধৰ্ষণৰ প্ৰমাণ পোৱা গৈছে। তেওঁৰ গোপন জবানবন্দীও শনিবাৰে দণ্ডাধীশৰ সন্মুখত লিপিবদ্ধ কৰা হয়। আৰক্ষী সূত্ৰৰ পৰা জানিব পৰা মতে, অঞ্চলটোৰ চিচিটিভি ফুটেজ পৰীক্ষা কৰি ইতিমধ্যে দুজন অভিযুক্তক চিনাক্ত কৰিছে। তিনিওজন অভিযুক্তক বিচাৰি উলিয়াবলৈ আৰম্ভ কৰা হৈছে এক তালাচী অভিযান।
