আজি পত্নীৰ সৈতে কামাখ্যা মন্দিৰ দৰ্শন (Kamakhya Temple Visit with Wife) কৰে মুখ্যমন্ত্ৰী ডঃ হিমন্ত বিশ্ব শৰ্মা (Himanta Biswa Sarma)ই। তেওঁ কামাখ্যাত মাৰ আশীৰ্বাদ গ্ৰহণৰ লগতে ৰাজ্যবাসীৰ কুশল-মংগলৰ বাবে পূজাও কৰে। আনহাতে, মন্দিৰ দৰ্শন কৰি কামাখ্যাত প্ৰস্তাৱিত কামাখ্যা কৰিড’ৰ সন্দৰ্ভত মুখ্যমন্ত্ৰীয়ে কয় যে এই কৰিড’ৰ নিৰ্মাণৰ দায়িত্ব এল এণ্ড টি কোম্পানীক দিয়া হৈছে। আই আই টি গুৱাহাটীৰ পৰা অনুমোদন লাভৰ পিছতে দুই-তিনিমাহৰ ভিতৰত ইয়াৰ নিৰ্মাণকাৰ্য আৰম্ভ হ’ব।
আনহাতে, কৰিড’ৰ নিৰ্মাণৰ বাবে কিছু উচ্ছেদ কাৰ্য চলিব বুলি উল্লেখ কৰি মুখ্যমন্ত্ৰীয়ে কয় যে কেইখনমান দোকান আৰু কেইটামান ঘৰ ভাঙিবলগা হ’ব। কিন্তু তেওঁলোকক পুনৰ সংস্থাপিত কৰা হ’ব।
উল্লেখ্য যে কামাখ্যা মন্দিৰৰ আন্তঃগাঁথনি উন্নয়নৰ বাবে অসম চৰকাৰে গ্ৰহণ কৰিছে কামাখ্যা মন্দিৰ একচেছ কৰিড’ৰ প্ৰকল্প। এই প্ৰকল্পটোৰ বাবে ৪০২ কোটি টকা ধাৰ্য কৰা হৈছে। প্ৰধানমন্ত্ৰীৰ উত্তৰ-পূব উন্নয়ন পদক্ষেপ আঁচনিৰ অধীনত এই প্ৰকল্পটো ৰূপায়ণ কৰা হ’ব। ইয়াৰ আধাৰশিলা স্থাপন কৰিছিল প্ৰধানমন্ত্ৰী নৰেন্দ্ৰ মোদীয়ে। ইয়াৰ অধীনত কামাখ্যা মন্দিৰৰ লগতে ইয়াৰ চৌহদক আধুনিক ৰূপ দিয়া হ’ব।
