কাৰ্বি কালচাৰেল চ’ছাইটীৰ উদ্যোগত আগন্তুক বৰ্ষৰ ১২ৰ পৰা ২০জানুৱাৰীলৈ কাৰ্বি আংলং জিলাৰ ডিফুৰ তাৰালাংছত অনুষ্ঠিত হ’বলগীয়া কাৰ্বি যুৱ মহোৎসৱৰ সোণালী জয়ন্তী (Karbi Youth Festival’s Golden Jubilee) অনুষ্ঠানৰ মুখ্য অতিথি হ’ব দেশৰ ৰাষ্ট্ৰপতি দ্ৰৌপদী মুৰ্মু (President Draupadi Murmu was the chief guest)৷
আজি তাৰালাংছত এক সংবাদমেল (Press Conference in Taralangso) সম্বোধন কৰি এই কথা সদৰি কৰে কাৰ্বি কালচাৰেল চ’ছাইটীৰ সভাপতি চন্দ্ৰছিং ক্ৰ’ আৰু সাধাৰণ সম্পাদক বিদ্যাছিং ৰংপীয়ে৷ অনুষ্ঠানত ৰাষ্ট্ৰপতিগৰাকীৰ সন্মুখনত ৫ হাজাৰ কাৰ্বি ডেকা-গাভৰুৱে জাতীয় সাজপাৰ পৰিধান কৰি যুৱ মহোৎসৱৰ থীম ছঙত কাৰ্বি লোকনৃত্য প্ৰদৰ্শন কৰিব৷ ই এক একক প্ৰচেষ্টাৰ লগতে কাৰ্বি আংলং স্বায়ত্তশাসিত পৰিষদৰ উদ্যোগত ৩ হাজাৰ যুৱকে বাহঁত উঠি খোজকঢ়া প্ৰদৰ্শন কৰি বিশ্ব অভিলেখ গঢ়াৰ সিদ্ধান্ত গ্ৰহণ কৰাৰ কথাও সংবাদমেলত সদৰি কৰে৷
ইয়াৰোপৰি আগন্তুক বৰ্ষত অনুষ্ঠিত হবলগীয়া কাৰবি যুৱ মহোৎসৱৰ সোণালী বৰ্ষ উপলক্ষে আজিৰে পৰা তিনিদিনীয়া কাৰ্যসূচীৰে আৰম্ভ হব কাৰবি মাণ্ডলিক যুৱ মহোৎসৱ৷ এই উপলক্ষে কেচিএছৰ সভাপতি সম্পাদকে মাণ্ডলিক যুৱ মহোৎসৱ সূচাৰুৰূপে পালন কৰিবলৈ মহোৎসৱ সমিতিক শুভেশ্চা জ্ঞাপন কৰিছে৷
আনহাতে সভাপতি-সম্পাদক গৰাকীয়ে সংবাদমেলৰ জৰিয়তে জনায়যে কাৰবি যুৱ মহোৎসৱৰ সোণালী জয়ন্তী বৰ্ষৰ গৌৰৱোজ্জল কাৰ্যসূচীত ক্ৰমে, ভিয়েটনাম, ইণ্ডোনেচিয়া, দক্ষিণ কোৰিয়া, মালেয়েচিয়া, লাও, কম্বোডিয়া, স্পেনিছ আৰু ম্যানমাৰৰ দৰে বহিঃ ৰাষ্ট্ৰৰ প্ৰতিনিধিয়ে অংশগ্ৰহণ কৰিব ৷ আনহাতে কেচিএছৰ তৰফৰ পৰা জিলাখনৰ সকলো জাতি-জনগোষ্ঠীক কাৰবি যুৱ মহোৎসৱৰ সোণালী জয়ন্তী বৰ্ষৰ কাৰ্যসূচীত নিজৰ নিজৰ পৰাম্পৰাগত সাজপাৰ পৰিধান কৰি অংশ গ্ৰহণ কৰিবলৈ আহ্বান জনায়৷
