প্ৰায় তিনিমাহ ধৰি জ্বলি আছে মণিপুৰ। যাৰ বাবে বৰ্তমান সমগ্ৰ দেশ অস্থিৰ হৈ পৰিছে। মণিপুৰৰ পৰিস্থিতি সন্দৰ্ভত মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ জে পি পাৰ্দিৱালা আৰু ন্যায়াধীশ মনোজ মিশ্ৰৰ বিচাৰপীঠে কয় যে বিগত দুমাহত ৰাজ্যখনত সাংবিধানিক গাঁথনি, আইন-শৃংখলা সম্পূৰ্ণৰূপে ভাঙি পৰিছে (Supreme Court has blatantly alleged that the constitutional machinery has completely broken down in Manipur)। পৰিস্থিতিৰ নিয়ন্ত্ৰণ সম্পূৰ্ণৰূপে হেৰুৱাই পেলাইছে আৰক্ষীয়ে।
মণিপুৰৰ অশান্তিৰ মাজতে পোহৰলৈ আহে এক ভয়ংকৰ ভিডিঅ’। তাত দেখা গʼল দুগৰাকী মহিলাক বিবস্ত্ৰ কৰি ঘূৰোৱা হৈছে। অভিযোগ অনুসৰি, আৰক্ষীৰ ওচৰত এজাহাৰ দাখিল কৰিবলৈ যোৱাৰ পিছতো আৰক্ষীয়ে প্ৰথমে অভিযোগ মানি লোৱা নাছিল। অভিযোগ লাভ কৰিলেও কোনো ব্যৱস্থা লোৱা নাছিল।
বিগত কেইমাহমানত বহু অভিযোগ উত্থাপন হৈছে। বহু লোকৰ মৃত্যু হৈছে। ৬ হাজাৰৰো অধিক এফআইআৰ দাখিল কৰা হৈছে। অৱশ্যে গ্ৰেপ্তাৰৰ সংখ্যা তুলনামূলকভাৱে কম। সেই প্ৰেক্ষাপটতো মঙলবাৰে উচ্চতম ন্যায়ালয়ে অসন্তুষ্টি প্ৰকাশ কৰে।
আজি উচ্চতম ন্যায়ালয়ে কয় যে এফআইআৰ দাখিল কৰিবলৈ আৰু বিবৃতি লিপিবদ্ধ হʼবলৈ বহু সময় লাগিছিল। একে সময়তে মুখ্য ন্যায়াধীশৰ বিচাৰপীঠে মণিপুৰ সন্দৰ্ভত তদন্ত প্ৰক্ৰিয়াক লেহেমীয়া বুলি অভিহিত কৰে। আজি আদালতে কয়, পৰিস্থিতিৰ বিচাৰ কৰিলে দেখা যায় যে মে’ মাহৰ আৰম্ভণিৰ পৰা জুলাই মাহৰ শেষলৈকে ৰাজ্যখনত কোনো আইন-শৃংখলা নাছিল। লগতে জনোৱা হয় যে সোমবাৰে পৰৱৰ্তী শুনানিত মণিপুৰ আৰক্ষীৰ সঞ্চালক প্ৰধান উপস্থিত থাকিব লাগিব।
