ক্ৰিকেটক বিদায় জনালে শিখৰ ধৱনে (Shikhar Dhawan)। আন্তঃৰাষ্ট্ৰীয় আৰু ঘৰুৱা দুয়ো শ্ৰেণীৰ ক্ৰিকেটৰ পৰা অৱসৰ ঘোষণা (Retirement from cricket announced) কৰে প্ৰাক্তন ভাৰতীয় অপেনাৰজনে। ছ’চিয়েল মিডিয়া পোষ্টত তেওঁ এই ঘোষণা কৰে। অৱসৰৰ কথা ঘোষণা কৰি ধৱনে লিখিছে, “মোৰ ক্ৰিকেট যাত্ৰা শেষ হ’ল। লগত থাকি গ’ল অগণন স্মৃতি আৰু কৃতজ্ঞতা। মৰম আৰু সহায়ৰ বাবে ধন্যবাদ।
জয় হিন্দ।”
৩৮ বছৰীয়া ধৱনে শেষবাৰৰ বাবে ২০২২ চনৰ ডিচেম্বৰ মাহত দেশৰ হৈ খেলিছিল। বাংলাদেশৰ বিৰুদ্ধে সেই এদিনীয়া শৃংখলাৰ পিছত তেওঁ ভাৰতীয় দলত নিজৰ স্থান হেৰুৱায়। শুভমন গিলে তেওঁৰ স্থান লয়।
ধৱনে এক ভিডিঅ’ বাৰ্তাযোগে কয়, “মোৰ এটাই লক্ষ্য আছিল, দেশৰ হৈ খেলা। সেই লক্ষ্য পূৰণ হৈছে। আপোনালোকক অশেষ ধন্যবাদ। প্ৰথমে মোৰ পৰিয়াল, মোৰ শৈশৱৰ প্ৰশিক্ষক তাৰক সিং আৰু মদন শৰ্মা। তেওঁলোকৰ প্ৰশিক্ষণত মই ক্ৰিকেট শিকিলোঁ। ইয়াৰ পিছত মই মোৰ গোটেই দলটোক ধন্যবাদ জনাইছো, যাৰ লগত মই খেলিছো। সকলোৰে মৰম আৰু সমৰ্থন পালোঁ। গল্পৰ কিতাপ পঢ়ি থাকোঁতে পৃষ্ঠাবোৰ লুটিয়াই থকাৰ দৰেই কাম কৰি আছো। আন্তঃৰাষ্ট্ৰীয় আৰু ঘৰুৱা ক্ৰিকেটৰ পৰা অৱসৰ।”
ধৱনে ভাৰতীয় ক্ৰিকেট ব’ৰ্ড আৰু দিল্লী ক্ৰিকেট সন্থাকো ধন্যবাদ জ্ঞাপন কৰে। লগতে সমৰ্থকসকলক ধন্যবাদ জ্ঞাপন কৰি তেওঁ কয়, “দেশৰ হৈ খেলিবলৈ পাই মই ধন্য। বি চি চি আই, ডি ডি চি এয়ে মোক সেই সুযোগ দিলে। অনুৰাগীৰ মৰমো পাইছোঁ। মই নিজকে ক’ব বিচাৰো, দেশৰ হৈ খেলিব নোৱাৰো বুলি দুখ অনুভৱ কৰাৰ প্ৰয়োজন নাই, বৰঞ্চ দেশৰ হৈ খেলিব পাৰিছো বুলি ভাবি সুখী হোৱা উচিত।”
উল্লেখযোগ্য যে বাওঁহাতৰ অ’পেনাৰগৰাকীয়ে দেশৰ হৈ ৩৪খন টেষ্ট, ১৬৭খন এদিনীয়া আৰু ৬৮খন টি-২০ মেচ খেলিছে। টেষ্টত তেওঁৰ ৭টা শতকৰ সৈতে ২৩১৫ ৰান সংগ্ৰহ কৰিছে। ধৱনে এদিনীয়া ক্ৰিকেটত ৬৭৯৩ ৰান সংগ্ৰহ কৰি ১৭ টা শতক অর্জন কৰে। ৰোহিত শৰ্মাৰ সৈতে তেওঁৰ অপেনিং যুটিয়ে ভাৰতক বহু মেচত জয়লাভৰ সোৱাদ দিছে। বিশেষকৈ আই চি চিৰ প্ৰতিযোগিতাত ৰোহিত আৰু ধৱনৰ সফলতা উল্লেখযোগ্য। ধৱনে দেশৰ জাৰ্চি পিন্ধি টি-২০ত ১৭৫৯ ৰান সংগ্ৰহ কৰে। তেওঁ ভাৰতক কেইবাখনো এদিনীয়া মেচতো নেতৃত্ব দিছে।
ধৱনে দিল্লী ডেয়াৰডেভিলছ (২০০৮), মুম্বাই ইণ্ডিয়ানছ (২০০৯-২০১০), ডেকান চাৰ্জাৰ্ছ (২০১১-২০১২), ছানৰাইজাৰ্ছ হায়দৰাবাদ (২০১৩-২০১৮), দিল্লী কেপিটেলছ (২০১৯-২০২১) আৰু পঞ্জাব কিংছ (২০২২-২০২৪)ৰ হৈ খেলিছে।
