ASSAM TIMES POST
ডিফুঃ ২০২০ চনৰ পদ্মশ্ৰী ৰংবং তেৰাঙ বঁটাৰ বাবে অসমৰ বলিষ্ঠ সাংবাদিক, সাহিত্যিক, অসম সভাৰ প্ৰাক্তন সভাপতি, মিত্ ভাষৰ স্ৰষ্টা ড০ নগেন শইকীয়াক মনোনিত কৰা হৈছে৷ আজি ডিফুস্থিত জিলা প্ৰেছ ক্লাৱত এক সংবাদ মেলৰ আয়োজন কৰি এই কথা ঘোষণা কৰে চিংথুৰ প্ৰকাশনৰ স্বত্বাধিকাৰ বিশ্বজ্যোতি হাজৰিকাই৷
অহা ১২ জানুৱাৰীত কাৰবি আংলঙৰ বকলিয়াঘাট উচ্চতৰ মাধ্যমিক বিদ্যালয় প্ৰেক্ষাগৃহত এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰা হব ৷ সংবাদমেলত চিংথুৰ প্ৰকাশনৰ স্বত্তাধিকাৰ বিশ্বজ্যোতি হাজৰিকা, জ্যেষ্ঠ সাংবাদিক সঞ্জু বৰা আৰু দিপেন বৰাই জানিবলৈ দিয়া অনুসৰি ” ৰংমিলিৰ হাঁহি”ৰ স্ৰষ্টা পদ্মশ্ৰী ৰংবং তেৰাঙৰ ১৩ জানুৱাৰীৰ পৱিত্ৰ জন্মদিনৰ লগত সংগতি ৰাখি ১২ জানুৱাৰী তাৰিখে ২০১৭ চনৰ পৰাই ” ৰংবং তেৰাঙ সমন্বয় বঁটা” প্ৰদান কৰি আহিছে৷
ইতিমধ্যে ২০১৭ চনত বিশিষ্ট সাহিত্যিক, লোক- সংস্কৃতিৰ গৱেষক পণ্ডিত ড০ বীৰেন্দ্ৰ নাথ দত্ত, ২০১৮ চনত অৰুণাচল তথা অসমৰ প্ৰখ্যাত গল্পকাৰ তথা উপন্যাসিক য়েছে দৰজে ঠেংছি আৰু ২০১৯ চনত প্ৰবীন সাংবাদিক আৰু বিশিষ্ট সাহিত্যিক হোমেন বৰগোঁহাঞিলৈ এই বঁটা আগবঢ়োৱা হৈছিল৷ এইবাৰ ২০২০ চনৰ ” ৰংবং তেৰাঙ সমন্বয় বঁটা”ৰ বাবে অসমৰ এগৰাকী বলিষ্ঠ সাংবাদিক, সাহিত্যিক, অসম সাহিত্য সভাৰ প্ৰাক্তন সভাপতি মিত্ভাষৰ স্ৰষ্টা ড: নগেন শইকীয়াক মনোনীত কৰিছে ৷
অহা ১২ জানুৱাৰী ২০২০ চনত চিংথুৰ প্ৰকাশনৰ উদ্যোগত বকলীয়াঘাট উচ্চতৰ মাধ্যমিক বিদ্যালয়ৰ প্ৰেক্ষাগৃহত এক গাম্ভীৰ্যপূৰ্ণ অনুষ্ঠান পুৱা ১০-৩০ বজাত ড’ নগেন শইকীয়ালৈ এই বঁটা প্ৰদান কৰা হব ৷ এই বঁটাত নগদ ধনৰ লগতে, পৰাম্পৰাগত সাজ-পোছাক আৰু স্থানীয় লেখকৰ গ্ৰন্থৰ টোপোলা আদি প্ৰদান কৰা হব ৷ উক্ত অনুষ্ঠানত পদ্মশ্ৰী ৰংবং তেৰাঙৰ লগতে গণ্যমান্য ব্যক্তি উপস্থিত থাকিব বুলি উদ্যোক্তা সকলে জানিব দিছে ৷ আনহাতে উক্ত অনুষ্ঠানতে ৰংবং তেৰাঙৰ এখন বাস্তৱ জীৱনভিত্তিক উপন্যাস “উৰুখা পঁজাৰ কাব্য”, ভবেন কোচৰ এখনি ৰহস্য গল্প সংকলন ” শিলভেটাৰ চকুলো ” আৰু বহু কেইখন গ্ৰন্থ উন্মোচন কৰা হব বুলিও উদ্যোক্তা সকলে জনাইছে ৷
