ASSAM TIMES POST
সম্প্ৰতি সৌৰভ-কন্যা সানাৰ এটা ইনষ্টাগ্ৰাম পোষ্টে বেচ আলোড়নৰ সৃষ্টি কৰিছে৷ তেওঁৰ পোষ্টটো প্ৰত্যক্ষ কৰি বহুতৰেই মন হয় যে পোষ্টটোৱে দেশৰ বর্তমান অস্থিৰ অৱস্থাৰ দিশলৈকে আঙুলি টোঁৱাব বিচাৰিছে৷ অৱশ্যে বুধবাৰে ভাৰতীয় ক্ৰিকেট বোর্ডৰ সভাপতি সৌৰভ গাংগুলীয়ে সম্পূর্ণ বিষয়টোকে নাকচ কৰে৷নাগৰিকত্ত্ব সংশোধনী আইনক লৈ তেওঁৰ জীয়ৰীয়ে পোষ্ট কৰিছে, এনে অভিযোগক তেওঁ ‘অসত্য’ বুলি আখ্যা দিছে আৰু টুইটযোগে জনাইছে নিজৰ বক্তব্য৷ বিষয়টো সম্পর্কত গাংগুলীয়ে আৰু কয় যে, ৰাজনীতি সম্পর্কে একো জনাৰ বয়স এতিয়াও তেওঁৰ ছোৱালীৰ হোৱা নাই, গতিকে তেওঁক এই বিষয়ৰ পৰা দূৰৈত ৰখা ভাল৷ গাংগুলীয়ে স্পষ্টভাৱে লিখিছে, “দয়া কৰি এই ধৰণৰ বিষয়ৰ পৰা সানাক দূৰৈত ৰাখক… এই পোষ্টটো সত্য নহয়… ৰাজনীতি সম্পর্কে জনাৰ বয়স এতিয়াও তেওঁৰ হোৱা নাই৷”
উল্লেখ্য যে মঙলবাৰে সৌৰভ দুহিতা, ১৮ বছৰীয়া সানাৰ ইনষ্টাগ্ৰাম একাউণ্টৰ পৰা এটি স্নেপশ্বট হঠাতে ব্যাপকভাৱে ভাইৰেল হৈ পৰে৷ উক্ত পোষ্টটোত সানাই খুশৱন্ত সিঙৰ গ্ৰন্থ ‘দ্য এণ্ড অব্ ইণ্ডিয়া’ৰ পৰা এটি অংশ শ্বেয়াৰ কৰে আৰু উক্ত পোষ্টটোক নাগৰিকত্ব সংশোধনী আইনৰ বিৰোধিতা বুলি অনেকেই মন্তব্য কৰি শ্বেয়াৰ কৰে৷
উল্লেখ্য যে সানাই উক্ত গ্ৰন্থখনৰ পৰা দাঙি ধৰা অংশখিনিৰ অর্থ এনে ধৰণৰ, “প্ৰতিখন ফেচিষ্ট চৰকাৰৰ একোটা দল বা গোষ্ঠীৰ প্ৰয়োজন হয়৷ নিজে গঢ়ি উঠাৰ বাবে তেওঁলোকে সেই দল বা গোষ্ঠীসমূহক ব্যৱহাৰ কৰি তেওঁলোকক চয়তানলৈও পৰিণত কৰে৷ দুই-এটা দলক লৈয়ে এইটো আৰম্ভ হয়৷ কিন্তু সেইটো কেতিয়াও তাতেই শেষ নহয়৷ ঘৃণাৰ ওপৰত নির্ভৰ কৰে যি আন্দোলন, সেই আন্দোলনত নিজকে ধৰি ৰাখিব পাৰে অবিৰাম এটা ভয় বা দ্বন্দ্বৰ বাতাৱৰণ সৃষ্টি কৰি৷
তেওঁ লগতে আৰু লিখিছে, “আজি যিসকলে আমাক নিজকে নিৰাপদ অনুভৱ কৰিছে, ভাবিছে আমিতো মুছলমান বা খ্ৰীষ্টান নহয়, তেওঁলোকে মূর্খৰ স্বর্গত বাস কৰিছে৷ সংঘই ইতিমধ্যে বাওঁপন্থী ইতিহাসবিদ আৰু পশ্চিমীয়া সংস্কৃতিত বিশ্বাসী যুৱ সমাজক টার্গেট কৰিছে৷ কাইলৈ তেওঁলোকৰ ঘৃণা বিয়পি পৰিব স্কার্ট পৰিহিতা মহিলা, যিসকলে মাংস খায়, মদ্যপান কৰে, বিদেশী চিনেমা চায়,বছৰি তীর্থ ভ্ৰমণ নকৰে দাঁতনৰ পৰিৱর্তে টুথপেষ্ট ব্যৱহাৰ কৰে, আয়ুর্বেদিকৰ পৰিৱর্তে এলোপেথিক ঔষধ ব্যৱহাৰ কৰে, দেখা-দেখি হ’লেই ‘জয় শ্ৰীৰাম’ কোৱাৰ পৰিৱর্তে কৰমর্দন কৰে বা চুম্বন কৰে তেওঁলোকৰ ওপৰত৷ কোনো নিৰাপদ নহয়৷ ভাৰতক বচাবলৈ হ’লে এইসমূহ আমি গভীৰভাৱে অনুধাৱন কৰিব লাগিব৷”
