পুনৰ উত্তপ্ত মণিপুৰ (Manipur)। বিষ্ণুপুৰ জিলাৰ ট্ৰংলাওবি অঞ্চলত বৃহস্পতিবাৰে কুকি উগ্ৰপন্থীয়ে (Kuki Militants) আৰক্ষীৰ ওপৰত গুলীচালনা কৰাত নিহত হয় আৰক্ষী কমাণ্ডো হেইচনাম জিতেন। আৰু চাৰিজন আৰক্ষী জোৱান আহত হৈ চিকিৎসালয়ত ভৰ্তি কৰোৱা হয়। বুধবাৰে পূৱ ইম্ফলত অসম ৰাইফলছৰ এটা টহলদাৰী বাহিনীক গুলীচালনা কৰা হয়। আহত হয় এজন জোৱান। এই ঘটনাৰ পিছত ৰাজ্যত আনুষ্ঠানিকভাৱে মৃত্যু হোৱা লোকৰ সংখ্যা ৬৭ জন। সন্ধানহীন হৈছে দুজন লোক।
এনে পৰিস্থিতিত কংগ্ৰেছে মণিপুৰত ৰাষ্ট্ৰপতি শাসনৰ দাবী উত্থাপন কৰে। মণিপুৰ, মিজোৰাম আৰু বিহাৰৰ দায়িত্বত থকা ৰাষ্ট্ৰীয় কংগ্ৰেছৰ নেতা ভক্ত চৰণ দাসে (Bhakta Charan) দিল্লীত কয়, “মণিপুৰত সম্পূৰ্ণ অৰাজকতা চলি আছে। ইণ্টাৰনেট বন্ধ কৰি দিয়া হৈছে যাতে ৰাজ্যৰ প্ৰকৃত ছবিখন ওলাই আহিব নোৱাৰে।”
ভক্তচৰণে এই প্ৰশ্ন উত্থাপন কৰে, “ইমান বৃহৎ হিংসাৰ অন্তত প্ৰধানমন্ত্ৰী নৰেন্দ্ৰ মোডী নিমাত কিয়? কেন্দ্রীয় গৃহমন্ত্রী মণিপুৰলৈ কিয় অহা নাই?” কংগ্ৰেছে আহতসকলৰ তাৎক্ষণিক চিকিৎসা, গৃহহীন লোকসকলৰ ঘৰলৈ উভতি অহাৰ বাবে এক নিৰাপদ পৰিৱেশ সৃষ্টি কৰা, ভুক্তভোগীৰ পৰিয়ালক ২০ লাখ টকা আৰু ঘৰ জ্বলি যোৱা পৰিয়ালক ৫ লাখ টকাৰ ক্ষতিপূৰণ আৰু দীৰ্ঘম্যাদী পুনৰ্বাসনৰ পেকেজৰ দাবী জনাইছে আক্ৰান্ত পৰিয়ালসমূহৰ বাবে।
ভক্তচৰণে কয় যে নিৰ্বাচনত জয়ী হʼবলৈ বিজেপিয়ে হিল এৰিয়া কমিটীক অধিক ক্ষমতা প্ৰদান, ৬ খন স্বায়ত্তশাসিত জিলা পৰিষদ গঠন আৰু মেইটেইক জনজাতিকৰণৰ প্ৰতিশ্ৰুতি দিছিল। কিন্তু জয়ী হোৱাৰ পিছত তেওঁলোকে দাবীসমূহ গণতান্ত্ৰিকভাৱে পূৰণ কৰিবলৈ চেষ্টা কৰা নাছিল। হঠাৎ ৩৮খন গাঁও উচ্ছেদ কৰি বিজেপি চৰকাৰে অশান্তিৰ জুই জ্বলাই দিলে।
পিছত মেইটেই সংগঠনসমূহে দাবী কৰে যে সংঘৰ্ষৰ সময়ত তেওঁলোকৰ ঘৰত জুই লগোৱাৰ পূৰ্বে অস্ত্ৰধাৰী কুকিসকলে মেইটেইসকলৰ মাটিৰ পট্টা কাঢ়ি লৈ গৈছিল। সংঘাতৰ পিছৰ, জনবসতিহীন গাঁওবোৰত ‘সংৰক্ষিত ভূমি’ চাইনবৰ্ড লগোৱা হৈছে।
মেইটেই সংগঠনটোৱে সকলো কুকি উগ্ৰপন্থী সংগঠনৰ সৈতে যুদ্ধবিৰতি বাতিল কৰা, ১৯৪৯ চনৰ পিছত ৰাজ্যখনলৈ অহা সকলো বাহিৰৰ লোকৰ চিনাক্তকৰণ, উচ্চ পদস্থ কুকি নেতাৰ শিপা বিচাৰি উলিওৱা আৰু ভুৱা বাতৰি সম্প্ৰচাৰ কঠোৰভাৱে বন্ধ কৰাৰ দাবী জনাইছে।
