ৰাজ্যত ৰেমলৰ প্ৰভাৱ (Impact of Remol in the State)ৰ বাবে হোৱা ধাৰাসাৰ বৰষুণৰ ফলত কেইবাখনো জিলাত ভয়ানক বান পৰিস্থিতিৰ সৃষ্টি হৈছে । শুকুৰবাৰে ৰাজ্যিক দুৰ্যোগ ব্যৱস্থাপনা বিভাগে প্ৰকাশ কৰা তথ্য অনুযায়ী, এতিয়ালৈকে ৰাজ্যৰ ৯ খন জিলাৰ প্ৰায় ২ লাখ লোক বানৰ কবলত (2 lakh people are in the grip of floods) পৰিছে। চলিত বানত আটাইতকৈ ক্ষতিগ্ৰস্ত হৈছে হাইলাকান্দি আৰু কৰিমগঞ্জ জিলা দুখন।
ইফালে কপিলী নৈৰ জলপৃষ্ঠও বিপদসীমাৰ ওপৰত আছে। বানৰ কবলত পৰা ৰাজ্যকেইখন হৈছে নগাঁও, হাইলাকান্দি, পশ্চিম কাৰ্বি আংলং, কৰিমগঞ্জ, কাছাৰ, হোজাই, গোলাঘাট, ডিমা-হাচাও আৰু কাৰ্বি আংলং। এই জিলাকেইখনৰ ২২ টা ৰাজহ চক্ৰৰ ৩৮৬ খন গাঁও বানৰ কবলত।
আনহাতে, ৯ খন জিলাৰ ১,৯৮,৮৫৬ গৰাকী লোক বানত ক্ষতিগ্ৰস্ত হৈছে। কৰিমগঞ্জত সৰ্বাধিক ৩৬,৯৫৯ গৰাকী লোক বানত ক্ষতিগ্ৰস্ত হৈছে। আনহাতে, কাছাৰত ১,০২,২৪৬, হাইলাকান্দিত ১৪,৩০৮, হোজাইত ২২,০৫৮, পশ্চিম কাৰ্বি আংলঙত ৪৪, নগাঁৱত ২২,৩৫৪ আৰু ডিমা-হাচাও জিলাত ৮৮৭ গৰাকী লোক বানত ক্ষতিগ্ৰস্ত হৈছে।
ইয়াৰ উপৰি ৩,২৩৮.৮ হেক্টৰ কৃষিভূমি ক্ষতিগ্ৰস্ত হৈছে। আনহাতে, মুঠ ১১০ টা আশ্ৰয় শিবিৰ স্থাপন কৰা হৈছে। এই শিবিৰত ৩৫,৬৪০ গৰাকী লোকে আশ্ৰয় লৈছে। উল্লেখ্য যে ৰাজ্যৰ শেহতীয়া বানত এই পৰ্যন্ত দুজন লোকৰ মৃত্যু হৈছে। হাইলাকান্দি জিলাত এজন আৰু কৰিমগঞ্জত এজন লোকৰ মৃত্যু ঘটিছে।
