প্ৰধানমন্ত্ৰী নৰেন্দ্ৰ মোডীয়ে (PM Narendra Modi) কোনো কাৰণ নোহোৱাকৈয়ে বাতিল কৰিলে মিজোৰামৰ নিৰ্বাচনী প্ৰচাৰ কাৰ্যসূচী। মোডীৰ এই সিদ্ধান্তই পুনৰ কংগ্ৰেছক অস্ত্ৰ প্ৰদান কৰিছে।কংগ্ৰেছৰ সাধাৰণ সম্পাদক জয়ৰাম ৰমেশে কয় যে মণিপুৰৰ সংঘাত আৰু সংকটৰ সন্দৰ্ভত ইমান দিন মৌন হৈ থকাৰ বাবেই মোডীয়ে মিজোৰাম ভ্ৰমণ বাতিল কৰিবলগীয়া হৈছে।
এক্স হেণ্ডেলত তেওঁ লিখিছে, “মোডীয়ে ১৮০ দিন ধৰি অশান্ত মণিপুৰলৈ এবাৰো আহিবলৈ সময় নাপালে, কিন্তু তেওঁলোকৰ চুবুৰীয়া ৰাজ্যত প্ৰচাৰ চলাবলৈ আহিলে প্ৰশ্ন উত্থাপন হ’লহেঁতেন। মিজোৰামলৈ তেওঁ কি মুখ লৈ আহিব? হয়তো সেইবাবেই তেওঁ ভ্ৰমণ বাতিল কৰিবলগীয়া হ’ল।”
এই দিশত শাসকীয় দল এম এন এফে নিৰ্বাচনৰ সন্মুখত মিজোৰামত আশ্ৰয় লোৱা ১২ হাজাৰৰো অধিক কুকি শৰণাৰ্থীৰ প্ৰশংসা ব্যৱহাৰ কৰি ক্ষমতা অক্ষুণ্ণ ৰাখিবলৈ চেষ্টা কৰিছে। মণিপুৰৰ সংঘাতৰ পিছত পলাই যোৱা সেই কুকিসকলৰ বাবে মিজোৰাম চৰকাৰে থকা-খোৱাৰ ব্যৱস্থা কৰিছে। অন্ধ্ৰপ্ৰদেশ, তামিলনাডুৰ পৰা অহা মিছনেৰীসকলে সহায়ৰ হাত আগবঢ়ায়। শৰণাৰ্থী পৰিয়ালৰ নেতা জন জোৱে কয়, “মিজোৰাম চৰকাৰৰ প্ৰতি আমি চিৰকৃতজ্ঞ হৈ থাকিম। কুকি, জোমি, জো, মাৰ, চিন, মিজোসকলৰ একে তেজৰ সম্পৰ্ক।
বিপদৰ সময়ত দায়িত্ব পৰিহাৰ নকৰাকৈ মুখ্যমন্ত্ৰী জোৰামথাংগাই আমাক, ম্যানমাৰ আৰু বাংলাদেশী শৰণাৰ্থীসকলক যিদৰে আকোৱালি লৈছে, তাৰ কোনো প্ৰশংসাই যথেষ্ট নহয়।” নিৰ্বাচনী ইস্তাহাৰত তেওঁৰ দলে দাবী কৰে যে বিভিন্ন দেশত বিয়পি পৰা জো-চিন-কুকিসকলক এটা ছাতিৰ তললৈ অনা হʼব। অৰ্থাৎ কেৱল পৃথক ৰাজ্যই নহয়, কাৰ্যত পৃথক দেশৰ দাবী উত্থাপন কৰি এম এন এফে মিজোৰ ভোট বিচাৰিছে।
