ASSAM TIMES POST,ডিফুঃ আজি পাহাৰীয়া জিলাৰ সদৰ চহৰ ডিফুত অনুষ্ঠিত হোৱা উত্তৰ – পূৰ্বাঞ্চল ৰাজ্যৰ ১৯ বছৰ অনুৰ্দ্ধ ছোৱালী ফুটবল প্ৰতিযোগিতাৰ উদ্বোধনী খেলত ছিকিম একাদশে ত্ৰিপুৰা একাদশক ২- ১ গ’লৰ ব্যৱধানত পৰাজিত কৰে ৷ অসম ৰাইফলছৰ মুখ্য কাৰ্যালয়ৰ সঞ্চালক প্ৰধানে ডিফুৰ নৱনিৰ্মিত কাছা স্পৰ্টছ কমপ্লেক্সত আয়োজন কৰা নক্ আউট পৰ্যায়ৰ তীব্ৰ প্ৰতিদ্বন্দ্বিতামূলক খেলত ছিকিম একাদশৰ হাতত ত্ৰিপুৰা একাদশে ২- ১ গ’ লত পৰাজয় বৰণ কৰে ৷ প্ৰথমাৰ্দ্ধৰ ৮ মিনিট ৫ ছেকেণ্ডত ছিকিমৰ হৈ ৭ নম্বৰ জাৰ্ছীৰ লক্ষ্মী থাতালে ত্ৰিপুৰা গলৰক্ষাকক পৰাভূত কৰি ১ গ’ল দি দলক ১- ০ ৰ অগ্ৰগতি প্ৰদান কৰে ৷
ইয়াৰ পিছত ত্ৰিপুৰা একাদশে সমতা স্থাপন কৰিব নোৱাৰিলে যদিও দ্বিতীয়াৰ্দ্ধৰ খেল সমাপ্তি হ’বলৈ কিছুপূৰ্বে ৮৮ মিনিট ৯ ছেকেণ্ডত ছিকিম এক গ’ল দি সমতা স্থাপন কৰে ৷ ইয়াৰ ক্ষন্তেক পিছতে প্ৰতিযোগিতাৰ অতিৰিক্ত সময়ৰ ২ ছেকেণ্ডতে ছিকিম একাদশৰ কৰিশ্মা ৰয়ে ত্ৰিপুৰা একাদশক দ্বিতীয়টো গ’ল দি দলক প্ৰথম বিজয়ৰ সোৱাদ দিবলৈ সক্ষম হয়৷ আজিৰ খেলখন পৰিচালনা কৰে ডকমকাৰ বল’ন টকবিপীয়ে, তেওঁক লাইনত সহায় কৰে ক্ৰমে, লাংহিনৰ টিনা বসুমতাৰী আৰু হানজাংলাংছৰ লক্ষী কিলিংপীয়ে ৷
চতুৰ্থ ৰেফাৰীৰ দায়িত্ব পালন কৰে হামৰেণৰ ভেৰ’ণিকা টিচ’পীয়ে ৷ কাইলৈ প্ৰতিযোগিতা বাকী থকা খেলসমূহত পুৱাৰ পৰাই নক পৰ্যায়ত খেলোৱা হ’ব ৷ প্ৰতিযোগিতাখনত উত্তৰ- পূৰ্বাঞ্চল ৰাজ্যৰ অসম, ত্ৰিপুৰা, মণিপুৰ, নাগালেণ্ড, মেঘালয়, অৰুণাচল মিজোৰাম আৰু ছিকিমে অংশ গ্ৰহণ কৰিছে৷ প্ৰতিযোগিতাৰ ছেমিফাইনেল ক’হিমাত খেলোৱা হ’ব৷ আনহাতে বৰ্ণাঢ্য কাৰ্যসূচীলৈ আয়োজন কৰা উদ্বোধনী প্ৰতিযোগিতাখনত মুখ্য অতিথি হিচাপে উপস্থিত থাকে অসম ৰাইফলছৰ মেজৰ জেনেৰেল পিচি নায়াৰ ৷ উদ্বোধনী খেলখনত কাৰবি কালচাৰেল ট্ৰুপ আৰু মনোমোহা নৃত্য আৰু আসম ৰাইফলৰ মিউজিকেল বেণ্ডে উপস্থিত দৰ্শকক আপ্লুত কৰে৷
