অসমৰ অন্যতম বৃহৎ সাংস্কৃতিক মহোৎসৱ হিচাপে চিহ্নিত হোৱা কাৰ্বি যুৱ মহোৎসৱৰ (Karbi Youth Festival) সোণালী জয়ন্তী বৰ্ষ উদযাপনক কেন্দ্ৰ কৰি সম্প্ৰতি ব্যাপক উৎসৱমূখৰ পৰিৱেশ বিৰাজ কৰিছে সমগ্ৰ পাহাৰীয়া জিলাখনত।
যুৱ মহোৎসৱৰ এই পৰিৱেশক এক অনন্য মাত্ৰা প্ৰদান কৰি কাইলৈ তাৰালাংছʼৰ মহোৎসৱস্থলীত উপস্থিত হʼবহি ভাৰতৰ ৰাষ্ট্ৰপতি দ্ৰৌপদী মূৰ্মূ। যুৱ মহোৎসৱলৈ প্ৰথমবাৰৰ বাবে ৰাষ্ট্ৰপতিৰ আগমনক কেন্দ্ৰ কৰি ব্যাপক উৎসাহৰ বিপৰীতে সমগ্ৰ এলেকাতে একপ্ৰকাৰ নিৰাপত্তা বেহু গঢ়ি তোলা হৈছে।
ৰাষ্ট্ৰপতিৰ আগমনৰ প্ৰতি লক্ষ্য ৰাখি মহোৎসৱস্থলীত কটকটীয়া নিৰাপত্তা বেহু গঢ়ি তোলা হৈছে। ঠায়ে ঠায়ে দেখিবলৈ পোৱা গৈছে আৰক্ষীৰ তালাচী। কাৰ্যসূচী অনুসৰি কাইলৈ দিনৰ 11.50 বজাত ৰাষ্ট্ৰপতি গৰাকী মহোৎসৱৰ মূল মণ্ডপত উপস্থিত হোৱাৰ লগতে প্ৰায় দুঘণ্টা সময় তাৰালাংছʼত অতিবাহিত কৰিব।
ৰাষ্ট্ৰপতিৰ লগতে উক্ত অনুষ্ঠানত অসম আৰু মেঘালয়ৰ ৰাজ্যপাল, অসম, নাগালেণ্ড আৰু মেঘালয়ৰ মুখ্যমন্ত্ৰী উপস্থিত থাকিব। ৰাষ্ট্ৰপতিৰ আগমন উপলক্ষে ডিফু চহৰখনো বিশেষভাৱে সজাই পৰাই তোলাৰ লগতে আলোকসজ্জাৰে সজ্জিত কৰি তোলা হৈছে।
