উত্তৰ-পূৰ্বাঞ্চলত ৰেমলৰ (Remal effects in North East) ঘূৰ্ণীবতাহৰ তাণ্ডৱ। মিজোৰাম আৰু মণিপুৰৰ বিভিন্ন প্ৰান্তত ভূমিস্খলন সংঘটিত হোৱাৰ লগতে হঠাৎ সৃষ্টি হোৱা বানৰ ফলত ব্যাপক ক্ষতিসাধন হৈছে। মঙলবাৰে সন্ধিয়ালৈকে মিজোৰামত ২৭টা মৃতদেহ উদ্ধাৰ কৰা হৈছে। আনহাতে, অসমত মৃত্যু হোৱা লোকৰ সংখ্যা কমেও ৫ জন।
মিজোৰামত ১০ জন আৰু অসমত এজন লোক সন্ধানহীন। ত্ৰিপুৰাত ২৪ ঘণ্টাত অভিলেখ সৃষ্টি কৰিছে বৰষুণে। ৰাজ্যখনৰ প্ৰায় ২৩৪ কিলোমিটাৰ লাইন বিদ্যুৎবিহীন। অসমৰ ত্ৰিপুৰা, মিজোৰাম আৰু বৰাক উপত্যকাৰ মাজত যোগাযোগ বিচ্ছিন্ন হৈছে। মিজোৰাম-মণিপুৰৰ মাজৰ ৰাষ্ট্ৰীয় ঘাইপথো বিচ্ছিন্ন হৈছে।
ৰেমলৰ প্ৰভাৱত আইজলৰ মেলথাম অঞ্চলত এটা শিলৰ কুৱেৰী ভাঙি পৰাত কমেও ২৪ জন শ্ৰমিক আবদ্ধ হৈ পৰে। এই পৰ্যন্ত ১৪টা মৃতদেহ উদ্ধাৰ কৰা হৈছে। লগতে ৭-৮ জন নিখোজ হৈছে। হ্লিমেন অঞ্চলত ঘৰ ভাঙি যোৱাৰ ফলত বাসিন্দাসকল উটুৱাই লৈ যায়। নদীৰ পৰা উদ্ধাৰ হৈছে ৪টা মৃতদেহ। চেলেমত ঘৰ ভাঙি ৩ জন নিহত হয়। ফালকাওঁত নৈৰ বুকুত জাহ যোৱা ২ জন লোকৰ মৃতদেহ উদ্ধাৰ হৈছে। ইয়াৰ উপৰি জিলা প্ৰশাসনে লুংছেই আৰু কেলছিত এজনকৈ আৰু আইবাওত দুজনকৈ লোকৰ মৃত্যু হোৱা বুলি নিশ্চিত কৰিছে।
মিজোৰামৰ মুখ্যমন্ত্ৰী লালদুহোমাই পৰিস্থিতি সন্দৰ্ভত জৰুৰী বৈঠকৰ আহ্বান জনায়। সাহায্য হিচাপে ১৫ কোটি টকা অনুমোদন দিয়া হৈছে। মৃতকৰ আত্মীয়ক দিয়া হ’ব ৪ লাখকৈ টকা। ইফালে মণিপুৰত কাংপোকোপি জিলাত দলং ভাঙি পৰে। ভূমিস্খলনৰ ফলত মিজোৰাম আৰু মণিপুৰৰ মাজৰ পথটো বন্ধ হৈ পৰিছে। মণিপুৰৰ জিৰিবামত পথ ভাঙিছে, উখৰুলত বান পৰিস্থিতিৰ সৃষ্টি হৈছে ।
জনজীৱন বিঘ্নিত হৈছে সেনাপতি জিলাতো। ইম্ফলৰ ৰিমছ হাস্পতালৰ ৱাৰ্ডতো প্ৰৱেশ কৰিছে পানী। আনহাতে, অসমৰ ঢেকীয়াজুলিৰ বৰচলা অঞ্চলত এখন স্কুল বাছত গছ পৰি আহত হয় ১২ গৰাকী ছাত্ৰ-ছাত্ৰী। মৰিগাঁও জিলাৰ দীঘলবাৰী অঞ্চলত এখন অটো ভেনৰ ওপৰত গছ বাগৰি থিতাতে মৃত্যু হয় স্কুলীয়া ছাত্ৰ কৌশিক বৰদলৈ আম্ফা। পলাশবাৰীৰ ৰাজপুখুৰীত এজোপা গছ পৰি মৃত্যু হয় লৱণ্য কুমাৰী নামৰ এগৰাকী মহিলাৰ।
আনহাতে, গুৱাহাটীৰ পাঞ্জাবাৰীত গছ পৰাৰ ফলত কলেজীয়া ছাত্ৰী মিণ্টু তালুকদাৰৰ মৃত্যু হয়। একেদৰে কৰিমগঞ্জত আম গছৰ ডাল মূৰত পৰি মৃত্যু হয় জকিয়া বেগম নামৰ এটি শিশুৰ। মুজাম্মিল আলী লস্কৰ নামৰ বয়োজ্যেষ্ঠ ব্যক্তি এজন পিছলি নদীত পৰি নিৰুদ্দেশ হয়। ইফালে ধাৰাসাৰ বৰষুণৰ ফলত গোগামুখৰ নামনি সোৱণশিৰি জলবিদ্যুৎ প্ৰকল্প ভাঙি যোৱাৰ ফলত পুতুল গগৈ নামৰ এজন শ্ৰমিকৰ মৃত্যু হয়।
উল্লেখ্য যে সোমবাৰে সন্ধিয়াৰ পৰা মঙলবাৰে সন্ধিয়ালৈকে বিদ্যুৎবিহীন হৈ পৰে গুৱাহাটী। নিশাৰ ভিতৰতে ধুমুহাত গছ-গছনি বাগৰি পৰা আৰু পানী জমা হোৱাৰ পিছত পৰিস্থিতি অধিক ভয়াৱহ হৈ পৰে। ৰাজ্যজুৰি একেই অৱস্থা। ডিমা হাছাও জিলাও তছনছ হৈ পৰে। বহু ঠাইত ভাঙি পৰে ৰেল লাইন। কৰিমগঞ্জত চিংলা নদী ওফন্দি উঠাত বৃহৎ এলেকাৰ ঘৰত পানী প্ৰৱেশ কৰিছে। কাছাৰ আৰু হাইলাকান্দিতো বহু ঘৰত পানী।
অসম বিশ্ববিদ্যালয়ে বুধবাৰে বাতিল কৰে সকলো পৰীক্ষা। আনহাতে, অসমৰ ৯খন জিলাৰ সকলো শিক্ষানুষ্ঠান বুধবাৰেও বন্ধ থাকিব। গুৱাহাটীৰ পৰা আইজল আৰু শিলচৰলৈ বিমান চলাচল বন্ধ কৰি দিয়া হৈছে। গুৱাহাটী-কলকাতা বিমান সেৱাও বাতিল কৰা হৈছে। বতৰ বিজ্ঞান বিভাগে জনোৱা মতে, আজি ৰেমলে বৰাকত অধিক প্ৰভাৱ পেলাব।
