ইতিমধ্যে আতিক আহমেদ (Atiq Ahmed) আৰু তেওঁৰ ভাতৃ আশ্ৰফৰ (Ashraf) হত্যাকাণ্ডৰ গোচৰত তিনিজন লোকক গ্ৰেপ্তাৰ কৰিছে আৰক্ষীয়ে। গ্ৰেপ্তাৰ হৈছে উত্তৰ প্ৰদেশৰ হামিৰপুৰৰ বাসিন্দা ছানী, কাছগঞ্জৰ বাসিন্দা অৰুণ আৰু বাণ্ডাৰ বাসিন্দা লবলেশ। আতিক আৰু আশ্ৰফক হত্যা কৰাৰ পিছত আৰক্ষীৰ ওচৰত আত্মসমৰ্পণ কৰে।
আৰক্ষীৰ সূত্ৰ অনুসৰি, তিনিওজন অভিযুক্তৰ বিৰুদ্ধে হত্যা, অপহৰণ, ডকাইতিকে ধৰি একাধিক গোচৰ আছে। আৰক্ষীৰ এক সূত্ৰই দাবী কৰা মতে, জেৰাকাৰীয়ে কয় যে তিনিওজনে জে’লত থকাৰ সময়তে বন্ধুত্ব গঢ়ি তুলিছিল। তেতিয়াৰ পৰাই তেওঁলোকে একেলগে সকলো অপৰাধ সংঘটিত কৰিছিল।
আৰক্ষী সূত্ৰৰ পৰা জানিব পৰা মতে, তিনিওজন অভিযুক্তই আতিকক হত্যা কৰাৰ পৰিকল্পনা কৰি শুকুৰবাৰে চিকিৎসালয়লৈ গৈছিল। শনিবাৰে নিৰাপত্তাৰ মাজতে আতিক আৰু আশ্ৰফক চিকিৎসালয়লৈ অনা হয়। শাৰীৰিক পৰীক্ষাৰ অন্তত সংবাদ মাধ্যমৰ সৈতে কথা পাতি আছিল আতিকে। সেই সময়ত সাংবাদিকৰ সাজ-পোছাক পৰিহিত তিনিজন দুষ্কৃতিকাৰীয়ে প্ৰথমে শূন্য দূৰত্বৰ পৰা আতিকৰ মূৰত গুলী চলাইছিল। ইয়াৰ পিছত আশ্ৰফকো গুলীয়াই হত্যা কৰা হয়। দুয়োজনে মাটিত পৰি যোৱাৰ পাছতো আৰক্ষীৰ সন্মুখত গুলীচালনা অব্যাহত ৰাখে আক্রমণকাৰীয়ে।আৰক্ষীৰ সূত্ৰৰ মতে, অভিযুক্তৰ ভিতৰত ছানী হামিৰপুৰৰ পৰা প্ৰয়াগৰাজলৈ আহিছিল প্ৰতিযোগিতামূলক পৰীক্ষাৰ বাবে প্ৰস্তুতি চলাবলৈ। কিন্তু ক্ৰমান্বয়ে অপৰাধৰ জগতখনৰ লগত জড়িত হৈ পৰিল। ইতিমধ্যে আৰক্ষীয়ে তিনি অভিযুক্তৰ ঘৰত তালাচী অভিযান চলাইছে। তেওঁলোকক জেৰা অব্যাহত আছে। আৰক্ষীৰ সূত্ৰ অনুসৰি, একাংশ লোকক জিম্মাত লোৱা হৈছে।
