প্ৰায় দুবছৰৰ অন্তত পুনৰ আৰম্ভ হৈছে আৰিয়ান খানৰ ড্ৰাগছৰ গোচৰ (Aryan Khan’s drugs case)। কিন্তু এইবাৰ যাক লৈ প্ৰশ্ন উত্থাপন হৈছে তেওঁ হৈছে এনচিবিৰ প্ৰাক্তন বিষয়া সমীৰ ৱাংখেড় (Sameer Wangkhed)। চিবিআয়ে (CBI) তেওঁৰ বিৰুদ্ধে দুৰ্নীতিৰ গোচৰ ৰুজু কৰে। আৰিয়ানকাণ্ডত প্ৰায় ২৫ কোটি টকাৰ উৎকোচ লোৱাৰ অভিযোগ। কিন্তু কেৱল উৎকোচ গ্ৰহণ কৰাই নহয়, সমীৰৰ প্ৰাক্তন সহযোগী আইপিএছ বিষয়া জ্ঞানেশ্বৰ সিঙে আৰিয়ানকাণ্ডত নতুন দাবী উত্থাপন কৰে। শেষ মুহূৰ্তত ড্ৰাগছৰ গোচৰৰ এফআইআৰত আৰিয়ানৰ নাম সন্নিবিষ্ট কৰা হয়।
সমীৰৰ প্ৰাক্তন সহযোগী জ্ঞানেশ্বৰ সিঙে শপতনামাত কয় যে এফআইআৰত আগতে শ্বাহৰুখৰ পুত্ৰ আৰিয়ানৰ নাম উল্লেখ কৰা হোৱা নাছিল। শেষ মুহূৰ্তত কেইবাটাও নাম বাদ পৰে আৰু কিছুমান নতুন নাম যোগ হয়। এই তালিকাত আছিল আৰিয়ান আৰু তেওঁৰ বন্ধু আৰবাজ মাৰ্চেণ্ট।
চিবিআইৰ সূত্ৰ অনুসৰি, সমীৰে ব্যক্তিগত সম্পদ বৃদ্ধিৰ বাবে দুৰ্নীতিৰ আশ্ৰয় লোৱাৰ প্ৰমাণ পোৱা গৈছে। বহু বিদেশ ভ্ৰমণ, দামী ঘড়ী, বিলাসী জীৱনশৈলীৰ হিচাপ দিয়া হয়। এই জীৱনশৈলীৰ সৈতে সমীৰৰ আয়ৰ কোনো সম্পৰ্ক বিচাৰি পোৱা নাছিল চিবিআয়ে। ইয়াৰ পিছতে চিবিআয়ে গোচৰ ৰুজু কৰে।
শেহতীয়াকৈ সমীৰৰ বিৰুদ্ধে চমন জাৰি কৰা হৈছিল। সেই সময়ত প্ৰাক্তন বিষয়াগৰাকীয়ে দিল্লী উচ্চ ন্যায়ালয়ক চমন প্ৰত্যাহাৰ কৰিবলৈ অনুৰোধ জনাইছিল। ইয়াৰ পিছত উচ্চ ন্যায়ালয়ে তেওঁক অন্তৱৰ্তীকালীন সুৰক্ষা প্ৰদান কৰে। দিল্লী উচ্চ ন্যায়ালয়ে কয় যে তেওঁ ইচ্ছা কৰিলে মুম্বাই উচ্চ ন্যায়ালয়লৈ যাব পাৰে। চিবিআইৰ পৰা লিখিত অনুমোদন লʼলে ২২ মেʼলৈকে সমীৰৰ বিৰুদ্ধে কোনো গ্ৰেপ্তাৰৰ পৰোৱানা জাৰি কৰা নহʼব বুলি চিবিআয়ে প্ৰকাশ কৰে।
দুবছৰমান পূৰ্বে মুম্বাইৰ উপকূলৰ পৰা সমীৰে গ্ৰেপ্তাৰ কৰিছিল আৰিয়ানক। ২৯ দিনৰ কাৰাবাসৰ অন্তত আৰিয়ানক জামিনত মুকলি কৰি দিয়া হয। ২০২২ চনৰ মেʼ মাহত এনচিবিয়ে প্ৰমাণৰ অভাৱত আৰিয়ানৰ বিৰুদ্ধে উত্থাপিত সকলো অভিযোগ প্ৰত্যাহাৰ কৰে।
