ASSAM TIMES POST
নিউজ ডেক্সঃ নৰেন্দ্ৰ মোডী চৰকাৰৰ ছ্যুট বুটৰ চৰকাৰ বুলি কটাক্ষ কৰিছিল ৰাহুল গান্ধীয়ে৷ এইবাৰ কেন্দ্ৰীয় বাজেটক এইদৰে বৰ্ণনা কৰিছে কংগ্ৰেছ সাংসদ ৰাহুল গান্ধীয়ে৷ ৰাহুলৰ দাবী, বাজেটে কেৱল অন্তৰংগ পুঁজিপতি বন্ধু আৰু বিত্তশীলসকলৰ বাবে গুৰুত্ব দিব৷ কৃষক, ছাত্ৰ-ছাত্ৰী আৰু সাধাৰণ মানুহ অবহেলিত হৈ ৰ’ব৷ অহা ১ ফেব্ৰুৱাৰীত সংসদত বাজেট দাখিল কৰিব কেন্দ্ৰীয় চৰকাৰে৷
তাৰ আগেয়ে সোমবাৰে দিল্লীত উদ্যোগপতি, অৰ্থনীতিবিদ আদিৰ লগত নৰেন্দ্ৰ মোডী, অমিত শ্বাহে আলোচনা কৰিছিল৷ এই বাজেটক লৈ সৰব হৈ পৰা ৰাহুল গান্ধীয়ে কয়, বাজেটক লৈ পৰামৰ্শ লওতে বৈঠক অনুষ্ঠিত হৈছিল৷ য’ত কেৱল অন্তৰংগ পুঁজিপতি বন্ধু আৰু বিত্তশীলৰ কাৰণেই সংৰক্ষিত৷
কৃষক, ছাত্ৰ-ছাত্ৰী, যুৱ সমাজ, মহিলা, চৰকাৰী আকু বেচৰকাৰী কৰ্মী, ক্ষুদ্ৰ ব্যৱসায়ী আৰু মধ্যবিত্ত কৰদাতাৰ মতামতত কোনো গুৰুত্ব নাই তেওঁলোকৰ ওচৰত৷ উদ্যোগপতি আৰু অৰ্থনীতিবিদসকলৰ বাবে মুঠ দুটা পৰ্যায়ত বৈঠক কৰিছে প্ৰধানমন্ত্ৰী নৰেন্দ্ৰ মোডী আৰু গৃহ মন্ত্ৰী অমিত শ্বাহে৷ কেন্দ্ৰীয় মন্ত্ৰী নীতিন গাডকাৰী সেই সভাত উপস্থিত আছিল৷ কিন্তু বিত্ত মন্ত্ৰী নিৰমলা সীতাৰমন বৈঠকত উপস্থিত নাছিল৷ তাকে লৈ কংগ্ৰেছে কটাক্ষ কৰিছিল৷
