পূজাৰ বতৰত গুৱাহাটী মহানগৰবাসীলৈ আন এক উপহাৰ দিবলৈ সাজু হৈছে মুখ্যমন্ত্ৰী ডঃ হিমন্ত বিশ্ব শৰ্মা (Himanta Biswa Sarma)। মালিগাঁৱৰ নীলাচল উৰণ সেতুৰ পিছত এইবাৰ জুৰোড উৰণ সেতু যাতায়াতৰ বাবে মুকলি হ’বলৈ আগবাঢ়িছে। বৃহস্পতিবাৰে ৰাইজৰ বাবে মুকলি কৰিব গুৱাহাটী কমাৰ্চ কলেজৰ পৰা সুন্দৰপুৰ সংযোগী জুৰোডৰ নৱনিৰ্মিত উৰণ সেতু। ইতিমধ্যে ইয়াৰ বাবে প্ৰস্তুতি সম্পূৰ্ণ হৈ উঠিছে। সুন্দৰকৈ সজাই-পৰাই তোলা হৈছে নৱনিৰ্মিত উৰণ সেতুখন।
বৃহস্পতিবাৰে সন্ধিয়া ৫ বজাত মুখ্যমন্ত্ৰীয়ে আনুষ্ঠানিকভাৱে উদ্বোধন কৰিব এই উৰণ সেতু। এই উপলক্ষে জুৰোডৰ শ্ৰদ্ধাঞ্জলি কাননত অনুষ্ঠিত হ’ব এক বিশেষ অনুষ্ঠান।
উল্লেখযোগ্য যে অসম চৰকাৰে গুৱাহাটীকে ধৰি ৰাজ্যৰ বিভিন্ন প্ৰান্তত বহুকেইখন উৰণ সেতু নিৰ্মাণৰ প্ৰকল্প হাতত লৈছে। ইয়াৰে কেইটামান প্ৰকল্প সম্পূৰ্ণ হৈছে, কেইটামান চলি আছে আৰু কেইটামান শীঘ্ৰে আৰম্ভ হ’ব বুলি ৰাজ্য চৰকাৰৰ সূত্ৰত প্ৰকাশ।
