ASSAM TIMES POST
বিশেষ প্ৰতিবেদন
অহা ২৮ , ২৯ ফেব্ৰুৱাৰী আৰু ১ মার্চত লাওছত অসম সাহিত্য সভাই অনুষ্ঠিক কৰিব বিশ্ব অসম সন্মিলন। বিশ্বৰ বিভিন্ন প্রান্তত বসবাস কৰি থকা অসমীয়াসকলক একত্রিত কৰাৰ উদ্দেশ্যে অনুষ্ঠিত হ’ব এই সন্মিলন। দেওবাৰে অসম সাহিত্য সভাৰ যোৰহাটস্থিত কেন্দ্ৰীয় কাৰ্যালয়ত এই কথা ঘোষণা কৰে অসম সাহিত্য সভাই।
সাহিত্য সভাৰ এক বিবৃতিত প্ৰকাশ পোৱা মতে, ‘আছিয়ান’ পাঅ’নিয়াৰ মেণ্টৰ হবিব মহম্মদ চৌধুৰীৰ মুখ্য পৃষ্ঠপোষকতাত অনুষ্ঠিত হ’বলগা এই অধিবেশনত ম্যানমাৰ, কম্বোডিয়া, ছিংগাপুৰ, ইণ্ডোনেছিয়া, ফিলিপাইনছ, থাইলেণ্ড, লাওচ, ভিয়েটনামত থকা প্রবাসী অসমীয়াসকলক একত্রিত কৰি এই সন্মিলনৰ আয়োজন কৰা হৈছে।
এই সন্মিলনলৈ অসম সাহিত্য সভাৰ উপৰি অসমৰ লোকশিল্পীৰ এটা দলেও অংশগ্রহণ কৰিব। উল্লেখ্য যে এই সন্মিলনত অসমীয়া পৰম্পৰাগত সংস্কৃতি প্রদর্শন আৰু সাংস্কৃতিক বিনিময়, খাদ্য মহোৎসৱ, গ্রন্থমেলা, অসমৰ থলুৱা সামগ্ৰীৰে সৌন্দর্য আৰু সাজপাৰ প্ৰদৰ্শনৰ বিভিন্ন কার্যসূচী গ্রহণ কৰা হৈছে। আনহাতে, সাংস্কৃতিক ভাব-বিনিময় আৰু গৱেষণা প্রকল্প, আন্তর্জাতিক আলোচনা-চক্ৰৰো আয়োজন কৰা হৈছে।
ইফালে অহা ২২ আৰু ২৩ ফেব্ৰুৱাৰীত নেপালৰ ত্রিভুৱন বিশ্ববিদ্যালয়ৰ বৌদ্ধ অধ্যয়ন বিভাগৰ উদ্যোগত অসম সাহিত্য সভা আৰু নেপালী সাহিত্য সভাৰ সহযোগত চর্যাপদ সম্পৰ্কীয় এখন আলোচনা-চক্ৰৰো আয়োজন কৰা হৈছে। নেপালৰ কাঠমাণ্ডুত অনুষ্ঠিত হ’বলগা এই আলোচনা-চক্ৰত অসম আৰু নেপালৰ ভাষা-সাহিত্য-সংস্কৃতিৰ তুলনামূলক অধ্যয়ন সম্পর্কীয় গৱেষণা-পত্র পাঠ কৰা হ’ব। ইয়াৰ বাবে ইচ্ছুকসকলক অসম সাহিত্য সভাৰ সৈতে যোগাযোগ কৰিবলৈ সাহিত্য সভাৰ তৰফৰ পৰা আহ্বান জনোৱা হৈছে।
