বুধবাৰে দিনৰ প্ৰায় ২ মান বজাত উৎকট গৰমকো নেওচি ১৩ লাংহিন পৰিষদীয় সমষ্টি (13 Langhin Council Constituency)ৰ অন্তৰ্গত বৃহত্তৰ জাইপঙ অঞ্চল (Greater Zypong Region)ৰ বানত বিধ্বস্ত পৰিয়াল (Flood-affected families)ৰ কাষত ঠিয় হ’ল কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য ড০ তুলিৰাম ৰংহাং (Tuliram Ronghang)।
উল্লেখ্য যে যোৱা সোমবাৰে নিশা হোৱা ধাৰাষাৰ বৰষুণৰ ফলত প্ৰবল বানপানী সৃষ্টি হৈছিল। নিশা প্ৰায় দুই বজাত বৃহত্তৰ জাইপং অঞ্চলৰ কেইবাখনো গাঁৱৰ বাসগৃহত পানী সুমাই যোৱাৰ ফলত হাহাকাৰ পৰিৱেশৰ সৃষ্টি হৈছিল। বুধবাৰে অঞ্চলটোত মুখ্য কাৰ্যবাহী সদস্য গৰাকী উপস্থিত হৈ বানত ক্ষতিগ্ৰস্ত সকলৰ বুজ লোৱাৰ লগত শীঘ্ৰে আৰ্থিক সাহায্য প্ৰদান কৰাৰ আশ্বাস (Assured of financial assistance) প্ৰদান কৰে ৷
ক্ষতিগ্ৰস্থ লোকৰ মাজত চাইল, ডাইল, মিঠাতেল, তাৰপলিন, টিনপাত আদি বিতৰণ কৰাৰ লগতে বানত বিধ্বস্ত ১৫৯ টা পৰিয়াললৈ কাৰ্বি আংলং স্বায়ত্বশাসিত পৰিষদৰ তৰফৰ পৰা এক লাখ বিশ হাজাৰ টকাকৈ এক সপ্তাহৰ ভিতৰতে সাহাৰ্য প্ৰদান কৰা হ’ব বুলি জাইপং বজাৰত অনুষ্ঠিত সভাত ঘোষণা কৰে মুখ্য কাৰ্যবাহী সদস্য গৰাকীয়ে। মুখ্য কাৰ্যবাহী সদস্য গৰাকীৰ লগতে কাৰ্যবাহী সদস্য বিলিমোহন খাখলাৰী, লাংহিন ভিভিছিৰ অধ্যক্ষ কিৰণ টকবি, বিভিন্ন বিভাগৰ মুৰব্বীসকল আৰু বহুতো গন্যমাণ্য ব্যক্তি উপস্থিত থাকে।
