ত্ৰিপুৰাৰ প্ৰথমগৰাকী মহিলা ৰে’ল চালক (Tripura’s first woman train driver) দেৱলীনা ৰায় (Devoleena Roy)। ত্ৰিপুৰাৰ ৰাজধানী আগৰতলাৰ বাসিন্দা হʼলেও তেওঁ ভাৰতীয় ৰেʼলৱেৰ খড়গপুৰ সংমণ্ডলত সহকাৰী লোকো পাইলট (Assistant Loco Pilot in Kharagpur Division) হিচাপে যোগদান কৰে।
আগৰতলাৰ এখন স্বনামধন্য ইংৰাজী মাধ্যমৰ বিদ্যালয়ৰ পৰা দ্বাদশ উত্তীৰ্ণ হোৱাৰ পিছত দেৱলীনাই বৈদ্যুতিক অভিযান্ত্ৰিক বিভাগত ডিপ্ল’মা সম্পূৰ্ণ কৰে। ইয়াৰ পিছত ২০১৭ চনত তেওঁ উচ্চ শিক্ষাৰ বাবে কলকাতালৈ গুচি যায়। তাৰ পৰাই তেওঁ অভিযান্ত্ৰিক শিক্ষা সমাপ্ত কৰে।
ইমানবোৰ কেৰিয়াৰ থকাৰ পিছতো তেওঁ কিয় ৰে’লপথ বাছি লৈছিল? এই প্ৰসংগত দেৱলীনাই কয়, “ভাৰতীয় ৰেʼলৱেই কেৰিয়াৰৰ বাবে সৰ্বোত্তম স্থান। আৰু সেইবাবেই মই এই বৃত্তিটো বাছি লৈছিলো। মই সফল হৈছো।” ইয়াৰ উপৰি সমাজৰ প্ৰতিগৰাকী ছোৱালীয়ে যাতে নিজৰ সপোন পূৰণ কৰিব পাৰে তাৰ কামনাও কৰে দেৱলীনাই।
দেৱলীনাৰ পিতৃ ৰণবীৰ ৰায় আৰু চন্দ্ৰাণী ভট্টাচাৰ্যই কন্যাৰ চাকৰিটোক লৈ উচ্ছাস প্ৰকাশ কৰে। সংবাদ মাধ্যমৰ আগত তেওঁলোকে কয়, “আমি আমাৰ ছোৱালীজনীক উচ্চ শিক্ষা দিব বিচাৰিছিলো। কেৱল সেয়াই নহয়, কন্যাক ইণ্ডিয়ান ৰে’লৱেত যোগদান কৰাৰো সপোন আমাৰ আছিল। সেই সপোন বাস্তৱায়িত হৈছে। আমি সুখী।” দেৱলীনা কৰ্মসূত্ৰে পশ্চিমবংগত আছে যদিও মাক-দেউতাক আগৰতলাত থাকে। দেৱলীনাই বৰ্তমান প্ৰশিক্ষণ লৈ আছে। প্ৰশিক্ষণ শেষ হোৱাৰ পিছত খড়গপুৰ বিভাগত যোগদান কৰিব দেৱলীনাই।
