মণিপুৰৰ মন্ত্ৰীসভাই (Manipur Cabinet) ৰাজ্যপালক এদিনৰ বাবে বিধানসভাৰ অধিবেশন আহ্বান কৰিবলৈ পৰামৰ্শ দিযছে। ৰাজ্যপালে সন্মতি দিলে ২১ আগষ্টত এই অধিবেশন অনুষ্ঠিত হʼব পাৰে।
সূত্ৰ অনুসৰি, শুকুৰবাৰে পুৱা মণিপুৰৰ মুখ্যমন্ত্ৰী এন বীৰেণ সিঙে অসমৰ মুখ্যমন্ত্ৰী হিমন্ত বিশ্ব শৰ্মাৰ সৈতে ফোনযোগে বাৰ্তালাপ কৰে। ইয়াৰ পিছতে তৎক্ষণাত মন্ত্ৰীসভাৰ বৈঠক আহ্বান কৰি বিধানসভাৰ এদিনীয়া অধিবেশন আহ্বান কৰিবলৈ ৰাজভৱনলৈ পৰামৰ্শ প্ৰেৰণ কৰা হয়।
ইয়াৰ পূৰ্বে যোৱা মাৰ্চ মাহত মণিপুৰত বিধানসভাৰ অধিবেশন অনুষ্ঠিত হৈছিল। ইয়াৰ পিছত মেʼ মাহৰ পৰা ৰাজ্যখন উত্তপ্ত হৈ আছে। সংবিধান অনুসৰি সকলো ৰাজ্যৰ বিধানসভাতে বৰ্ষাকালীন অধিবেশন অনুষ্ঠিত হয়। কিন্তু হিংসাৰ বাবে মণিপুৰত সেয়া সম্ভৱ হোৱা নাই। ২৬ জুলাইত বিৰোধীৰ হেঁচাত ৰাজ্য চৰকাৰে চলিত মাহৰ আৰম্ভণিতে অধিবেশন আহ্বান কৰে।
ইয়াৰ পিছতে মন্ত্ৰীসভাত এদিনীয়া অধিবেশন অনুষ্ঠিত কৰাৰ পৰামৰ্শ আগবঢ়ায়। অৱশ্যে প্ৰস্তাৱিত বিধানসভা অধিবেশনৰ কাম-কাজৰ বিষয়ে এতিয়াও সিদ্ধান্ত লোৱা হোৱা নাই। কিন্তু ৰাজনৈতিক মহলৰ মতে উক্ত অধিবেশনত ৰাজ্যখনৰ সামগ্ৰিক পৰিস্থিতিৰ বিষয়ে আলোচনা কৰাৰ সম্ভাৱনা আছে।
