যিদৰে প্ৰযুক্তিৰ সহায়ত পৃথিৱীখন আগবাঢ়িছে, তেনেদৰেই ই বিশ্বৰ জনসাধাৰণক ভয়াৱহ বিপদতো পেলাইছে। কৃত্ৰিম বুদ্ধিমত্তাৰ প্ৰযুক্তিয়ে এজন ব্যক্তিৰ মুখাৱয়ৱ আন এজন ব্যক্তিয়ে সহজেই নকল কৰিব পাৰে। এই ‘ডিপফেক’ টেকন’লজি (‘Deepfake’ Technology) ব্যৱহাৰ কৰি কোনোবাই যদি আন কাৰোবাৰ মুখাৱয়ৱ ব্যৱহাৰ কৰি ভিডিঅʼ কল কৰে, তেন্তে খালী চকুৰে আচল আৰু ভুৱাৰ মাজত পাৰ্থক্য কʼব পৰাটো বৰ সহজ নহয়।
সেয়েহে অপৰাধৰ সময়ত প্ৰৱঞ্চকসকলে এই প্ৰযুক্তিসমূহৰ ফালে আগবাঢ়িছে। ৰয়টাৰৰ তথ্য অনুসৰি, উত্তৰ চীন (North China)ৰ এজন বাসিন্দাই ‘ডিপফেক’ প্ৰযুক্তি ব্যৱহাৰ কৰি ৫ কোটি টকাৰ প্ৰতাৰণা (Rs 5 crore cheated) কৰিছে।
চীনৰ বাওটৌ চহৰৰ আৰক্ষীয়ে দাবী কৰা মতে, এই প্ৰৱঞ্চকজনে চীনৰ এজন বাসিন্দাৰ ঘনিষ্ঠ বন্ধুৰ ৰূপ লৈছিল। ইয়াৰ পিছত বন্ধুজনক ভিডিঅʼ কল কৰি ৫ কোটি টকাৰ সহায় বিচাৰে। চীনৰ বাসিন্দাজনে ভাবিলে তেওঁৰ বন্ধুজন সঁচাকৈয়ে বিপদত পৰি তেওঁৰ পৰা আৰ্থিক সহায় বিচাৰিছে।
সেয়ে বন্ধুজনে প্ৰতাৰকজনৰ বেংক একাউণ্টলৈ পইচা পঠিয়াই দিলে। কিন্তু টকা পঠোৱাৰ পিছতহে তেওঁ প্ৰকৃত পৰিস্থিতি বুজিব পাৰিলে। লগে লগে স্থানীয় আৰক্ষীক খবৰ দিয়া হয়। আৰক্ষীৰ মতে, বেংক একাউণ্টৰ সবিশেষ সংগ্ৰহ কৰি শীঘ্ৰে গ্ৰেপ্তাৰ কৰিব অভিযুক্ত প্ৰৱঞ্চকজনক।
