গুৱাহাটী মহানগৰীলৈ বহু সপোন লৈ অহা বিভিন্ন প্ৰান্তৰ কেইগৰাকীমান যুৱক-যুৱতীয়ে সন্মুখীন হোৱা বিভিন্ন সমস্যাক লৈ এখন বাস্তৱধৰ্মী ছবি নিৰ্মাণ কৰি থকা হৈছে। ছবিখনৰ নাম হৈছে “চিলনী চোৰ”। আমি দেখি আহিছোঁ ৰাজ্যৰ ভিতৰুৱা বহু ঠাইৰ পৰা নিজৰ জীৱনটোক গঢ় দিয়াৰ উদ্দেশ্যৰে যুৱক-যুৱতীসকল গুৱাহাটীলৈ আহে যদিও তেওঁলোক বিভিন্ন সময়ত বহু প্ৰত্যাহ্বানৰ সন্মুখীন হয়, যিয়ে তেওঁলোকক কেতিয়াবা বিপথে পৰিচালিত কৰে। এই আটাইবোৰক লৈ নিৰ্মিত ছবিখনৰ পৰিচালনা কৰিছে প্ৰণৱজ্যোতি ভৰালীয়ে (Pranabjyoti Bharali)।
“চিলনী চোন” ৰ প্ৰথম পৰ্যায়ৰ দৃশ্যগ্ৰহণ সমাপ্ত
ছবিখনৰ প্ৰযোজনা পৰেশ বৰাৰ লগতে চিত্ৰনাট্য ডাঃ নয়নজ্যোতি তালুকদাৰৰ। দৃশ্যগ্ৰহণ প্ৰফুল্ল ৰাভাৰ আৰু সংগীত পৰিচালনা অহীৰ ভৈৰৱৰ। ছবিখনৰ ইতিমধ্যে এটি গীত বাণীবদ্ধ হৈছে জুবিন আৰু সুবাসনা দত্তৰ কণ্ঠৰে। “চিলনী চোৰ” ত মুখ্য সহ পৰিচালক হিচাবে আছে ভৱেশ নাথ আৰু সহকাৰী পৰিচালনা পুলক শিৱমৰ। এক্সন পৰিচালনা প্ৰণৱ মেধিৰ।
ছবিখনত অভিনয় কৰিছে ক্ৰমে অৰুণ হাজৰিকা, দেৱানন্দ শইকীয়া, ঝুলেন ভূঞা, নীলাক্ষী দেৱী, চাজু আহমেদ, প্ৰণৱ দত্ত, নীল তামুলী, কংকন দে, জ্যোতিষ্মান শৰ্মা, মিমি কাশ্যপ, মানালী বৰা, ছুইটী সুস্মিতা, সাগৰিকা, দীপ দেউৰী, প্ৰতুল ডেকা, কুমাৰেশ দত্ত, উদয় শংকৰ ভূঞা আৰু অনুপম শইকীয়াই।
