মণিপুৰত দুগৰাকী মহিলাক উলংগ (Women naked in Manipur) কৰি ঘূৰোৱাৰ গোচৰত চিবিআয়ে এফআইআৰ দাখিল (CBI files FIR in Manipur sexual violence case) কৰিছে। সংবাদ সংস্থা এএনআই সূত্ৰত শনিবাৰে এই কথা প্ৰকাশ। বৃহস্পতিবাৰে হিংসাত্মক মণিপুৰৰ এই ঘটনাৰ তদন্ত চিবিআইক অৰ্পণ কৰিছিল কেন্দ্ৰীয় গৃহ মন্ত্ৰালয়ে।
উল্লেখযোগ্য যে চলিত বৰ্ষৰ ৪ মেʼত ইম্ফলৰ পৰা ৩৫ কিলোমিটাৰ দূৰত্বত অৱস্থিত কাংপোকোপ্পি জিলাত দুগৰাকী মহিলাক উলংগ কৰি ঘূৰোৱাৰ অভিযোগ উত্থাপন হৈছিল। দলবদ্ধ ধৰ্ষণ হোৱা বুলিও দাবী কৰা হৈছে। কিছুদিন পূৰ্বে এই ঘটনাৰ এটা ভিডিঅ’ ছচিয়েল মিডিয়াত ভাইৰেল হৈছিল।
২৬ ছেকেণ্ডৰ এই ভিডিঅʼটো মুক্তি পোৱাৰ কিছু সময়ৰ পিছতে দেশজুৰি হুলস্থুলৰ সৃষ্টি হয়। এই ঘটনাক বিভিন্ন মহলে গৰিহণা দিয়ে। ইয়াৰ পিছত এজন এজনকৈ অভিযুক্তক গ্ৰেপ্তাৰ কৰা হয়। নিৰ্যাতনৰ ভিডিঅ’ লোৱা ব্যক্তিজনকো গ্ৰেপ্তাৰ কৰা হৈছে। তেওঁৰ ফোনটোও জব্দ কৰা হৈছে।আনহাতে, মণিপুৰত শান্তি ঘূৰাই অনাত কেন্দ্ৰীয় চৰকাৰ ব্যৰ্থ হোৱা বুলি দাবী কৰিছে বিৰোধীয়ে।
এই পৰিস্থিতিত ভিডিঅʼটো ওলোৱাৰ লগে লগে নতুনকৈ হুলস্থুলৰ সৃষ্টি হয়। ৭৮ দিনৰ মৌনতাৰ অন্তত প্ৰধানমন্ত্ৰী নৰেন্দ্ৰ মোদীয়ে মণিপুৰ বিষয়ত মুখ খোলে। তেওঁ কয় যে এই ঘটনা যিকোনো সভ্য সমাজৰ বাবে লজ্জাজনক। অৱশ্যে মণিপুৰৰ ঘটনা সন্দৰ্ভত সদনত প্ৰধানমন্ত্ৰীৰ বক্তব্য দাবী কৰিছে বিৰোধীয়ে। তাৰ মাজতে শনিবাৰে উত্তৰ-পূবৰ ৰাজ্যখনত উপস্থিত হয় বিৰোধী মিত্ৰজোট ‘ইণ্ডিয়া’ৰ সাংসদসকল।
