ASSAM TIMES POST
নিউজ ডেস্ক
এনআৰচি আৰু নতুন নাগৰিকত্ব আইন (চিএএ)ৰ বিৰুদ্ধে দেশজুৰি বিক্ষোভৰ সন্মুখীন হৈ প্ৰায় প্ৰতিদিনেই নতুন ব্যাখ্যা দিবলৈ আৰম্ভ কৰিছে কেন্দ্ৰীয় গৃহ মন্ত্ৰণালায়ে৷ ইয়াকে লৈ বিৰোধীৰ অভিযোগ, সেই ব্যাখ্যাত সন্দেহ দূৰ হোৱাৰ পৰিৱৰ্তে অধিক শোচনীয় হৈ পৰিছে পৰিস্থিতি৷ ঠিক যেনেদৰে হৈছিল বিমুদ্ৰাকৰণৰ সময়ত ৰিজাৰ্ভ বেংকৰ নিত্যনতুন নিৰ্দেশনাত৷
শুকুৰবাৰে মন্ত্ৰণালয়ৰ তৰফৰ পৰা নাগৰিকত্ব আইনৰ ব্যাখ্যা আগবঢ়াই কোৱা হৈছে যে প্ৰথমতে, ১৯৮৭ চনৰ ১ জুলাইৰ পূৰ্বে যিসক লভাৰতত জন্মিছিল, তেওঁলোক সকলোৱেই এই দেশৰ নাগৰিক৷ দ্বিতীয়তে, ১ জুলাই ১৯৮৭ৰ পৰা ৩ ডিচেম্বৰ ২০০৪ৰ ভিতৰত যিসকল ভাৰতত জন্মিছিল আৰু যিসকলৰ পিতৃ-মাতৃৰ ভিতৰত কোনো এজন ভাৰতৰ নাগৰিক, তেৱোঁ ভাৰতীয়৷ তৃতীয়তে, ৩ ডিচেম্বৰ ২০০৪ৰ পিছত যিসকল জন্মিছিল আৰু যাৰ পিতৃ-মাতৃ দুয়ো বা যিকোনো এজন ভাৰতীয় নাগৰিক আৰু অন্যজন সেই সময়ত অবৈধ অনুপ্ৰৱেশকাৰী নহয়, তেওঁলোকো বাৰতীয় নাগৰিক হিচাপে গণ্য হ’ব৷
কিন্তু বিৰোধীৰ মন্তব্য, ১৯৮৭ চনৰ ১ জুলাইৰ পূৰ্বে যেতিয়া জন্মৰ পঞ্জীয়ন বাধ্যতামূলক নাছিল, তেতিয়া যিসকলৰ জন্ম, তেওঁলোকে কি নথি দেখুৱাব? তাৰ উপৰি, ২০০৪ চনৰ ৩ ডিচেম্বৰৰ পিছত জন্ম হোৱা কোনোৱে যদি তেওঁলোকৰ পিতৃ বা মাতৃৰ ভিতৰৰ কোনো এজনকে ভাৰতীয় নাগৰিক হিচাপে প্ৰমাণ কৰিব নোৱাৰে, তেতিয়াহ’লে তেওঁৰ নাগৰিকত্বক লৈ প্ৰশ্ন উঠিব৷ কিন্তু তেওঁ যিহেতু ভাৰতত জন্মিছে, গতিকে তেওঁ অ-মুছলমান হ’লেও নিজকে শৰণাৰ্থী হিচাপে দাবী কৰি নতুন নাগৰিকত্ব আইনৰ সুবিধা ল’ব নোৱাৰিব৷ এই সকলো জটিলতাৰ সমাধান কি বুলিও বিৰোধী দলসমূহে প্ৰশ্ন তুলিছে৷
কিন্তু ইয়াৰ স্পষ্ট উত্তৰ গৃহ মন্ত্ৰণালয়ৰ ব্যাখ্যাত উপলব্ধ নহয়৷ যদিও মন্ত্ৰণালয়ৰ কৰ্তৃপক্ষৰ দাবী, দেশজুৰি এনআৰচি আৰম্ভ কৰাৰ সময়ত যি নিয়ম-কানুন তৈয়াৰ কৰা হ’ব, তাত বৈধ নাগৰিকসকলৰ কাৰো কোনো সমস্যা নহ’ব৷ জন্মৰ নথি বা বিদ্যালয়ত পঢ়াৰ নথি দাখিলৰ মাধ্যমেৰে নাগৰিকত্বৰ আবেদন কৰিব পৰা যাব৷ নিৰক্ষৰ ব্যক্তিসকলৰ বাবে বিশেষ ব্যৱস্থা থাকিব৷ তেওঁলোকৰ ক্ষেত্ৰত জন্মৰ সাক্ষী হিচাপে কোনো ব্যক্তি বা স্থানীয় কৰ্তৃপক্ষৰ প্ৰমাণ-পত্ৰৰ ভিত্তিতে নাগৰিকত্বৰ আবেদন কৰিব পৰা যাব৷ দেশজুৰি ৰাষ্ট্ৰীয় নাগৰিকপঞ্জী প্ৰস্তুত হোৱাৰ পিছত তাত নাম উঠিলে লাভ কৰিব নাগৰিকত্ব কাৰ্ড৷ ভোটাৰ কাৰ্ড বা আধাৰ কাৰ্ড নহয়, সেয়াই হ’ব দেশৰ নাগৰিক হোৱাৰ পৰিচয়৷
