ASSAM TIMES POST
নিউজ ডেস্ক
সংশোধিত নাগৰিকত্ব আইনৰ সমর্থনত বিজেপিয়ে মধ্য প্ৰদেশত উলিওৱা এক সমদলত ঘটিল অথন্তৰ। মধ্য প্ৰদেশৰ ৰাজগড়ত বিজেপিৰ সমদলক বাধা দিয়াৰ সময়ত এক অপ্ৰীতিকৰ পৰিস্থিতিৰ সৃষ্টি হয় বিজেপিৰ কৰ্মী-সমৰ্থক আৰু আৰক্ষী তথা জিলা প্রশাসনৰ বিষয়াসকলৰ মাজত। পৰিস্থিতি এনেকুৱা পৰ্যায়লৈ যায় যে বিজেপিৰ সমর্থকসকলৰ সৈতে হতা-হতি পৰ্যন্ত হয় ৰাজগড়ৰ উপাযুক্ত তথা অতিৰিক্ত উপায়ুক্তৰ। দুই মহিলা শীর্ষ বিষয়াৰ চুলি টানি, কঁকালত লঠিয়াই, বিজেপি সমর্থকসকলে তেওঁক অপদস্থ কৰে বুলি অভিযোগ উত্থাপন কৰিছে অতিৰিক্ত উপায়ুক্তগৰাকীয়ে।
আৰক্ষী সূত্ৰই জনোৱা মতে, অঞ্চলটোত ১৪৪ ধাৰা জাৰি থকা সত্ত্বেও চিএএ-ৰ সমর্থনত দেওবাৰে সমদল বাহিৰ কৰিছিল বিজেপিৰ সমর্থকসকলে। এই সমদলক বাধা দিবলৈ যোৱা আৰক্ষীৰ ওপৰত ৫০-১০০জনমান বিজেপি সমৰ্থকে আক্ৰমণ কৰে। পৰিস্থিতি চম্ভালিবলৈ দুই অতিৰিক্ত উপায়ুক্ত প্রিয়া বর্মা আৰু শ্রুতি আগৰৱালাক লৈ ঘটনাস্থলীত উপস্থিত হয় উপায়ুক্ত নিধি নিবেদিতা। বিজেপি সমর্থকসকলক নিৰস্ত কৰাৰ চেষ্টা কৰে তেওঁলোকে। এঠাইত বহিবলৈও নিৰ্দোশ দিয়ে। কিন্তু তাতো পৰিস্থিতি নিয়ন্ত্রণলৈ নাহে। তেতিয়াই দুয়োপক্ষৰ মাজত আৰম্ভ হয় টনা-আঁজোৰা।
ছ’চিয়েল মিডিয়াত এই ঘটনাৰ কেইবাটাও ভিডিঅ’ সন্মুখলৈ আহিছে। তাত দেখা গৈছে, টনা-আঁজোৰা চলি থকাৰ সময়ত কলাৰত ধৰি বহুকেইজনে আৰক্ষীৰ হাতত তুলি দিয়াৰ চেষ্টা কৰে প্রিয়া বর্মাক। দুই-এজনক থাপ্পৰ মৰাও দেখা যায়। তেনে অৱস্থাতে পৰিস্থিতিয়ে চৰম ৰূপ ধাৰণ কৰে। চাৰিওফালে আৰক্ষী মোতায়েন থকা সত্ত্বেও প্রিয়া বর্মাৰ চুলিত ধৰি টানি দিয়ে এজন ব্যক্তিয়ে।
সংবাদ সংস্থা এএনআই-এ উক্ত ব্যক্তিজনক বিজেপিৰ সমর্থক বুলে চিহ্নিত কৰিছে। আন এটি ভিডিঅ’ত, উপায়ুক্ত নিধি নিবেদিতাৰ সৈতে ত্ৰিৰঙ্গাধাৰী এজন ব্যক্তিৰ হতা-হতিও ধৰা পৰিছে।
সংবাদ সংস্থা পিটিআইক দিয়া সাক্ষাৎকাৰত প্রিয়া বর্মাই কয়, ‘‘জিলাখনত ১৪৪ ধাৰা জাৰি আছে। আমি আমাৰ দায়িত্ব পালন কৰিছিলো। ওলোটা দিশৰ পৰা এটা দল আহি আমাৰ সৈতে অশালীন আচৰণ আৰম্ভ কৰে। আমাক টানি লৈ যোৱাৰ চেষ্টা কৰে। তাৰ পিছতেই ভিৰটোক ওভতাই পঠোৱাৰ চেষ্টা কৰৈ আমি। তেওঁলোকক এটা স্থানত বহিবলৈ কওঁ আমি। কিন্তু কোনেও কথা নুশুনে। তাৰ পিছত আৰক্ষীয়ে লাঠিচার্জ কৰিবলৈ বাধ্য হয়।’’ ভিৰৰ মাজৰ পৰা তেওঁৰ কঁকালত লঠিওৱা বুলিও অভিযোগ কৰে প্রিয়া বর্মাই। বিষয়টোক লৈ দুই ব্যক্তিৰ বিৰুদ্ধে থানাত অভিযোগ দাখিল কৰা হৈছে বুলিও তেওঁ জনায়।
বিজেপি নেতৃত্বই অৱশ্যে সমগ্ৰ ঘটনাটোৰ বাবে আৰক্ষী আৰু প্রশাসনকেই কাঠগড়াত তুলিছে। দলৰ নেতা তথা ৰাজ্যৰ প্রাক্তন মুখ্য মন্ত্রী শিৱৰাজ সিং চৌহানে উপায়ুক্তক তীব্র নিন্দা কৰিছে। টুইটাৰত শিৱৰাজে লিখে, ‘‘উপায়ুক্ত মেডাম, আইনৰ কোনখন কিতাপে শান্তিপূর্ণ আন্দোলনকাৰীৰ গাত হাত তোলাৰ অধিকাৰ দিছে আপোনাক?’’ মধ্য প্রদেশৰ মানুহে এই হিটলাৰী শাসন সহ্য নকৰে বুলিও ৰাজ্যৰ কংগ্রেছ চৰকাৰক সকীয়াই দিয়ে তেওঁ। অৱশ্যে কমলনাথৰ চৰকাৰ আৰক্ষী আৰু সেই উপায়ুক্তকেই সমৰ্থন কৰিছে। ১৪৪ ধাৰা লঙ্ঘনৰ অভিযোগত ইতিমধ্যে কেইবাজনকৈ গ্রেপ্তাৰ কৰা হৈছে।
