ASSAM TIMES POST,নতুন দিল্লীঃ কেন্দ্ৰই শনিবাৰে ৬ ৰাজ্যত নতুন ৰাজ্যপাল নিযুক্তি দিয়ে। সেই অনুসৰি মধ্য প্ৰদেশৰ ৰাজ্যপাল হিচাপে লালজী টেণ্ডুন, উত্তৰ প্ৰদেশত আনন্দিবেন পেটেল, পশ্চিম বংগত জগদ্বীপ ধানখাৰ, বিহাৰত ফাগু চৌহান, নাগালেণ্ডত আৰ এন ৰবি আৰু ত্ৰিপুৰাত ৰমেশ বাইছক নিযুক্তি দিয়া হয়। মধ্য প্ৰদেশৰ নতুন ৰাজ্যপাল লালজী টেণ্ডুনে ইয়াৰ পূৰ্বলৈকে বিহাৰৰ ৰাজ্যপাল হিচাপে কাৰ্যনিৰ্বাহ কৰি আছিল।
একেদৰে উত্তৰ প্ৰদেশৰ নৱ নিযুক্ত ৰাজ্যপাল আনন্দিবেন পেটেলো ইয়াৰ পূৰ্বলৈকে আছিল মধ্য প্ৰদেশৰ ৰাজ্যপাল। তাৰো পূৰ্বে তেওঁ গুজৰাটৰ মুখ্যমন্ত্ৰী আছিল। অৰ্থাৎ উক্ত দুয়োকে সাল-সলনিৰে নিযুক্তি দিয়া হৈছে। আনহাতে পশ্চিম বংগৰ ৰাজ্যপাল জগদ্বীপ ধানখাৰ হ’ল উচ্চতম ন্যায়ালয়ৰ জ্যেষ্ঠ অধিবক্তা। বিহাৰৰ ৰাজ্যপাল হিচাপে নিযুক্তি লাভ কৰা ফাগু চৌহান হ’ল ভাৰতীয় জনতা পাৰ্টিৰ বিধায়ক। আকৌ নাগালেণ্ডৰ ৰাজ্যপাল হিচাপে নিযুক্তি লাভ কৰা আৰ এন ৰবি হৈছে নগা শান্তি আলোচনাৰ মুখ্য মধ্যস্থতাকাৰী। ইপিনে নৱনিযুক্ত ত্ৰিপুৰাৰ ৰাজ্যপাল ৰমেশ বাইছ হৈছে বিজেপিৰ এজন কাৰ্যকৰ্তা।
ৰাষ্ট্ৰপতি ভৱনৰ এক প্ৰেছ বিবৃতিত এই কথা প্ৰকাশ পাইছে। প্ৰসংগক্ৰমে নাগালেণ্ডৰ ৰাজ্যপাল হিচাপে আৰ এন ৰবিক নিযুক্তি প্ৰদান কৰা কাৰ্যই তাৎপৰ্য বহন কৰিছে। উত্তৰ পূৰ্বাঞ্চলৰ ৰাজ্যখনৰ বিদ্ৰোহী সমস্যা নিৰ্মূল কৰিবলৈকে কেন্দ্ৰীয় চৰকাৰৰে বিদ্ৰোহী সংগঠনসমূহৰ মাজত শান্তি আলোচনা আগবঢ়াই নিছিল ৰবিয়ে। তেওঁ ইতিমধ্যে কেবাবাৰো নাগালেণ্ড ভ্ৰমণ কৰিছে।
