লেনিন, কাৰ্ল মাৰ্ক্স কিম্বা নজৰুল নহয়, নেতাজী সুভাষ, ভগত সিঙৰ দৰে স্বাধীনতা সংগ্ৰামীৰ মূৰ্তি বিজেপিৰ শাসনত ত্ৰিপুৰা (Triputa)ত চাফাই কৰিবলৈ আৰম্ভ কৰিছে।
উনকোটি জিলাৰ কুমাৰঘাট চহৰত (Kumarghat Town) শনিবাৰে নিশাৰ আন্ধাৰত ক্ৰেনেৰে আঁতৰাই দিয়া হয় নেতাজী সুভাষ চন্দ্ৰ বসুৰ প্ৰতিমূৰ্তি (Netaji Subhas Chandra Bose’s statue removed)। দেওবাৰে নিশাও একেদৰেই পবিয়াচৰৰ পৰা বিপ্লৱী ভগত সিঙৰ প্ৰতিমূৰ্তি আঁতৰাই দিয়া হয়। এই ঘটনাক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হয়।
মহকুমা প্ৰশাসনৰ সহযোগত বিজেপিৰ দ্বাৰা পৰিচালিত কুমাৰঘাট পৌৰ পৰিষদে ট্ৰেফিক চিগনেল (Traffic Signal) স্থাপন কৰিলে সুবিধা হʼব বুলি দাবী কৰে। কিন্তু এই পৌৰ পৰিষদেই নেতাজীৰ প্ৰতিমূৰ্তি আৰু ভগত সিঙৰ প্ৰতিমূৰ্তি বাওঁপন্থীৰ দিনত স্থাপন কৰিছিল। আনহাতে, দেওবাৰে নিশা চণ্ডীপুৰ বিধানসভা সমষ্টিৰ কৌলিকুৰাৰ বৈদ্যনাথ মজুমদাৰ সোঁৱৰণী উচ্চতৰ মাধ্যমিক বিদ্যালয়ৰ চৌহদত প্ৰয়াত প্ৰাক্তন উপ মুখ্যমন্ত্ৰী বৈদ্যনাথ মজুমদাৰৰ আৱক্ষ মূৰ্তিও বিকৃত হৈ পৰে। অভিযোগৰ আঙুলি উঠিছে বিজেপিৰ সমৰ্থক দুষ্কৃতিকাৰীসকলৰ ফালে। জিলা দণ্ডাধীশৰ ওচৰত চিপিএমৰ নেতৃত্বই এই ঘটনাৰ প্ৰতিবাদ কৰে।
