বান পৰিস্থিতিক লৈ অসমত (Assam Flood) ক্ৰমান্বয়ে উদ্বেগ বৃদ্ধি পাইছে। শেহতীয়া বানত ৰাজ্যত এই পৰ্যন্ত মৃত্যু হৈছে দুজন (two deaths) লোকৰ। আনহাতে, ৪.৮ লাখৰো অধিক লোক ক্ষতিগ্ৰস্ত (More than 4.8 lakh people affected) হৈছে। ১৯ খন জিলা ক্ষতিগ্ৰস্ত হৈছে বানৰ ফলত। ইয়াৰ উপৰি ১০৭ বৰ্গকিলোমিটাৰ এলেকাৰ শস্য অনিষ্ট হোৱাৰ আশংকা কৰা হৈছে। এই তথ্য ৰাজ্যিক দুৰ্যোগ প্ৰশমন বিভাগৰ।
আনহাতে, ৰাজ্য প্ৰশাসনৰ সূত্ৰ অনুসৰি, নলবাৰী জিলাৰ ঘগ্ৰাপাৰ অঞ্চলত পানীয়ে উটুৱাই নিয়াৰ ফলত এজন লোকৰ মৃত্যু হয়। ইয়াৰ পূৰ্বে বৃহস্পতিবাৰে তামুলপুৰ অঞ্চলত আৰু এজনৰ মৃত্যু হোৱাৰ খবৰ পোৱা গৈছিল।
ৰাজ্যিক দুৰ্যোগ ব্যৱস্থাপনা বাহিনীয়ে প্ৰকাশ কৰা অনুসৰি, অসমৰ দ অঞ্চলৰ জিলাসমূহেই আটাইতকৈ বেছি ক্ষতিগ্ৰস্ত হৈছে। সৰ্বাধিক ক্ষতিৰ সন্মুখীন হৈছে বজালী জিলা। জিলাখনত ২.৬ লাখৰো অধিক লোক ক্ষতিগ্ৰস্ত হৈছে। নলবাৰীত ৮০ হাজাৰ ৬১ জন বাসিন্দা ক্ষতিগ্ৰস্ত হৈছে। বৰপেটাত এই সংখ্যা ৭৩ হাজাৰ ২৩৩।
মুঠ ১৪খন জিলাত ১৪০টা সাহায্য শিবিৰ মুকলি কৰা হৈছে। তাত আশ্ৰয় লৈছে ৩৫ হাজাৰৰো অধিক লোক। ব্ৰহ্মপুত্ৰকে ধৰি ১০খন নদীৰ জলপৃষ্ঠ স্বাভাৱিকতকৈ ওপৰত। আনহাতে, বতৰ বিজ্ঞান বিভাগৰ তথ্য অনুসৰি, আগন্তুক পাঁচ দিনত অসমত ক্ৰমান্বয়ে বৰষুণ কমি আহিব। আগন্তুক কেইদিনমানলৈ ৰাজ্যৰ বিভিন্ন জিলাত সামান্যৰ পৰা মধ্যমীয়া বৰষুণৰ সম্ভাৱনা আছে।
