শণিবাৰে সন্ধিয়া লাহৰিজানত এটা অপিঅইড ছাবষ্টিটিউচন থেৰাপী কেন্দ্ৰ ছীল কৰে খটখটী আৰক্ষীয়ে ৷ প্ৰাপ্ত খবৰ অনুসৰি খটখটী থানাৰ অ’চি নিতুল শইকীয়া আৰু বোকাজানৰ দণ্ডাধীশৰ দ্বাৰা ড্ৰাগছ আসক্ত ব্যক্তিৰ কাউঞ্চেলিং থেৰাপীঅ’এছডি কেন্দ্ৰ জব্দ আৰু ছীল কৰা হয় ৷
খটখটী থানাৰ ভাৰপ্ৰাপ্ত বিষয়া নিতুল শইকীয়া আৰু বোকাজানৰ দণ্ডাধীশ নেতৃত্বত এক উল্লেখযোগ্য অভিযানত ২০ জন ড্ৰাগছ আসক্তক আটক কৰে আৰু পৰৱৰ্তী সময়ত কাউন্সেলিঙৰ পিছত মুকলি কৰি দিয়া হয়। কিন্তু কেন্দ্ৰটোৰ প্ৰকল্প সঞ্চালক বুলি দাবী কৰা ৰমজান আলীক অধিক তদন্তৰ বাবে জিম্মাত লোৱা হয়। লাহৰিজানৰ বাসিন্দাসকলৰ একাধিক অভিযোগৰ পিছতে এই অভিযান আৰম্ভ কৰা হয়, যিসকলে কেন্দ্ৰটো ড্ৰাগছ আসক্তসকলে থেৰাপীৰ আঁৰত অপব্যৱহাৰ কৰি আছে বুলি জানিবলৈ দিয়ে।
অভিযোগসমূহত নিচাসক্তসকলে মুকলিকৈ ড্ৰাগছ সেৱন কৰা, স্থানীয় জনসাধাৰণৰ মাজত উদ্বেগ আৰু অশান্তিৰ সৃষ্টি কৰা বুলি উল্লেখ কৰা হৈছে। স্বচ্ছতা সুনিশ্চিত কৰাৰ বাবে সংবাদ মাধ্যমৰ লোকৰ উপস্থিতিত চলোৱা সমগ্ৰ অভিযানত হনুমান মনিদিৰ গাওঁৰক্ষী বাহিনীয়ে খটখটি আৰক্ষীক সহায় কৰে। এই নিৰ্ণায়ক পদক্ষেপে ড্ৰাগছ সেৱনৰ সমস্যাসমূহ সমাধান আৰু জনসাধাৰণৰ সুৰক্ষা বজাই ৰখাৰ বাবে এক প্ৰশংসনীয় পদক্ষেপ বুলি সচেতন মহলত চৰ্চা হৈছে ৷
