স্বায়ত্ত ৰাজ্য ইচ্যু কেন্দ্ৰীয় চৰকাৰৰ নাকচৰ বিৰুদ্ধে ২৫ জুলাইত ১৬ সংগঠনৰ ১২ ঘণ্টীয়া কাৰবি আংলং বন্ধৰ আহ্বান

ASSAM TIMES POST,ছইদুল ইছলাম,ডিফুঃ কাৰবি আংলং আৰু ডিমা হাচাওক সাঙুৰি ভাৰতীয় সংবিধানৰ ষষ্ঠ অনুসূচিত জাতিৰ অনুশ্ছেদ ২৪৪ ( ক) ৰ অধীনত এখন স্বায়ত্ত ৰাজ্যৰ দাবীৰ সন্দৰ্ভত কেন্দ্ৰীয় চৰকাৰৰ শেষতীয়া নাকাৰাত্মক স্থিতিকলৈ সৰব হৈ পৰিছে কাৰবি আংলঙৰ ১৬ টাকৈ খিলঞ্জীয়া জাতীয় সংগঠন৷ ১৬ টা সংগঠন ক্ৰমে, এইছএছডিচি, কেএছএ, কেএনচিএ, আইছা, আৰৱাইএ, এছৱাইচি, এছৱাইজে, কেএডব্লিউজেএফ, এইছপিৱাইএ, ইউকেৱাইএ, আইপোৱা, নিৰ্মাণ শ্ৰমিক, কেএএনকেআইএছ, কেএইউপিএ,কেএডিএ আৰু কেইউএই সন্মিলিত ভাবে আয়োজন কৰা এক সংবাদ মেলত সংগঠনৰ শীৰ্ষ নেতৃত্বই সদৰি কৰে যে যোৱা ১৬ জুলাইত সংসদত পাৰ্বত্য জিলা তিনিখনৰ সাংসদ হৰেণছিং বে’ৰ স্বায়ত্ত ৰাজ্য ৰূপায়ণ সন্দৰ্ভত সোধা এক প্ৰশ্নৰ উত্তৰত কেন্দ্ৰীয় গৃহ ৰাজ্য মন্ত্ৰী জেকে ৰেড্ডীয়ে স্বায়ত্ত ৰাজ্যৰ ইছ্যু পোনছাটেই নাকচ কৰি কেন্দ্ৰৰ ওচৰত বৰ্তমান তেনে কোনো প্ৰস্তাব নাই বুলি কয়৷ মন্ত্ৰী গৰাকীৰ এনে উত্তৰ দূৰ্ভাগ্যজনক ৷ নিৰ্বাচনৰ পূৰ্বে কাৰবি আংলঙ আৰু ডিমা হাচাওক স্বৰাজ্য প্ৰদান কৰা হ’ব বুলি দিয়া প্ৰতিশ্ৰুতি সংসদৰ প্ৰথম অধিবেশনতে নাকচ হোৱা ঘটনা কেন্দ্ৰীয় চৰকাৰৰ প্ৰতাৰণাৰ স্বৰূপ উদঙাই দিলে বুলি অভিযোগ কৰে৷ সেয়ে জিলাখনৰ ১৬ টাকৈ সংগঠনে কেন্দ্ৰীয় চৰকাৰ ষষ্ঠ অনুসূচিত জাতিৰ সংবিধান প্ৰদত্ত সুবিধা বিৰোধী স্থিতিৰ বিৰোধিতাৰে অহা ২৫ জুলাইৰ পুৱা ৫ বজাৰ পৰা সন্ধিয়া ৫ বজালৈ ১২ ঘণ্টীয়া শান্তিপূৰ্ণ কাৰবি বন্ধৰ আহ্বান জনাইছে ৷ বন্ধৰ সময়ছোৱাত সংগঠন সমূহে পৰীক্ষা, গাখীৰ, পানী, চিকিৎসা আৰু অন্যান্য জৰুৰীকালীন আৰু অত্যাৱশ্যকীয় সেৱা সমূহ ৰেহাই দিছে বুলি জানিব দিছে৷ স্বায়ত্ত ৰাজ্যৰ স্বাৰ্থত জিলাবাসীক বন্ধৰ কাৰ্যসূচীত সহযোগ কৰাৰ লগতে সমৰ্থন জনাবলৈ আহ্বন জনাইছে৷