বাংলাদেশৰ ৰাজনৈতিক সংকট (Political crisis in Bangladesh)ৰ বাবে আমেৰিকাক দোষী সাব্যস্ত (America convicted) কৰিছে অপসাৰিত প্ৰধানমন্ত্ৰী শ্বেখ হাছিনা (Sheikh Hasina)ই। আমেৰিকাৰ ষড়যন্ত্ৰতে আৱামি লীগক চৰকাৰৰ পৰা উৎখাত কৰাৰ অভিযোগ হাছিনাৰ। ভাৰতত উপস্থিত হোৱাৰ ৬ দিন পাছত বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই নিজৰ মৌনতা ভংগ কৰে। প্ৰধানমন্ত্ৰী পদৰ পৰা পদত্যাগ কৰাৰ পিছত প্ৰথমবাৰৰ বাবে আৱামি লীগৰ নেতা-কৰ্মী আৰু দেশবাসীক বাৰ্তা প্ৰদান কৰে।
বাংলাদেশৰ দক্ষিণৰ প্ৰবাল দ্বীপ ছেইণ্ট মাৰ্টিন আমেৰিকাক গতাই নিদিয়াৰ বাবেই ষড়যন্ত্ৰৰ বলি হোৱা বুলি অভিযোগ কৰে শ্বেখ হাছিনাই। ছেইণ্ট মাৰ্টিন আৰু বংগোপসাগৰ ত্যাগ কৰিলে তেওঁক পদচ্যুত কৰা নহ’লহেঁতেন বুলিও তেওঁ উল্লেখ কৰে। উল্লেখ্য যে দীৰ্ঘদিন ধৰি আমেৰিকাৰ সৈতে শ্বেখ হাছিনাৰ চৰকাৰৰ মাজত বিবাদ চলি আহিছে।
সংসদীয় নির্বাচনৰ পূর্বেও হাছিনাই এই বিষয়ত মুকলিকৈ উল্লেখ কৰিছিল৷ আনহাতে, ভাৰতলৈ অহাৰ পিছত আমেৰিকাই তেওঁৰ ভিছা বাতিল কৰে। তেওঁ নিজৰ মৌনতা ভংগ কৰি দেশৰ অশান্তিৰ বাবে আমেৰিকাক দোষাৰোপ কৰে।
দেশ এৰি যোৱাৰ পূৰ্বে শ্বেখ হাছিনাই ৰাষ্ট্ৰক উদ্দেশ্যি দিয়া বক্তব্য ৰেকৰ্ডিং কৰাৰো সুযোগ লাভ নকৰিলে। কিন্তু এইবাৰ তেওঁ এক বিবৃতিত কয়, “মই পদত্যাগ কৰিছোঁ যাতে দেশত আৰু মৃত্যু সমদল নহয়। বি এন পিয়ে ছাত্ৰ-ছাত্ৰীৰ মৃতদেহৰ ওপৰত নিৰ্ভৰ কৰি ক্ষমতা দখল কৰিব বিচাৰিছে। ছেইণ্ট মাৰ্টিন দ্বীপ এৰি দিয়া হ’লে আজিও মই ক্ষমতাত থাকিলোঁহেঁতেন। মই দেশত থকা হ’লে হয়তো আৰু অধিক প্ৰাণ হেৰুৱালেহেঁতেন। আৰু ধন-সম্পত্তিৰ অপচয় হ’ব। মই তেনেকুৱা বিচৰা নাছিলোঁ। সেয়ে মই পদত্যাগ কৰিলোঁ।”
আৱামি লীগৰ নেতা-কৰ্মীসকলক সম্বোধন কৰি হাছিনাই লগতে লিখিছে, “ভগৱানে ইচ্ছা কৰিলে মই সোনকালে দেশলৈ উভতি যাম। পৰাজয় মোৰ যদিও বাংলাদেশৰ জনসাধাৰণ জয়ী হৈছে। মোৰ যিসকল কৰ্মী তাত আছে তেওঁলোকে মনোবল নেহেৰুৱাব। আৱামি লীগে বাৰে বাৰে তেওঁলোকৰ পক্ষত থিয় দিছে। পুনৰ থিয় দিব।”
লগতে কোটা সংস্কাৰ কৰ্মীসকলক লৈ তেওঁৰ বক্তব্য, “মই বাংলাদেশৰ যুৱ ছাত্ৰ-ছাত্ৰীসকলক পুনৰ ক’ব বিচাৰো যে মই আপোনালোকক কেতিয়াও অপমান কৰা নাই। বৰঞ্চ মোৰ কথাবোৰ উত্তেজিত কৰিবলৈ বিকৃত কৰা হৈছে। সেইদিনাৰ সম্পূৰ্ণ ভিডিঅ’টো চাব। ষড়যন্ত্ৰকাৰীয়ে আপোনালোকৰ সৰলতাৰ সুযোগ লৈ দেশখন অস্থিৰ কৰিবলৈ আপোনালোকক ব্যৱহাৰ কৰিছে।”
