ৰাজ্যৰ বান পৰিস্থিতি বৰ্তমানো অপৰিৱৰ্তিত হৈ আছে । আনহাতে, বছৰৰ প্ৰথমটো বানত ন ন অঞ্চল প্লাৱিত হৈছে । ইফালে এই পৰ্যন্ত বানত মৃত্যু হৈছে ১৪ জন (14 killed in flood in Assam) লোক।
ৰাজ্যৰ শেহতীয়া বানত এতিয়ালৈকে ১৩ খন জিলা ক্ষতিগ্ৰস্ত (13 districts affected) হৈছে। হাইলাকান্দি, হোজাই, মৰিগাঁও, কৰিমগঞ্জ, নগাঁও, কাছাৰ, ডিব্ৰুগড়, গোলাঘাট, পশ্চিম কাৰ্বি আংলং, কাৰ্বি আংলং, ধেমাজি, কামৰূপ আৰু ডিমা হাছাও বানৰ কবলত। এই জিলাকেইখনৰ প্ৰায় ৬০০ গাঁৱৰ ৫ লক্ষাধিক লোক ক্ষতিগ্ৰস্ত (Over 5 lakh people affected) হৈছে। সৰ্বাধিক ক্ষতিগ্ৰস্ত হৈছে কাছাৰ, কৰিমগঞ্জ আৰু নগাঁও জিলা। আনহাতে, বানৰ ফলত প্ৰায় ৫ হেজাৰ হেক্টৰ শস্যভূমি বৰ্তমান পানীৰ তলত।
কেন্দ্ৰীয় জল আয়োগৰ তথ্য অনুসৰি, কাছাৰৰ অন্নপূর্ণাঘাট, কৰিমগঞ্জৰ বদৰপুৰঘাটত বৰাক নৈ, মৰিগাঁৱৰ ধৰমতুল, নগাঁৱৰ কামপুৰত কপিলী আৰু কৰিমগঞ্জত কুশিয়াৰা নৈৰ পানী বিপদ সীমাৰ ওপৰেৰে বৈ আছে। একেদৰে ডিব্ৰুগড় আৰু যোৰহাটৰ নিমাতীঘাটত ব্ৰহ্মপুত্ৰ, শোণিতপুৰৰ এন টি ৰোড ক্ৰছিঙত জীয়াভৰলী নৈৰ জলপৃষ্ঠও ক্ৰমাৎ বৃদ্ধি পাই আছে।
আনহাতে, বৰঝাৰস্থিত বতৰ বিজ্ঞান কেন্দ্ৰৰ ভৱিষ্যদ্বাণী অনুসৰি, দক্ষিণ-পশ্চিম মৌচুমী বতাহৰ প্ৰভাৱত আগন্তুক চাৰি-পাঁচদিনলৈ ৰাজ্যত বৰষুণ অব্যাহত থাকিব। এই সময়ছোৱাত প্ৰায়বোৰ অঞ্চলতে পাতলীয়াৰ পৰা মজলীয়া বৰষুণ হোৱাৰ সম্ভাৱনা আছে।
